បាត់ដំបង ៖ ស្ត្រីរងគ្រោះម្នាក់ ដែលមានមុខរបរលក់នំបញ្ចុក ត្រូវបានស្លាប់ភ្លាមៗនៅនឹងកន្លែងយ៉ាងអាណោចអាធ័ម ខណៈស្ត្រីរូបនេះកំពុងជិះម៉ូតូដឹកនំបញ្ចុកយកបោះឲ្យម៉ូយដូចសព្វមួយដង ស្រាប់តែមានរថយន្តដឹកទឹកកកមួយគ្រឿង រេចង្កូតមកបុក បន្ទាប់ពីមានស្នូរផ្ទុះកង់រួចមក។
ករណីគ្រោះថ្នាក់ចរាចរណ៍នេះបានកើតឡើង កាលពីវេលាម៉ោង០៦និង១០នាទីព្រឹក ថ្ងៃទី១១ ខែវិច្ឆិកា ឆ្នាំ២០១៨ លើផ្លូវក្រាលគ្រួសក្រហម០១ខ្សែ ត្រង់ចំណុចភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង រវាង រថយន្ត និងម៉ូតូ បើកបរក្នុងទិសដៅច្រាសទិសគ្នា។
តាមការអះអាងពីប្រភពមួយចំនួនបានឲ្យដឹងថា នៅមុនពេលកើតហេតុ គេសង្កេតឃើញមាន រថយន្ត០១គ្រឿង ម៉ាកហ៊ីយិនដាយ ពណ៌ស ពាក់ស្លាកលេខ បាត់ដំបង 3A- 1819 អ្នកបើកបរមិនស្គាល់សាវតារ បានបើកបរពីជើងទៅត្បូងដឹកទឹកកកអនាម័យយ៉ាងពេញតែម្តង។
ប្រភពដដែលបានបន្តថា លុះមកដល់ចំណុចខាងលើ ក៏បានផ្ទុះកង់ម្ខាង ស្របពេលដែលរថយន្តនោះមានល្បឿនលឿនផងនោះ បានរេចង្កូតទៅបុកនឹងម៉ូតូ០១គ្រឿង ម៉ាកហុងដាធុន C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ បាត់ដំបង 1AB- 9273 ដែលកំពុងបើកបរមកពីមុខ បណ្ដាលឲ្យស្ត្រីដែលជាអ្នកបើកបរម៉ូតូបែកក្បាលស្លាប់ភ្លាមៗតែម្ដង ដោយឡែកអ្នកបើកបររថយន្តក៏បានរត់គេចខ្លួនបាត់ស្រមោល។
អ្នកភូមិដែលនៅទីនោះបាននិយាយថា ស្ត្រីរងគ្រោះមានឈ្មោះ អោក សុខណាង អាយុ៣១ឆ្នាំ រស់ នៅក្រុមទី០៥ ភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង មុខរបរដើរលក់នំបញ្ចុកឲ្យម៉ូយរាល់ព្រឹក។
បច្ចុប្បន្ន ក្រោយពេលសមត្ថកិច្ចចុះទៅដល់ ក៏បានប្រគល់សពទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី រីឯរថយន្ត និងម៉ូតូ ក៏ត្រូវបានជំនាញចរាចរណ៍ខេត្តយកទៅរក្សាទុកដើម្បីធ្វើការដោះស្រាយតាមផ្លូវច្បាប់៕
Source: Kampuchea Thmey Daily
0 Comments