បាត់ដំបង ៖ រថយន្តស៊េរីទំនើប០១គ្រឿង ត្រូវបានកម្លាំង ប៉េអិម ( ចល័ត ) ដែលក្រុមនេះតែងតែឆ្វែលគ្រប់ច្រកល្ហក គ្មានគោលដៅ បានឃាត់នៅលើកំណាត់ផ្លូវជាតិលេខ៥ និងបានបញ្ជូនទៅឲ្យក្រុមគយចល័ត ដើម្បីត្រួតពិនិត្យលើឯកសារផងដែរ បន្ទាប់ពីឃាត់ភ្លាមៗ ស្រាប់តែរឿងត្រូវបានបែកធ្លាយ ដោយសារតែមានសារព័ត៌មានតាមថតព្រោងព្រាតរួចមក ព្រោះគេធ្វើឡើងទៅលើរថយន្តណាដែលគេសង្ស័យ។
ការស្ទាក់ឃាត់រថយន្តនេះបានធ្វើឡើងកាលពីវេលាម៉ោង១១និង៣០នាទី ថ្ងៃទី១៦ ខែវិច្ឆិកា ឆ្នាំ២០១៨ តាមបណ្ដោយផ្លូវជាតិលេខ៥ ក្នុងភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង ដែលរថយន្តនោះម៉ាក ព្រូសពណ៌ស ពាក់ស្លាកលេខ ចង្កូតស្ដាំ PS 0439។
តាមប្រភពនៅទីនោះបាននិយាយថា នៅមុនពេលកើតហេតុ គេសង្កេតឃើញមានរថយន្តជាច្រើនគ្រឿង បានប្រដេញស្ទាក់ពីមុខផង និងបិតពីចំហៀងផងទៅលើរថយន្តចង្កូតស្ដាំនោះ ដោយក្រុមរថយន្តនេះ ត្រូវបានគេស្គាល់ថា អ្នកដឹកនាំឈ្មោះ ឡេង ជាសេនាឆ្វេង ស្ដាំ របស់លោកមេបញ្ជាការ និង ឈ្មោះ អ៊ុំ សារ៉េន ជាមេបញ្ជាការរង កងរាជអាវុធហត្ថ ស្រុកបាណន់ ដោយលោកប៉េអិមទាំងនេះ ត្រូវបានប្រភពជាច្រើនស្គាល់ថា ជាប៉េអិម ចល័ត អាចដើរបានគ្រប់ស្រុក ក្នុងខេត្តបាត់ដំបង ដើម្បីស្វែងរកបទល្មើស និងអាចស្វែងរកលាភសក្ការៈផងដែរ។
ភ្លាមៗនេះដែរ បន្ទាប់ពីគេបានឃាត់រថយន្តមួយគ្រឿងនេះរួចមក គេក៏បានទាមទាររកឯកសារ និងសុំពិនិត្យកាតគ្រី ដោយគេបានចោទប្រកាន់ទៅលើរថយន្តនេះថា អាចអត់មានពន្ធត្រឹមត្រូវ ប៉ុន្តែក្រោយពីមានអ្នកសារព័ត៌មានចុះថតព្រោងព្រាតរួចមក ស្រាប់តែលោកប៉េអិមប្រែចិត្តមិនសម្របសម្រួលអ្វីទាំងអស់ គឺគេបានទាក់ទងទៅកម្លាំងគយចល័ត ហុងឡុង ឲ្យយករថយន្តនេះទៅពិនិត្យឯកសារទៅវិញ។
គួរបញ្ជាក់ដែរថា មួយរយៈចុងក្រោយនេះ គេធ្លាប់បានឮព័ត៌មានមួយចំនួនថា មានក្រុមសមត្ថកិច្ចមួយចំនួន បានចុះធ្វើបែបនេះដែរ ដោយមិនបានប្រគល់រថយន្តទៅឲ្យគយទេ គឺគេបានសម្រួលគ្នានៅលើចិញ្ចើមផ្លូវទៅវិញ ប៉ុន្តែលើកនេះ លោកប៉េអិមបែរជាប្រគល់ទៅឲ្យគយ ក្រោយពីបានខំតាមប្រមាញ់ឡើងបែកញើសរួចមក មិនត្រឹមតែប៉ុណ្ណោះទេ គឺរថយន្តនេះត្រូវបានគេឃាត់ម្ដងរួចមកហើយ ស្រាប់តែមិនអស់ចិត្ត គេតាមឃាត់ម្តងទៀត ដែលបញ្ហានេះបានធ្វើឲ្យមជ្ឈដ្ឋានជាច្រើនមានការងឿងឆ្ងល់។
រហូតមកទល់ពេលនេះ យើងមិនទាន់ទទួលបានថា តើរថយន្តព្រូសនេះ ជារថយន្តមិនបានបង់ពន្ធ ឬក៏មានឯកសារគ្រប់គ្រាន់ហើយនោះទេ គេគ្រាន់តែដឹងថា រថយន្តនេះមានស្លាកលេខចង្កូតស្ដាំ និងមានឆៀកត្រឹមត្រូវតែប៉ុណ្ណោះ៕
Source: Kampuchea Thmey Daily
0 Comments