កំពង់ស្ពឺ ៖ ថៅកែដេប៉ូលក់ឈើ យ៉ុង ផាត់ ដែលអ្នកណាៗក៏ស្គាល់ និងល្បីល្បាញខាងញៀនល្បែងជល់មាន់ និងអាប៉ោង ដោយអាងឥទ្ធិពល និងអំណាចទឹកប្រាក់ពេលលេងល្បែងជល់មាន់ចាញ់គូប្រកួតជាង២.០០០ដុល្លារ មិនឲ្យលុយ ពេលគេតាមទារផ្ទុះកំហឹងបានទូរស័ព្ទហៅកូនប្រុស និងកម្មកររបស់ខ្លួនប្រដាប់ដោយដំបងឈើ និងកាំបិតផ្គាក់កាប់លើគូទំនាស់ស្ទើរដាច់ប្រអប់ដៃ។
ករណីផ្ទុះអំពើហិង្សាដោយចេតនារវាងអ្នកញៀននឹងល្បែងស៊ីសង (ជល់មាន់) កើតឡើងនៅវេលាម៉ោង០៥និង១០នាទីល្ងាច ថ្ងៃទី១០ ខែវិច្ឆិកា ឆ្នាំ២០១៨នេះ ត្រង់សង្វៀនជល់មាន់ ក្នុងភូមិព្រៃពង្រ ឃុំរកាកោះ ស្រុកគងពិសី ខេត្តកំពង់ស្ពឺ។
មន្ត្រីនគរបាលស្រុកគងពិសី បានឲ្យដឹងថា ជម្លោះពាក្យសម្ដីរឿងលុយលេងល្បែងឈ្នះចាញ់រហូតផ្ទុះអំពើហិង្សាវាយកាប់ចាក់គ្នានេះ ផ្តើមឡើងរវាងជនរងគ្រោះ និងជនបង្កឈ្លោះគ្នារឿងលុយលេងល្បែងចាញ់មិនឲ្យ។
នគរបាលប្រាប់ថា ជនរងគ្រោះមានឈ្មោះ ប៊ុន សីហាក់ ភេទប្រុស អាយុ២៦ឆ្នាំ រស់នៅភូមិបឹង ឃុំរកា ស្រកកណ្ដាលស្ទឹង ខេត្តកណ្តាល បានយកមាន់មកជល់ជាមួយជាមួយឈ្មោះ យ៉ុង ផាត់ ភេទប្រុស អាយុ ៥២ឆ្នាំ ជាថៅកែដេប៉ូលក់ ទិញឈើ ស្នាក់នៅភូមិព្រៃពង្រ ឃុំរកាកោះ ស្រុកគងពិសី។
ប្រភពបន្តទៀតថា ការជល់មាន់នោះ គឺដាក់ដើមថាន់ ក្នុងវង់៣០០ដុល្លារ និងចាក់ភ្នាល់គ្នាខាងក្រៅ ២.០០០ដុល្លារថែមទៀត។
ប្រភពបន្តទៀតថា ការប្រយុទ្ធគ្នារវាងបក្សីទាំងពីរ ស្រាប់តែមាន់របស់ថៅកែឈើ ឈ្មោះ យ៉ុង ផាត់ បានចាញ់ ហើយឲ្យកូនប្រុសខ្លួនមានឈ្មោះ ផាត់ វើយ បីមាន់យកទៅផ្ទះបាត់ ថែមទាំងមិនឲ្យលុយចាញ់ទៀតផង។
ថៅកែដេប៉ូឈើដែលញៀនល្បែងរាល់ថ្ងៃ លេងចាញ់គេហើយ មិនឲ្យលុយ ទើបជនរងគ្រោះតាមទារលុយ ស្រាប់តែលោក យ៉ុង ផាត់ បានទូរស័ព្ទហៅកូនប្រុសដែលបីមាន់ទៅផ្ទះនោះឲ្យមកវិញ ព្រមទាំងឲ្យកូនហៅកម្មករ ឈ្មោះ ហុង ហ៊ួត ភេទប្រុស អាយុ២៦ឆ្នាំ រស់នៅភូមិអង្គមេត្រី ឃុំរលាំងគ្រើល ស្រុកសំរោងទង យកទាំងកាំបិតផ្គាក់ និងដំបងមកព្រួតគ្នាវាយទៅជនរងគ្រោះបណ្ដាលឲ្យរងរបួសប្រអប់ដៃឆ្វេងចេញឆ្អឹងស្ទើរដាច់ ភ្លាមៗនោះអ្នកលេងជាមួយបានជួយឃាត់ និងដឹកជនរងគ្រោះគេចចេញ ព្រមទាំងយកទៅសង្គ្រោះនៅឯមន្ទីរពេទ្យផងដែរ។
សាក្សីបានបញ្ជាក់ថា ជនសង្ស័យទាំង០៣នាក់ ក្រោយពីបង្កហេតុបានរត់គេចខ្លួនបាត់។ ពាក់ព័ន្ធបញ្ហាខាងលើ អ្នកយកព័ត៌មានមិនសុំការបកស្រាយពីថៅកែដេប៉ូលក់ឈើ យ៉ុង ផាត់ បានឡើយ។
បច្ចុប្បន្ន មន្ត្រីនគរបាលជំនាញស្រុកគងពិសី សហការជាមួយនគរបាលប៉ុស្តិ៍បន្តស្រាវជ្រាវ និងតាមចាប់ក្រុមជនសង្ស័យយកមកផ្ដន្ទាទោសតាមច្បាប់៕
Source: Kampuchea Thmey Daily
0 Comments