ប្រេសិតអង្គការសហប្រជាជាតិកាលពីថ្ងៃអង្គារ បានធ្វើការរិះគន់ដល់បណ្តាប្រទេសដែលបោះបង់ចោលកតិកាសញ្ញាអន្តោប្រវេសន៍របស់អង្គការសហប្រជាជាតិដោយនិយាយថា ពួកគេកំពុងបង្ហាញការសោកស្តាយក្នុងរយៈពេលជាច្រើនខែបន្ទាប់ពីយល់ព្រមលើកិច្ចព្រមព្រៀងនេះ។
កតិកាសញ្ញាជាសកលសម្រាប់ការធ្វើអន្តោប្រវេសន៍ដោយសុវត្ថិភាព សណ្តាប់ធ្នាប់និងជាប្រចាំត្រូវបានព្រមព្រៀងនៅឯអង្គការសហប្រជាជាតិក្នុងខែកក្កដាបន្ទាប់ពីមានការចរចាររយៈពេល១៨ខែហើយនឹងត្រូវបានអនុម័តជាផ្លូវការនៅឯសន្និសីទមួយក្នុងទីក្រុង Marrakesh នៅថ្ងៃទី ១០និងទី១១ខែធ្នូ។
សហរដ្ឋអាមេរិកបានចាកចេញពីការចរចានេះមុនគេកាលពីដើមខែធ្នូហើយបន្ទាប់មកមានប្រទេសហុងគ្រីដែលធ្វើតាមនេះនៅប្រាំពីរខែក្រោយ។
ចាប់តាំងពីពេលនោះមក ប្រទេសអូស្ត្រាលី អ៊ីស្រាអែល ប៉ូឡូញ ស្លូវ៉ាគី សាធារណរដ្ឋឆេក អូទ្រីស ស្វីសនិងប៊ុលហ្គារីបានបដិសេធទាំងស្រុងនូវកតិកាសញ្ញានេះឬជូនដំណឹងដល់អង្គការសហប្រជាជាតិថា ពួកគេកំពុងដកខ្លួនចេញ។
កិច្ចព្រមព្រៀងដែលលើកកម្ពស់កិច្ចសហប្រតិបត្តិការក្នុងការដោះស្រាយជាមួយលំហូរជនអន្តោប្រវេសន៍ដែលកំពុងកើនឡើងនៅលើពិភពលោកមួយនេះគឺត្រូវបានកំណត់គោលដៅដោយក្រុមអ្នកនយោបាយស្តាំនិយមដែលបានប្រកាសថ្កោលទោសថា វាជាការប្រមាថដល់អធិបតេយ្យភាពជាតិរបស់ប្រទេសខ្លួន។
លោកស្រី Louise Arbor ប្រេសិតពិសេសរបស់អង្គការសហប្រជាជាតិសម្រាប់ការធ្វើចំណាកស្រុកអន្ដរជាតិបាននិយាយថា “អ្នកនយោបាយខ្លះនឹងនិយាយថា រឿងរ៉ាវដូចជាការធ្វើចំណាកស្រុកគឺជារឿងអាក្រក់។ ពិតជាគួរឲ្យអស់សំណើចណាស់ ការធ្វើចំណាកស្រុកគឺជារឿងមួយ។ វាមិនមែនជារឿងអាក្រក់ឬមិនមែនជារឿងល្អទេ។ វាជារឿងមួយដែលប៉ះពាល់ដល់យើង”។
លោកស្រី Arbor ដែលជាអតីតចៅក្រមតុលាការកំពូលនៃប្រទេសកាណាដានិងជាអតីតប្រធានផ្នែកសិទ្ធិមនុស្សរបស់អង្គការសហប្រជាជាតិបាននិយាយថា ប្រទេសដែលចាកចេញពីកតិកាសញ្ញានេះកំពុងតែដោះស្រាយជាមួយវិប្បដិសារីបន្ទាប់ពីបានចូលរួមក្នុងកិច្ចចរចារយៈពេលវែងនិងយល់ព្រមទៅនឹងអត្ថបទចុងក្រោយ។
កតិកាសញ្ញាពិភពលោកនេះបានកំណត់គោលដៅចំនួន២៣ចំណុចដើម្បីបើកចំហចំពោះការធ្វើចំណាកស្រុកដោយស្របច្បាប់និងគ្រប់គ្រងលំហូរឲ្យកាន់តែល្អប្រសើស្របពេលចំនួនប្រជាជនដែលធ្វើដំណើរទូទាំងពិភពលោកបានកើនឡើងដល់២៥លាននាក់ឬប្រហែលជាង៣ភាគរយនៃចំនួនប្រជាជនពិភពលោក៕ AFP
Source: Kampuchea Thmey Daily
0 Comments