ភ្នំពេញ ៖ នៅសល់មិនដល់មួយសប្តាហ៍ទៀតទេព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ២០១៨ នឹងឈាមមកដល់ហើយ ពោលគឺថ្ងៃទី២១-២២ និងថ្ងៃទី២៣ វិច្ឆិកានេះ ហើយក្នុងរយៈពេលប៉ុន្មានសប្តាហ៍កន្លងមកនេះ បន្ទាប់ពីមានការណែនាំពីរដ្ឋបាលរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញបានយកចិត្តទុកដាក់ ក្នុងផែនការតុបតែងកែលម្អរ តាមសួនច្បារ ដងផ្លូវ និងទីសាធារណៈនានា ក្នុងរាជធានីភ្នំពេញ ដើម្បីអបអរសាទរព្រះរាជពិធីបុណ្យនេះយ៉ាងមមាញឹកផងដែរ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ក្នុងរយៈពេលកន្លងមកនេះ រដ្ឋបាលរាជធានីភ្នំពេញ បាននឹងកំពុងដំណើរការជួសជុលកែលំអតាមសួនច្បារ និងទីសាធារណៈផ្សេងៗ ឲ្យមានសោភ័ណ្ឌភាពជាពិសេសនៅតាមតំបន់ដែលត្រូវរៀបចំព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកនាពេលខាងមុខ។
លោកបានបន្តថា មន្ត្រីជំនាញគ្រប់ផ្នែក ក្រោមឱវាទរដ្ឋបាលរាជធានីភ្នំពេញ បាននឹងកំពុងមមាញឹកជាខ្លាំងក្នុងផែនការតុបតែងកែលម្អ មានដូចជា ផ្នែកភ្លើងបំភ្លឺសាធារណៈត្រូវបានជំរុញការផ្លាស់ប្តូរអំពូលភ្លើង និងដំឡើងអំពូលភ្លើងចម្រុះពណ៌ នៅតាមដើមឈើ សួនច្បារ តាមដងផ្លូវ ជាពិសេសនៅតំបន់ប្រារព្ធពិធីអុំទូកតែម្តង។ ផ្នែកសួនច្បារ បានលាបកំបោរតាមគល់ឈើ លាបថ្នាំតាមការ៉ូឡា និងប័រឌារតាមចិញ្ចើមសួនច្បារ និងដាក់ពង្រាយបង្គន់អនាម័យជិត៦០០បង្គន់ ដើម្បីត្រៀមទទួលស្វាគមន៍ប្រជាពលរដ្ឋចូលរួមព្រះរាជពិធីបុណ្យអុំទូក ក្នុងនាមជាម្ចាស់ផ្ទះផងដែរ។
លោកសាំ ពិសិដ្ឋ បានបន្តថា រដ្ឋបាលរាជធានីភ្នំពេញ បាន និងកំពុងដំឡើងរបារកាត់ទទឹងផ្លូវ អបអរសាទរបុណ្យអុំទូក ដែលត្រូវដាក់ចំនួន៤ទីតាំង គឺទី១.ដាក់នៅមហាវិថីព្រះនរោត្តមខាងជើងជាប់រង្វង់មូលវិមានឯករាជ្យ ទី២.ដាក់មហាវិថីព្រះនរោត្តមមុខនាឡិការមណីយដ្ឋានវត្តភ្នំ ទី៣.ដាក់នៅវិថីព្រះស៊ីសុវត្ថិមុខព្រះគន្លង់ និងទី៤.ដាក់នៅមហាវិថីព្រះសីហនុខាងលិចរង្វង់មូលសម្តេចសង្ឃ ជួន ណាត ។
លោក បន្តថា ការងារទាំងនេះ នឹងរួចរាល់នៅមុនថ្ងៃទី១៨ខែវិច្ឆិកានេះ ក្នុងគោលបំណង ដើម្បីលើកកំពស់សោភ័ណ្ឌភាពរាជធានីភ្នំពេញឲ្យកាន់តែល្អប្រសើរឡើង។
ចំណែកមន្ត្រី រដ្ឋបាលរាជធានីភ្នំពេញ ទទួលបន្ទុកតុបតែង និងចងទង់ជាតិ ឬទង់ជ្វាលា បានឲ្យដឹងថា ដោយមានការណែនាំពីលោក ឃួង ស្រេង អភិបាលរាជធានីភ្នំពេញ ក្រុមការងារ បានដាក់បង្គោល និងទង់ជាតិ ទង់សាសនា និងទង់ព្រះមហាក្សត្រធំៗ នៅមាត់ទន្លេមុខព្រះបរមរាជវាំង មានចំនួន៧៥។
លោក បញ្ជាក់ថា ទង់ជាតិ ទង់សាសនា និងទង់ព្រះមហាក្សត្រ ដែលដាក់សម្រាប់ថ្ងៃអុំទូកនេះ គឺថ្ងៃធម្មតា ដាក់ទង់ជាតិតំណាងប្រទេស និងទង់បណ្តាអង្គការសហប្រជាជាតិនានា នៅតាមមាត់ទន្លេមុខព្រះបរមរាជវាំង ប៉ុន្តែសម្រាប់ថ្ងៃបុណ្យអុំទូកត្រូវបានទង់ជាតិ ទង់សាសនា និងទង់ព្រះមហាក្សត្រវិញ។
សូមបញ្ជាក់ថា សម្រាប់ព្រះរាជពិធីបុណ្យអុំទូកឆ្នាំ២០១៨នេះ អាជ្ញាធរភ្នំពេញ បានសន្និដ្ឋានថា នឹងមានប្រជាពលរដ្ឋចូលរួមទស្សនាកាន់តែកើនឡើងជាងឆ្នាំមុនៗ ពីព្រោះប្រទេសជាតិមានសុខសន្តិភាពពេញលេញ ម្យ៉ាងប្រព័ន្ធគមនាគមន៍ផ្លូវថ្នល់ត្រូវបានតភ្ជាប់ប្រទាក់ក្រឡាគ្នាខ្វាត់ខ្វែង ដែលផ្តល់លក្ខណងាយស្រួលក្នុងការធ្វើដំណើររបស់ប្រជាពលរដ្ឋ៕
Source: Kampuchea Thmey Daily
0 Comments