ក្លិបបាល់ទាត់ព្រះខ័នរាជស្វាយរៀង សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានប្រកាសបន្តកិច្ចសន្យាជាមួយកីឡាករឆ្នើមសំខាន់ៗ ដូចជាសឿយ វិសាល, នេន សុធារដ្ឋ, សារ៉េត គ្រីយ៉ា និងប្រាក់ មុន្នីឧត្តម ដើម្បីត្រៀមយុទ្ធនាការប្រកួតក្នុងរដូវកាលឆ្នាំ២០១៩ខាងមុខ។
ក្លិបបានបញ្ជាក់ពីកិច្ចសន្យាកីឡាករឆ្នើមទាំង៤នៅល្ងាចថ្ងៃព្រហស្បតិ៍ សប្ដាហ៍នេះ ខណៈអ្នកទាំង៤កំពុងតែជាប់បេសកកម្មជាមួយក្រុមជម្រើសជាតិកម្ពុជា នៅឡើយក្នុងយុទ្ធនាការប្រកួតវគ្គជម្រុះតាមពូលនៃពានរង្វាន់ធំប្រចាំតំបន់អាស៊ាន AFF Suzuki Cup 2018។ យ៉ាងណាក្តីពួកគេទាំងអស់គ្នានឹងត្រឡប់មកជួយក្លិបវិញនៅពេលផុតបេសកកម្មនេះ ពោលគឺមុនរដូវកាលឆ្នាំ២០១៩ មកដល់។
យ៉ាងណាក្តីនៅសប្ដាហ៍នេះ ក្លិបព្រះខ័នរាជស្វាយរៀង ក៏បានប្រកាសបន្តកិច្ចសន្យាជាមួយកីឡាករឆ្នើម៣នាក់រួចរាល់ហើយដែរ ដោយក្នុងនោះមានខ្សែប្រយុទ្ធ ណុប តុលា ខ្សែបម្រើកណ្តាល ជា សំណាង និងអ្នកចាំទី អាំ សុវណ្ណារ៉ាត់។ នេះជាការរៀបចំក្រុមដំបូងរបស់លោក Conor Nestor ដែលជាគ្រូបង្វឹក ដើម្បីត្រៀមការងារក្នុងឆ្នាំ២០១៩ ខណៈលោកក៏បានបញ្ចប់កិច្ចសន្យាជាមួយកីឡាករមួយចំនួននិងរកកីឡាករថ្មីបន្ថែមផងដែរ។
សូមរំលឹកថា ក្រុមព្រះខ័នរាជស្វាយរៀង ដែលដឹកនាំដោយលោក Conor Nestor ទទួលចំណាត់ថ្នាក់មិនសូវបានល្អនោះទេប្រចាំរដូវកាល២០១៨ កន្លងទៅទាំងក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន បើធៀបនឹងលទ្ធផលតាមឆ្នាំកន្លងមក។ ចំពោះលីគកំពូលកម្ពុជា វិញក្រោយប្រកួតបាន២២លើក ឈ្នះបាន១០លើក ហើយស្មើគ្នាបាន៣លើក និងបរាជ័យរហូតដល់៩លើក ឈរចំណាត់ថ្នាក់លេខ៦បណ្តោះអាសន្នក្នុងចំណោមក្លិបជាសមាជិកទាំង១២។ ចំណែកពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ត្រឹមវគ្គ៨ក្រុមចុងក្រោយបន្ទាប់ពីចាញ់អង្គរថាយហ្គឺរ៕
Source: Kampuchea Thmey Daily
0 Comments