ប្រធានក្រុមឈុតធំរបស់ក្លិបបាល់ទាត់ភ្នំពេញក្រោន អ៊ុក សុធី បានបង្ហាញទស្សនវិជ្ជាមានជាច្រើនក្រោយដំណើរមកដល់របស់លោក Leonardo Vitorino ជនជាតិប្រេស៊ីល នៅកីឡដ្ឋាន RSN Stadium បន្ទាប់ពីបានហ្វឹកហាត់ជាមួយគ្នាមួយរយៈធំមក ដើម្បីត្រៀមយុទ្ធនាការប្រកួតរដូវកាលថ្មីឆ្នាំ២០១៩ ខាងមុខ។
កីឡាករដែលមានរហស្សនាមថា Messi រូបនេះបានលើកឡើងថា « គ្រូបង្វឹកថ្មីរបស់យើងនេះគឺគាត់ដឹងថា ក្រុមរបស់យើងមានការខ្វះខាតនូវកម្លាំង។ ដូច្នេះគាត់ផ្តោតច្រើនលើការហាត់កម្លាំង និងការលេងជាមួយគ្នាឲ្យបានច្រើន។ ខ្ញុំយល់ថា វាជាចំណុចល្អ ដែលគាត់ផ្តោតលើកម្លាំងនេះ ហើយជាដំបូងនេះយើងហត់ពិតមែន។ ប៉ុន្តែខ្ញុំជឿជាក់ថាយើងនឹងមានកម្លាំងល្អនៅពេលដែលយើងប្រកួតនាពេលខាងមុខ»។
កីឡាករ អ៊ុក សុធី គឺជាកីឡាករជើងចាស់មួយរូបក្នុងក្រុម ដែលបានចូលរួមជាមួយក្លិបតាំងពីខែវិច្ឆិកា ឆ្នាំ២០១១ កន្លងទៅ ព្រមទាំងធ្លាប់បានជួយក្រុមឲ្យបានឈ្នះពានលីគកំពូលកម្ពុជា នាឆ្នាំ២០១៤ ប៉ុន្តែបានអវត្តមាននាឆ្នាំ២០១៥ បន្ទាប់ពីរងរបួសក្នុងពេលហ្វឹកហាត់ជាមួយក្រុមជម្រើសជាតិរួចមក។ សូមបញ្ជាក់ថា កីឡាកររូបនេះតាំងតែពីពេលដែលគេប្រកបអាជីពបាល់ទាត់ក្នុងក្រុមបាល់ទាត់ម៉ូតូហោះ (ក្រុមមិនអាជីព) និងក្រុមហ្វូតសាលជម្រើសជាតិកម្ពុជា នាអំឡុងពេលយុវវ័យមកម្ល៉េះ។
កាលពីចុងខែតុលា ថ្មីៗនេះនេះក្រុមភ្នំពេញក្រោន បានតែងតាំងក្បាលម៉ាស៊ីន ថ្មីក្រោយជម្រុះថ្នាក់ដឹកនាំចាស់អស់បន្ទាប់ពីចប់រដូវកាលឆ្នាំ២០១៨។ ចំណែកថ្នាក់ដឹកនាំថ្មីរបស់ក្លិបមានដូចជា លោក លី ហៀង ជាអ្នកចាត់ការទូទៅក្លិប ហើយលោក Leonardo Vitorino ជាគ្រូបង្គោលថ្មី ស្របពេលប្អូនប្រុសរបស់ខ្លួន Luis Fernando Vitorino កាន់តំណែងជាគ្រូបង្វឹកអ្នកចាំទីឈុតធំ។ អតីតគ្រូវេស្ទើន លោក ស៊ុំ វណ្ណា បានទទួលតំណែងជាគ្រូជំនួយក្រុមឈុតធំ ខណៈដែលអតីតខ្សែប្រយុទ្ធ កែវ សុខង៉ន ជាអ្នកចាត់ការទូទៅក្រុមឈុតធំ៕
Source: Kampuchea Thmey Daily
0 Comments