បន្ទាយមានជ័យ ៖ នគរបាលក្រុងប៉ោយប៉ែត បានស្រាវជ្រាវចាប់បានក្មេងទំនើងដែលប្រើដាវសាំម៉ូរ៉ៃកាប់យ៉ាងសាហាវលើជនរងគ្រោះបណ្តាលឲ្យរងរបួសធ្ងន់ កាលពីថ្ងៃទី២៦វិច្ឆិកា នៅវេលាយប់ម៉ោង១០និង១០នាទី ត្រងចំណុចផ្លូវដើមពុទ្រា ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ជនសង្ស័យទាំងបីនាក់ ត្រូវបានធ្វើការស៊ើបអង្កេតស្រាវជ្រាវ វនិងឈានដល់ការបង្ក្រាប ចាប់ឃាត់ខ្លួនបាននៅព្រឹកថ្ងៃទី២៧ ខែវិច្ឆិកា ឆ្នាំ២០១៨ បន្ទាប់ពីពួកគេរត់គេចខ្លួនបានមួយយប់។
លោកវរសេនីយ៍ឯក ធិន ស៊ិនដេត អធិការនគរបាល ក្រុងប៉ោយប៉ែត បានឲ្យដឹងថា វេលាយប់ម៉ោង១០និង១០នាទី ថ្ងៃទី២៦ ខែវិច្ឆិកា ឆ្នាំ២០១៨ នៅចំណុចផ្លូវដើមពុទ្រា ភូមិក្បាលស្ពាន១ មានករណីអំពើហិង្សាមួយកើតឡើង បង្កដោយក្រុមក្មេងទំនើងចំនួន៣នាក់ បានធ្វើសកម្មភាពប្រើប្រាស់កាំបិត កាប់ទៅលើ ឈ្មោះ គឹម ស្រេង អាយុ៤៣ឆ្នាំភេទប្រុស ជនជាតិខ្មែរ មុខរបររត់ម៉ូតូឌុប រស់នៅភូមិគីឡូ ម៉ែត្រ លេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បណ្ដាលឲ្យរងរបួសជើងខាងឆ្វេង ធ្ងន់។ ក្រោយពីកើតហេតុ កម្លាំងនគរបាលបានចុះទៅដល់កន្លែងកើតហេតុ តែត្រូវក្រុមជនល្មើសជិះម៉ូតូរត់គេចខ្លួនអស់។
ដោយមានបទបញ្ជាពីលោកឧត្ដមសេនីយ៍ទោ អាត់ ខែម ស្នងការនគរបាលខេត្ត បន្ទាយមានជ័យលោកបានដឹកនាំកម្លាំងនគរបាលជំនាញ ចុះស្រាវជ្រាវបន្ត រហូតឈានដល់ ការចាប់ឃាត់ខ្លួនបានចំនួន២នាក់ មាន ១-ឈ្មោះ ធី ប៉េងលាង ភេទប្រុស អាយុ១៨ឆ្នាំ ជនជាតិខ្មែរ មុខរបរបិតស្គុតម៉ូតូ មានទីលំនៅភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ (អ្នកបើកម៉ូតូ)។,២-ឈ្មោះ វ៉ាន់ ពិសាល ហៅសា ភេទប្រុស អាយុ១៨ឆ្នាំ ជនជាតិខ្មែរ មុខរបរលក់ទឹកកក មានទីលំនៅភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ (ជនដៃដល់មានកាន់កាំបិត)។,៣- ឈ្មោះ នួន ហួរ ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករលើកត្រី មានទីលំនៅភូមិមិត្តភាព សង្កាត់ ក្រុងប៉ោយប៉ែត ខេត្តបន្ទាយមានជ័យ។(បក្សពួក), ចំណែកបក្ស ពួកគេម្នាក់ទៀត,៤-ឈ្មោះហៀង ហៅបៀង ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករ មានទីលំនៅខេត្តបាត់ដំបង។(រត់គេចខ្លួន )។
លោកអធិការបានបញ្ជាក់ថា មូលហេតុដែលនាំឲ្យក្មេងទំនើងទាំងនេះ កាប់ទៅលើជនរងគ្រោះដោយជនរងគ្រោះ ស្រែកពេលពួកក្មេងទាំងនេះ បម្រុងធ្វើសកម្មភាពរកវាយទៅលើជនជាតិចិន ដោយក្រោយមកក្មេងបង្កទំនាស់បានជិះទៅយកកាំបិត ហើយកាប់ទៅលើជនរងគ្រោះតែម្ដង។
បច្ចុប្បន្ន ជនសង្ស័យ ត្រូវបាន និងកំពុងរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
Source: Kampuchea Thmey Daily
0 Comments