រថយន្តមួយគ្រឿង កំពុងបើកបរសុខៗ ស្រាប់តែដាច់កង់ក្រោយ រត់ពេញផ្លូវ បណ្ដាលឲ្យរថយន្ត៣គ្រឿងទៀត បុកបន្តកន្ទុយគ្នា ធ្លាក់ពីលើផ្លូវជាតិ

កំពង់ឆ្នាំង ៖ បុរសម្នាក់ បានរងរបួសបាក់ជើងធ្ងន់ធ្ងរជាប់ក្នុងកាប៊ីនរថយន្ត និងរថយន្ត៣គ្រឿងទៀតបានបុកគ្នាជាបន្តបន្ទាប់ពេលផ្លូវជាតិ ដោយសាររថយន្តហ៊ីយ៉ាន់ដាយដឹកទំនិញ១គ្រឿង កំពុងតែបើកបរៗ ដាច់កង់ឌុបក្រោយរហូតរត់ពេញផ្លូវ។

ហេតុការណ៍គ្រោះថ្នាក់ចរាចរណ៍នេះ បានកើតឡើង នៅម៉ោង១០និង៥៥នាទី ថ្ងៃទី២៧ ខែវិច្ឆិកា ឆ្នាំ ២០១៨ លើផ្លូវជាតិលេខ៥ ចន្លោះគីឡូម៉ែត្រលេខ៦៩.៧០ ក្នុងភូមិគោគស្តៅ ឃុំទឹកហូត ស្រុករលាប្អៀរ។

សមត្ថកិច្ចនៅកន្លែងកើតហេតុបានឲ្យដឹងថា មុនពេលកើតហេតុមានរថយន្តធុនធំមួយគ្រឿងម៉ាកហ៊ីយ៉ានដាយ ពាក់ស្លាកលេខភ្នំពេញ ៣បេ ៣៩៤៥ បើកបរពីទិសខាងត្បូង ទៅទិសខាងជើង លុះមកដល់ចំណុចកើតហេតុ ស្រាប់តែបានដាច់កង់ក្រោយ ហើយកង់រថយន្តនោះបានបុកជាមួយនឹងរថយន្តVigo មួយគ្រឿង ដែលកំពុងធ្វើដំណើរបញ្ច្រាសទិសគ្នា បណ្ដាលរថយន្ត vigo គេចទៅប៉ះរថយន្ត២គ្រឿងទៀត គឺ១រថយន្តម៉ាកព្រួស ពណ៌ស និង២គឺរថយន្ត បែនដឹកខ្សាច់ បុកបន្តកន្ទុយគ្នាធ្លាក់ទៅក្នុងប្រឡាយក្បែរផ្លូវ។

ដោយឡែក បន្ទាប់ពីបង្កហេតុរួចមក រថយន្តបង្កនោះ មិនបានឈប់ទេ គឺព្យាយាមបើករត់ តែត្រូវបានសមត្ថកិច្ចដឹងព័ត៌មានទាន់ពេលវេលា ក៏អន្តរាគមន៍ស្ទាក់ចាប់នាំយកទៅរក្សាទុកនៅការិយាល័យចរាចរណ៍ផ្លូវគោកខេត្តកំពង់ឆ្នាំង កសាងសំណុំរឿងតាមនីតិវិធីច្បាប់។

នៅក្នុងហេតុការណ៍នេះ បណ្ដាលឲ្យអ្នកបើកបររថយន្តហ៊ីយាន់ដាយដឹកខ្សាច់កៀបជាប់ក្នុងកាប៊ីនរថយន្ត ដោយបានរងរបួសបាក់ជើងយ៉ាងធ្ងន់ធ្ងរ និងត្រូវបានបានបងប្អូនប្រជាពលរដ្ឋឃើញហេតុការណ៍នេះជួយគាស់ចេញពីរថយន្ត ហើយត្រូវបានគេដឹកយកទៅសង្គ្រោះនៅមន្ទីរពេទ្យស្រុកកំពង់ត្រឡាច។ ដោយឡែក ក៏អាចមានមនុស្សមួយចំនួនទៀត នៅក្នុងរថយន្តព្រួស រងរបួសស្រាលផងដែរ។

ករណីគ្រោះថ្នាក់ចរាចរណ៍នេះ ត្រូវបានគេសន្និដ្ឋានថា បង្កឡើងដោយរថយន្តហ៊ីយ៉ាន់ដាយដាច់កង់ ព្រោះតែមុនពេលបើកបរដឹកទំនិញមិនត្រូវពិនិត្យមើលលក្ខណៈរថយន្ត និងដឹកទំនិញធ្ងន់ ទើបបណ្ដាលឲ្យដាច់ចុងដុំរបូតកង់ចេញក្រៅរត់ពេញផ្លូវ និងបង្កឲ្យមានគ្រោះថ្នាក់ដូចខាងលើនេះតែម្ដង ។

ករណីនេះ ក៏ជាបទពិសោធន៍មួយសម្រាប់រថយន្តដឹកទំនិញទាំងឡាយ គួរតែមានការប្រុងប្រយ័ត្ន កុំឲ្យធ្វេសប្រហែស ដូចរថយន្តបង្កគ្រោះថ្នាក់ខាងលើនេះ៕