ក្រុមបាល់ទាត់ម្ចាស់ជើងឯកពានរង្វាន់សម្តេចតេជោ ហ៊ុន សែន រដូវកាលឆ្នាំ ២០១៨ គឺក្រុមក្រសួងការពារជាតិ (ទ័ព) ត្រូវប្រកួតក្នុងវគ្គផ្តាច់ព្រ័ត្រ ប្រចាំពានរង្វាន់អន្តរជាតិ 2018 China-ASEAN Cities Football Tournament នៅខេត្ត Nanning ប្រទេសចិន ស្របពេលដែលគ្រូបង្វឹកនិងក្រុមកីឡាករទាំងអស់មិនអាចចូលក្នុងកម្មវិធី«ពានរង្វាន់បាល់ទាត់កម្ពុជា» ឬ Cambodian Football Award លើកទី២ ប្រចាំរដូវកាល២០១៨។
លោក ភា សុភ័ត្រា ដែលជាគ្រូបង្វឹកត្រូវបានគណៈកម្មការប្រកួតបាល់ទាត់ជាតិកម្ពុជា (CNCC) អញ្ជើញឲ្យចូលរួមទទួលពានរង្វាន់គ្រូបង្វឹកឆ្នើមប្រចាំរដូវកាលឆ្នាំ២០១៨ ក្នុងកម្មវិធី«ពានរង្វាន់បាល់ទាត់កម្ពុជា» ដែលធ្វើឡើងនៅល្ងាចថ្ងៃសុក្រ ទី១៦ ខែវិច្ឆិកា ឆ្នាំ២០១៨ នេះនៅមជ្ឈមណ្ឌល The Premier Centre Sen Sok ក្នុងរាជធានីភ្នំពេញ។ ប៉ុន្តែលោកបានបដិសេធនៅលើគណនីហ្វេសប៊ុករបស់លោកថា លោកក៏ដូចជាក្លិបទាំងមូលសូមគាំទ្រកម្មវិធីនេះពីចំងាយព្រោះថាសមាជិកក្លិបទាំងអស់កំពុងតែនៅក្នុងប្រទេសចិន ហើយមានភារកិច្ចប្រកួតវគ្គផ្តាច់ព្រ័ត្រទៀតផង។
តែយ៉ាងណាលោកថា ពានរង្វាន់ឯកត្តកជននេះជាក្តីស្រមៃមួយដែលលោកចង់ចាប់តាំងពីពេលដែលលោកកាន់តំណែងជាគ្រូបង្វឹកមកម្ល៉េះ។
ចំពោះពានរង្វាន់ 2018 China-ASEAN Cities Football Tournament មានក្រុមចំនួន៤ចូលរួមដោយក្នុងនោះមានក្រុម២មកពីថៃគឺ Police Tero Sasana និងក្រុមសាកលវិទ្យាល័យ BTU FC បូករួមទាំងក្លិប Than Quang Ninh របស់វៀតណាមនិងក្រុមក្រសួងការពារជាតិ របស់កម្ពុជា។ ការប្រកួតធ្វើឡើងពីថ្ងៃទី១៤ ដល់១៧ ខែវិច្ឆិកា ឆ្នាំ២០១៨។ ដូច្នេះក្រុមដែលទទួលបានជ័យជម្នះនៅវគ្គជម្រុះបឋមគឺ Than Quảng Ninh FC និងក្រុមក្រសួងការពារជាតិ នឹងត្រូវឡើងទៅលេងនៅវគ្គផ្ដាច់ព្រ័ត្រ នៅវេលាម៉ោង៦និង៣០នាទីល្ងាច ថ្ងៃសៅរ៍ ទី១៧ ខែវិច្ឆិកា ឆ្នាំ២០១៨ ចុងសប្ដាហ៍នេះ។
ក្រុមក្រសួងការពារជាតិ របស់កម្ពុជា ដឹកនាំដោយលោក ខូវ ឆាយ ជាអគ្គលេខាធិការក្លិប លោក ទេព ឡុងរចនា ជាអ្នកចាត់ការទូទៅក្លិបលោក ភា សុភត្រា ជាគ្រូបង្វឹកលោក អ៊ុំ សាវង្ស, ហោ សុខហេង,ឡុង សុធារ៉ា និង លេង ណាវីន ជាជំនួយការគ្រូបង្វឹក។ ចំណែកកីឡាករមាន សំរឹទ្ធ សីហា, គឹម ស៊ីម៉េង, ខែក ខេមរិន្ទ, រឿម ចាន់រឿន, ម៉ាត់ សាត់យ៉ា,អ៊ែល ធីហឿត, អ៊ុព កាម៉ុល, ង៉ែត លីទី,សុខ ហៀង,ភួង សុខសាណា, ជា ណាវីន, កាន់ ពិសាល, ទូច រ៉ូម៉ា,ណារ៉ុង កក្កដា។ ក្រៅពីនោះកីឡាករបរទេសមាន Yoo Jae Ho ជនជាតិកូរ៉េខាងត្បូង, Yudai Ogawa ជនជាតិជប៉ុន,MOHAMED HAMZA ជនជាតិអេហ្ស៊ីប Na Hyosung ជនជាតិកូរ៉េខាងត្បូង៕
Source: Kampuchea Thmey Daily
0 Comments