ភាគី​កម្ពុជា ប្រកាស​លក់​សំបុត្រ​សម្រាប់​មហាជន​ចូល​ទស្សនា​ក្នុង​ប្រកួត​ជាមួយ​ឡាវ ក្នុង​វគ្គ​ជម្រុះ​ពាន AFF Suzuki Cup

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានប្រកាស​ដាក់លក់​សំបុត្រ ចាប់ពី​ថ្ងៃ​សុក្រ សប្ដាហ៍​នេះ​តទៅ​ហើយ សម្រាប់​មហាជន​ចូល​ទស្សនា​ក្នុង​ប្រកួត​វគ្គ​ជម្រុះ​តាម​ពូ​ល​នៃ​ពានរង្វាន់​បាល់ទាត់​ធំ​ប្រចាំ​តំបន់​អាស៊ាន AFF Suzuki Cup 2018 ពេល​ជម្រើសជាតិ​កម្ពុជា ទទួល​ក្រុម​ជម្រើសជាតិ​ឡាវ នៅ​ដើម​សប្ដាហ៍​ក្រោយ​។



នៅលើ​ហ្វេ​ស​ប៊ុ​ក​របស់​សហព័ន្ធ​កីឡាបាល់ទាត់​កម្ពុជា បាន​បញ្ជាក់ថា ​សំបុត្រ​នេះ​មាន​លក់​នៅ​ពហុ​កីឡដ្ឋាន​ជាតិ និង​តាមរយៈ​កម្មវិធី PiPay ចាប់ពី​ម៉ោង ៩ ព្រឹក​ដល់​ម៉ោង ៦ ល្ងាច​នៅ​រៀងរាល់ថ្ងៃ​នៅ​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ មុន​ការប្រកួត​មករ​វាង​ក្រុម​កម្ពុជា ជាមួយ​ឡាវ ក្នុង​ពូ​ល A នៃ​ពានរង្វាន់ AFF Suzuki Cup នៅវេលា​ម៉ោង​៦និង៣០​នាទី​ល្ងាច​ថ្ងៃទី​២០ ខែវិច្ឆិកា ឆ្នាំ២០១៨ ខាងមុខ​។



ចំណែក​តម្លៃ​សំបុត្រ ក៏​មិន​ខុសពី​ពេល​កម្ពុជា បើកទ្វារ​ផ្ទះ​ទទួល​ក្រុម​ម៉ាឡេស៊ី នោះ​ទេ​គឺ​បែង​ចែក​ជា​២​ប្រភេទ​គឺ​ប្រភេទ ថ្លៃ​១២,០០០៛ សម្រាប់​អ្នក​អង្គុយ​នៅ​ផ្នែក​វេទិកា និង​ប្រភេទ ទី​២​ថ្លៃ ៦,០០០៛ សម្រាប់​អ្នក​អង្គុយ​នៅ​បរិវេណ​អត់​មាន​ដំបូល​នៃ​កីឡដ្ឋាន​។ សម្រាប់​ព័ត៌មាន​បន្ថែម​សូម​ទាក់ទង​ក្នុង​ម៉ោង​ធ្វើការ​ទៅកាន់​លេខ​០៧១ ៤៨ ៦៩ ៤៧៥ ឬ ០១៥ ៤៤ ៧៦ ៨០​។

ពានរង្វាន់ AFF Suzuki Cup 2018 ឆ្នាំនេះ​ពូ​ល A មាន​វៀតណាម ម៉ាឡេស៊ី មី​យ៉ាន់​ម៉ា កម្ពុជា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​បឋម​គឺ​ទី​ម័​រ​ខាងកើត​។ ក្រុម​ដែល​ឈ្នះ​នឹង​ឡើង​ទៅ​លេង​វគ្គ​ពាក់កណ្ដាល​ផ្តាច់ព្រ័ត្រ និង​ផ្តាច់ព្រ័ត្រ​ជា​បន្ត​ដើម្បី​រក​ម្ចាស់​ជើងឯក​ប្រចាំ​សម័យកាល​។ តាម​គម្រោងការ​ប្រកួត​នេះ​នឹង​ធ្វើ​ឡើ​ចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨​។



ក្រុម​កម្ពុជា នៅសល់​២​ប្រកួត​ក្នុង​ដៃ ទៀត​សម្រាប់​វគ្គ​ជម្រុះ​តាម​ពូ​ល​នេះ តែ​មិនទាន់​អស់​ឱកាស​ប្រជែង​កៅអី​ឡើង​ទៅ​វគ្គ​បន្ត​ទោះបីជា​២​ប្រកួត​កន្លងមក​សុទ្ធតែ​បរាជ័យ​ក៏ដោយ​។ ២​ប្រកួត​កន្លងមក​កម្ពុ​ជា បាន​ចាញ់​ម៉ាឡេស៊ី ១​ទល់​០ និង​ចាញ់​មី​យ៉ាន់​ម៉ា ៤​ទល់​១​។ បើ​មើល​តារាង​ចំណាត់ថ្នាក់​ពូ​ល A ម៉ាឡេស៊ី មាន​៦​ពិន្ទុ ហើយ​មី​យ៉ាន់​ម៉ា និង​វៀតណាម មាន​៣​ពិន្ទុ ខណៈ​កម្ពុជា និង​ឡាវ មិនទាន់​មានពិន្ទុ​នោះ​ទេ៕

Source: Kampuchea Thmey Daily