ក្លិបបាល់ទាត់វេស្ទើនភ្នំពេញ សមាជិកពានរង្វាន់លីគកំពូលកម្ពុជា (Metfone Cambodian League) ដែលបញ្ចប់រដូវកាលចាស់ឈរបាតតារាងក្នុងចំណោមក្លិបទាំង១២ បានប្រកាសចាកចេញពីពានរង្វាន់មួយនេះនៅឆ្នាំ២០១៩ ខាងមុខក៏ព្រោះតែក្លិបខ្វះខាតដៃគូសហការជួយជ្រោមជ្រែងផ្នែកថវិកាឲ្យបានល្អប្រសើរ។
លោក តែ ឡូរិន ប្រធានក្លិបវេស្ទើនភ្នំពេញ និងជាថ្នាក់ដឹកនាំសកលវិទ្យាល័យវេស្ទើន បានពន្យល់ពីមូលហេតុតាមរយៈសារព័ត៌មានក្នុងស្រុកនៃការដកខ្លួនចេញពីលីគកំពូលកម្ពុជាថា «សម្រាប់បាល់ទាត់យើងដែលមានទីតាំងនៅជិតនេះ មែនទែនទៅខ្ញុំចំណាយលុយច្រើនពេក ហើយថវិកាអត់មានខាងណាជួយ ខ្ញុំទៅអត់រួច អញ្ចឹង២០១៩នេះខ្ញុំសុំគេផ្អាកបន្តិចសិន ចាំមើលបន្តិចទៀត ក្រែងមានពីណាពីណីមកគេជួយ តែឥឡូវសុំផ្អាកបន្តិចសិន ពីព្រោះអត់មានថវិកាទប់ទល់បាន អញ្ចឹងនេះជាដំណឹងមួយជម្រាបជូនសាធារណជនផងដែរ»។
ថ្នាក់ដឹកនាំក្លិបរូបនេះ ពិតជាសោកស្តាយដែលក្លិបរបស់ខ្លួនមានវត្តមានច្រើនឆ្នាំក្នុងក្នុងពិភពបាល់ទាត់កម្ពុជា តែបែរជាត្រូវផ្អាកមួយរយៈទៅវិញ។ យ៉ាងណាក្តីលោកដែលជាក្បាលម៉ាស៊ីន នៅតែចង់បង្កើតក្រុមឡើងវិញក្រោយផ្អាកមួយរយៈនេះ។ លោកតែ ឡូរិន បន្ថែមថា «អាចវិលមកវិញ បើសិនជាក្រុមហ៊ុនណាឧបត្ថម្ភយើង អាចវិលមកវិញ ប៉ុន្តែឥឡូវសុំសម្រាក មិនមែនឈប់ទេ ប៉ុន្តែសុំផ្អាកបន្តិចសិន ដោយសារថវិកា»។
ក្លិបបាល់ទាត់វេស្ទើន កាលពីរដូវកាលមុនដឹកនាំដោយលោក Fisol Lasak ជនជាតិម៉ាឡេស៊ី ខណៈបញ្ចប់រដូវកាលឈរលេខ១២ ក្រោយប្រកួតមិនធ្លាប់ឈ្នះសោះ ហើយស្មើគ្នា១លើក និងចាញ់២១ លើក។ ចំណែកក្នុងពានរង្វាន់សម្តេចតេជោ ហ៊ុន សែន វិញបានចាញ់ក្រុមបឹងកេត នៅវគ្គ១៦ក្រុមចុងក្រោយថ្នាក់ជាតិ ដោយថ្វីជើងក្រុមបឹងកេត ៦ទល់១៕
Source: Kampuchea Thmey Daily
0 Comments