ព្រឹក​នេះ សម្ដេច​តេ​ជោ នាយករដ្ឋមន្ត្រី អញ្ជើញ​ដឹកនាំ​គណៈប្រតិភូ​ជាន់ខ្ពស់ ទៅ​ចូលរួម​កិច្ចប្រជុំ កំពូល​អាស៊ាន​លើក​ទី​៣៣ និង​កិច្ចប្រជុំ​កំពូល​ពាក់ព័ន្ធ នៅ​ប្រទេស​សិង្ហ​បុរី​

​ភ្នំពេញ ​៖ ​តប​តាម​ការ​អញ្ជើញ​របស់ លោក លី សៀន​ឡុង (Lee Hsien Loong) នាយករដ្ឋមន្ត្រី​ នៃ​សាធារណរដ្ឋ​សិង្ហ​បុរី​ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​ នៃ​ព្រះរាជាណា​ចក្រ​កម្ពុជា នៅ​វេលា​ម៉ោង​០៨និង​៣០នាទី​ព្រឹក ​ថ្ងៃទី​១៣​វិច្ឆិកា​នេះ​ បាន​អញ្ជើញ​ដឹកនាំ​គណៈប្រតិភូ​ជាន់ខ្ពស់​អញ្ជើញ​ទៅ​ចូលរួម​កិច្ចប្រជុំ កំពូល​អាស៊ាន​លើក​ទី​៣៣ និង កិច្ចប្រជុំ​កំពូល​ពាក់ព័ន្ធ​ដែល​នឹង​ប្រព្រឹត្តទៅ​ក្រោម​មូលបទ​«​ភាព​រឹងមាំ​ និង​នវានុវត្តន៍​របស់​អាស៊ាន​» ពី​ថ្ងៃ​ទី​១៣ ដល់​ថ្ងៃ​ទី​១៥ ខែ​វិច្ឆិកា ឆ្នាំ​២០១៨ នៅ​ប្រទេស​សិង្ហ​បុរី​។​
​
លោក ស្រ៊ី ថាមរុង្គ រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​មាន​ប្រសាសន៍​ប្រាប់​អ្នកសារព័ត៌មាន​នៅ​ព្រលានយន្តហោះ​អន្តរជាតិ​ភ្នំពេញ​មុន​ចេញដំណើរ​ថា សម្ដេច​តេ​ជោ​នាយករដ្ឋមន្ត្រី​រំពឹងថា ​នឹង​អញ្ជើញ​ចូលរួម​ក្នុង​កិច្ចប្រជុំ​កំពូល​ដូចខាងក្រោម ​៖ ​កិច្ចប្រជុំ​កំពូល​អាស៊ាន​លើក​ទី​៣៣/​ការ​ពិសា​អាហារ​ការងារ​ពេល​ល្ងាច​សម្រាប់​ថ្នាក់ដឹកនាំ​អាស៊ាន​។ កិច្ចប្រជុំ​កំពូល​ក្រៅផ្លូវការ​អាស៊ាន​-​អូស្ត្រាលី​អមដោយ​អាហារ​ពេលព្រឹក។ កិច្ចប្រជុំ​កំពូល​អាស៊ាន​-​ចិន​ លើក​ទី​២១។​ កិច្ចប្រជុំ​កំពូល​អាស៊ាន​-​សាធារណរដ្ឋ​កូរ៉េ ​លើក​ទី​២០។ កិច្ចប្រជុំ​កំពូល​អាស៊ាន​-​រុស្ស៊ី លើក​ទី​០៣។​ កិច្ចប្រជុំ​កំពូល​អាស៊ាន​-​ជប៉ុន​ លើក​ទី​២១។ កិច្ចប្រជុំ កំពូល​ក្រៅផ្លូវការ​អាស៊ាន​-​ឥណ្ឌា​អមដោយ​អាហារ​ពេលព្រឹក។ កិច្ចប្រជុំ​កំពូល​អាស៊ាន​-​សហរដ្ឋអាមេរិក​លើក​ទី០​៦។ កិច្ចប្រជុំ​កំពូល​អាស៊ាន​បូក​បី ​លើក​ទី២១​។ កិច្ចប្រជុំ​កំពូល​អាស៊ី​បូព៌ា​លើក​ទី​១៣ (​ពេញអង្គ​)។ កិច្ចប្រជុំ​កំពូល​អាស៊ី​បូព៌ា (​ចង្អៀត​) អម​ដោយ​អាហារ​ថ្ងៃ​ត្រង់​ និង​កិច្ចប្រជុំ​ថ្នាក់ដឹកនាំ ​នៃ​ភាព​ជា​ដៃគូ​សេដ្ឋកិច្ច​ទូលំទូលាយ ​ក្នុង​តំបន់​លើក​ទី​០២។​ ​

អញ្ជើញ​អម​ដំណើរ​សម្ដេច​តេ​ជោ​នាយករដ្ឋមន្ត្រី​រួមមាន ​លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី​ការបរទេស និង សហប្រតិបត្តិការ​អន្តរជាតិ​, លោក ប៉ាន សូរ​ស័ក្តិ រដ្ឋមន្ត្រី​ពាណិជ្ជកម្ម​, លោក​បណ្ឌិត ហង់​ជួន ណា​រ៉ុ​ន រដ្ឋមន្ត្រី​អប់រំ យុវជន និង កីឡា​ព្រមទាំង​ឥស្សរជន​ជាន់ខ្ពស់​ នៃ​រាជរដ្ឋា​ភិបាល​ និង​ថ្នាក់ ដឹកនាំ​ធុរកិច្ច​ នៃ​សភា​ពាណិជ្ជកម្ម​កម្ពុជា​ផង​ដែរ​។​
​ ​
ស្របពេល​កិច្ចប្រជុំ​កំពូល​នេះ​ សម្ដេច​តេ​ជោ​នាយករដ្ឋមន្ត្រី​ ក៏​នឹង​អញ្ជើញ​ចូលរួម​ក្នុង​កិច្ចប្រជុំ ​និង​កម្មវិធី​មួយចំនួន​ផ្សេងទៀត​ដូចជា ​៖ កិច្ចប្រជុំ​ជាមួយ​ក្រុម ប្រឹក្សា​ពិគ្រោះ​យោបល់​ធុរកិច្ច​អាស៊ាន​។ កម្មវិធី​អាហារ​ការងារ​ថ្ងៃត្រង់​រៀបចំ​ដោយ ​លោក លី សៀន​ឡុង សម្រាប់​ថ្នាក់ដឹកនាំ​អាស៊ាន និង ពិធី​លៀង​សាយ ភោជន (Gala Dinner) រៀបចំ​ដោយ​ប្រធាន​កិច្ចប្រជុំ​សម្រាប់​ថ្នាក់ដឹកនាំ​អាស៊ាន​។​

ដោយឡែក​ នៅ​ព្រឹក​ថ្ងៃទី​១៣​វិច្ឆិកា​នេះ​ផងដែរ ​សម្ដេច​តេ​ជោ​ នាយក​រដ្ឋមន្ត្រី​ បាន​ផុស​នៅក្នុង​ផេ​ក​ហ្វេ​ស​បុក​របស់​សម្ដេច​ថា ​៖ « ថ្ងៃនេះ ខ្ញុំ នឹង​ដឹកនាំ​គណៈ​ប្រតិភូ​ ទៅ​ចូលរួម​កិច្ចប្រជុំ​កំពូល​អាស៊ាន​លើក​ទី​៣៣​ និង​កិច្ចប្រជុំ​កំពូល​ពាក់ព័ន្ធ​ផ្សេងៗ​ នៅ​ក្នុង​ប្រទេស​សិង្ហ​បុរី​រយៈពេល​០៣​ថ្ងៃ​ ចាប់ពី​ថ្ងៃ​ទី​១៣​ដល់ ថ្ងៃទី​១៦ ​ខែ​វិច្ឆិកា​ ឆ្នាំ​២០១៨​។ ទោះបី​ខ្ញុំ​ចេញ​បំពេញបេសកកម្ម​នៅក្រៅ​ប្រទេស​ក្ដី ​តែ​ខ្ញុំ​តែងតែ​នឹករលឹក​ដល់​បងប្អូន ​កូនក្មួយ ​គ្រប់​ទីកន្លែង​ទាំងអស់​។ សូម​ជូនពរ​បងប្អូន​ជនរួមជាតិ មាន​សុខ​ភាព​ល្អ និង សុភមង្គល​គ្រប់​ក្រុម គ្រួសារ​កុំបី​ខាន​»​។​
​
ក្នុងអំឡុងពេល​ស្នាក់នៅ​ប្រទេស​សិង្ហ​បុរី​ សម្ដេច​តេ​ជោ​ នាយករដ្ឋមន្ត្រី​ នឹង​មាន​ជំនួប​ទ្វេភាគី​ជាមួយ​ប្រមុខ​គណៈប្រតិភូ​ នៃ​ប្រទេស​មួយ​ចំនួន​ផង​ដែរ​។ បើ​តាម​ លោក ស្រ៊ី ថាមរុង្គ សម្ដេច​តេ​ជោ​នាយករដ្ឋមន្ត្រី​ នឹង​អញ្ជើញ​មាតុភូមិនិវត្តន៍​មកដល់​រាជធានី​ភ្នំពេញ​វិញ​ នៅ​ម៉ោង​១១​និង​០០​នាទី ថ្ងៃ​ទី ១៦​វិច្ឆិកា៕

 



Source: Kampuchea Thmey Daily