ការចុះត្រួតពិនិត្យចំនួនទ័ពធ្វើបច្ចុប្បន្នភាព និងទិន្នន័យថ្មីរបស់បញ្ជាការដ្ឋានកងទ័ពជើងគោក

កំពង់ធំ ៖ លោកឧត្ដមសេនីយ៍ទោ ឯម វណ្ណរិទ្ធ នាយរងសេនាធិការ កងទ័ពជើងគោក និងជាប្រធាន អនុគណៈកម្មការទី០៦ ចុះទិសយោធភូមិភាគទី០៤ បានដឹកនាំក្រុមការងារ ចុះត្រួតពិនិត្យចំនួនទ័ពរបស់បញ្ជាការដ្ឋានតំបន់ប្រតិបត្តិការសឹករងកំពង់ធំ នៃយោធភូមិភាគទី៤ ដើម្បីធ្វើបច្ចុប្បន្នភាព និងទិន្នន័យថ្មីរបស់បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ។

ពិធីពិនិត្យចំនួនទ័ព យុទ្ធោបករណ៍ និងអចលនទ្រព្យ ក្នុងបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីអនុវត្តសេចក្ដីសម្រេចសម្រេច លេខ ០៥២/២០១៨ ស.ស.រ ចុះថ្ងៃទី៣០ ខែតុលា ឆ្នាំ២០១៨ ស្ដីពីការបង្កើតអនុគណៈកម្មការ ចុះធ្វើបច្ចុប្បន្នភាព ត្រួតពិនិត្យចំនួនទ័ព យុទ្ធោបករណ៍ និងអចលនទ្រព្យ គ្រប់កងឯកភាព ចំណុះ កងទ័ពជើងគោក នៅ ថ្ងៃទី១១ ខែវិច្ឆិកា ឆ្នាំ២០១៨ ដែលបានធ្វើការប្រមូលផ្ដុំចំនួនទ័ពចំនួន០៨ កងឯកភាព ចំណុះបញ្ជាការដ្ឋានតំបន់ប្រតិបត្តិការសឹករងកំពង់ធំ។

លោកឧត្ដមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ និងជាអនុប្រធាន អនុគណៈកម្មការ ត្រួតពិនិត្យចំនួនទ័ព បានសំណេះសំណាលជាមួយយោធិនដែលមានមុខត្រូវត្រួតពិនិត្យនៅពេលនេះ គឺត្រូវត្រៀមបម្រុងរួចជាស្រេច ដើម្បីបង្ហាញជូនអនុគណៈកម្មការ និងបាននាំមកនូវ ឯកសារដែល តម្រូវឲ្យយោធិនម្នាក់គ្រប់រូបនាំមកជាមួយ ១-អត្តសញ្ញាណប័ណ្ណស៊ីវិល ,២-អត្តសញ្ញាណប័ណ្ណកងទ័ព ថតចម្លង ,៣-លិខិតសំបុត្រកំណើត ,៤-ជីវប្រវត្តិរូបសង្ខេបធំ (ពីរផ្នត់),៥-ព្រះរាជក្រឹត្យ ,អនុក្រឹត្យ ,សេចក្ដីសម្រេច និងសេចក្ដីប្រកាស មុខងារ និង ឋានន្តរសក្ដិចុងក្រោយ ថតចម្លង ក្នុងម្នាក់០៣ឈុត ដើម្បីបញ្ជាក់ជាមួយនឹងគណៈកម្មការត្រួតពិនិត្យ។

សកម្មភាពត្រួតពិនិត្យ ត្រូវបានធ្វើឡើងពេញមួយថ្ងៃ នៅបញ្ជាការដ្ឋានតំបន់ប្រតិបត្តិការសឹករងកំពង់ធំ និងឆ្ពោះទៅត្រួតពិនិត្យ នៅគោលដៅទី០២ ដែលមានទីតាំងនៅវរសេនាតូចលេខ០១ នៃបញ្ជាការដ្ឋាន តំបន់ប្រតិបត្តិការសឹករងកំពង់ធំ នៅភូមិតាឡែកថ្មីឃុំសាលាវិស័យ ស្រុកប្រាសាទបល្ល័ង្ក នៅថ្ងៃស្អែកបន្តទៀត។

លោក សោម ស៊ុន បានឲ្យដឹងថា ការពិនិត្យនេះ គឺបានផ្ដោតលើការបញ្ជាក់ភាពត្រឹមត្រូវ រវាងឯកសារស៊ីវិល និង ឯកសារទ័ព បញ្ជីកំណើត រួមទាំងថ្ងៃចូលបម្រើកងទ័ព ព្រមទាំងសេចក្ដីសម្រេចនានា ដើម្បីភាពងាយស្រួល និងជាប្រយោជន៍ដ៏មានសារៈសំខាន់ដល់យោធិន ដោយសារតែកន្លងមកនេះ យោធិនជាច្រើនខុសឆ្នាំកំណើត រវាងអត្តសញ្ញាណប័ណ្ណសញ្ជាតិខ្មែរ និងអត្តសញ្ញាណប័ណ្ណកងទ័ព និងសំបុត្រកំណើត ខុសគ្នា និងអត្តសញ្ញាណប័ណ្ណសញ្ជាតិខ្មែរ ទើបថ្នាក់លើបានយកចិត្តទុកដាក់រៀបចំកែសម្រួលឲ្យបានត្រឹមត្រូវ ក្នុងពេលធ្វើបច្ចុប្បន្នភាពជូនយោធិនគ្រប់រូប ដើម្បីភាពងាយស្រួលទទួលបានប្រយោជន៍ និងសាច់ញាតិ ក្នុងការដោះស្រាយបានឆាប់រហ័សទាន់ពេលវេលា៕