ខ្សែប្រយុទ្ធ រ៉ឹម ប៊ុនហៀង ដែលជាប្រធានក្រុមប្រចាំក្លិបក្រសួងការពារជាតិ និងជាសមាជិកក្នុងក្រុមជម្រើសជាតិកម្ពុជា កំពុងតែស្ថិតនៅក្នុងការតាមប្រមាញ់ពីភ្នាក់ងារទិញដូរកីឡាករនៅលីគម៉ាឡេស៊ី ខណៈរូបគេកំពុងតែជាប្រធានបទរបស់មហាជនក្រោមបង្ហាញខ្លួនមិនសូវបានល្អក្នុងតំបន់ប្រយុទ្ធពេលជួយក្រុមកម្ពុជា ប្រកួតបើកឆាកក្នុងពានរង្វាន់ AFF Suzuki Cup 2018 ថ្មីៗនេះ។
លោក ខូវ ឆាយ អ្នកចាត់ការទូទៅរបស់ក្រុមក្រសួងការពារជាតិ បានលើកឡើងថា មានភ្នាក់ងារដោះដូរកីឡាករនៅលីគម៉ាឡេស៊ី សម្លឹងឃើញសមត្ថភាពកីឡាករ រ៉ឹម ប៊ុនហៀង ហើយបានសួរនាំរឿងជាច្រើនពីកីឡាកររូបនេះក្នុងការនាំយកទៅប្រកបអាជីពនៅក្រៅប្រទេស។ តែយ៉ាងណាអ្វីៗស្ថិតនៅដំណាក់កាលចរចាគ្នាសិននៅឡើយ ខណៈកីឡាកររូបនេះជាអ្នករកគ្រាប់បាល់បញ្ចូលទីឲ្យក្រសួងការពារជាតិ នាពេលកន្លងទៅទាំងក្នុងពានរង្វាន់លីគកំពូលកម្ពុជា និងពានរង្វាន់បាល់ទាត់សម្តេចតេជោ ហ៊ុន សែន។
ថ្មីៗនេះក្នុងប្រកួតបើកឆាកពានរង្វាន់ AFF Suzuki Cup 2018 កីឡាករ រ៉ឹម ប៊ុនហៀង ត្រូវបានមហាជនរិះគន់រឿងបញ្ចប់ទីមិនច្បាស់ឲ្យក្រុមជម្រើសជាតិកម្ពុជា ក្នុងជំនួបបរាជ័យ១ទល់០ ក្រោមថ្វីជើងក្រុមភ្ញៀវម៉ាឡេស៊ី។ យ៉ាងណាក្តីមានមហាជនខ្លះបានកាន់ជើងកីឡាកររូបនេះផងដែរ បើប្រៀបធៀបនឹងកីឡាករទាំង១១នាក់ដែលលេងនៅលើទីលាន។ ប៉ុន្តែបើក្រឡេកមើលក្នុងប្រកួតមិត្តភាពអន្តរជាតិជាមួយក្រុមទីម័រខាងកើត កាលពីខែតុលា កន្លងទៅកីឡាករ រ៉ឹម ប៊ុនហៀង បានរកគ្រាប់បាល់បញ្ចូលទីឲ្យក្រុមកម្ពុជា តាមបានស្មើគ្នា២ទល់២ ផងដែរ។
កីឡាករកម្ពស់១,៧៨ម៉ែត្ររូបនេះ ធ្លាប់ជាសមាជិកក្លិបបៀលប្រាយយូណាយធីត រហូតដល់ឆ្នាំ២០១៨ ដល់បច្ចុប្បន្នរូបគេបានផ្ទេរមកចូលរួមជាមួយក្រុមក្រសួងការពារជាតិ។ ម្ចាស់អាវលេខ១២ប្រចាំក្រុមធ្លាប់បានកោះហៅឲ្យចូលក្នុងក្រុមជម្រើសជាតិកម្ពុជា តាំងពីឆ្នាំ២០១២ មកម្ល៉េះគឺជំនាន់លោក Lee Tae Hoon នៅជាគ្រូបង្វឹក។ រូបគេធ្លាប់បានជួយក្រុមឈ្នះជើងឯកពានរង្វាន់សម្តេចតេជោ ហ៊ុន សែន ចំនួន២លើកគឺនៅឆ្នាំ២០១៦ និង២០១៨ ផងដែរ៕
Source: Kampuchea Thmey Daily
0 Comments