ព្រះសីហនុ ៖ ជនក្លែងខ្លួនជាសង្ឃចំនួន០៥នាក់ ត្រូវបាន សមត្ថកិច្ចប៉ូលិស អធិការដ្ឋាននគរបាលស្រុកព្រៃនប់ ចាប់ខ្លួន ខណៈពេលពួកគេស្នាក់នៅផ្ទះសំណាក់ ហ្វីលីតា ស្ថិតក្នុងភូមិ អូតា ប៉ាង អូឧកញ៉ាហេងស្រុកព្រៃនប់ ខេត្តព្រះសីហនុ សម្ងំជក់ គ្រឿងញៀន។
លោកវរសេនីយ៍ឯក ហួរ យ៉ៃអធិការនគរបាលស្រុកបានអោយដឹងថា ជនសង្ស័យ១.ឈ្មោះ សូវ មិត្ត ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅភូមិត្រពាំងវែងខាងកើត ឃុំដងទង់ ស្រុកដងទង់ ខេត្តកំពត។ ២.ឈ្មោះ សុខ រស្មី ភេទប្រុស អាយុ៣៦ឆ្នាំ មុខរបរមិន ពិតប្រាកដ មានទីលំនៅដូចអ្នកទី១។ ៣.ឈ្មោះ មាស ស៊ីរ៉ា ភេទប្រុស អាយុ១៧ឆ្នាំ មុខរបរមិនពិត ប្រាកដ មានទីលំនៅដូចអ្នកទី១។ ៤.ឈ្មោះ ជី ភ័ក្ត្រ ភេទប្រុស អាយុ២៧ឆ្នាំ មុខរបរមិនពិត ប្រាកដ មានទីលំនៅ ដូចអ្នកទី១។ ទី៥ឈ្មោះ ខាត យន្ត ភេទប្រុស អាយុ២៥ឆ្នាំ មុខរបរមិន ពិតប្រាកដ មានទីលំនៅភូមិសុភី ឃុំស្រែជាខាងជើង ស្រុកដងទង់ ខេត្តកំពត។ ដកហូតបាន វត្ថុតាងរួមមាន១.ស្បង់ចីពរចំនួន០៥លាង(កំប្លេ) ២.បាតចំនួន០៣រួម និងសម្ភារៈ ពាក់ព័ន្ធ ការសេពសារធាតុញៀនផងដែរ ។
ព្រះតេជគុណ ឈឹម យុតព្រះអនុគណស្រុកព្រៃនប់ បានមានសង្ឃដីកាបញ្ជាក់ ឲ្យដឹង ថា ទាំង០៥ប្រាំនាក់គឺជាជនក្លែងបន្លំជាសង្ឈ ដើរសុំលុយ ក្មុងគោលបំណងទិញគ្រឿងញៀន ប្រើប្រាស់ផ្ទាល់ខ្លួន ហើយបញ្ហានេះ នៅចំពោះមុខ ត្រូវបានចាប់ ដោះស្បង់ចីពរ ដើម្បី ប្រគល់ទៅសមត្ថកិច្ច ចាត់ការតាមផ្លូវច្បាប់។
លោកវរសេនីយ៍ឯក ហួរ យ៉ៃបាន ធ្វើការបញ្ជាក់ថា ការចាប់ខ្លួនជនក្លែងជាសង្ឃ ចំនួន ០៥នាក់ខាងលើនេះគឺជាការសហការល្អ របស់ លោក ហួត បូរ៉ា ម្ចាស់ផ្ទះសំណាក់ យីហោ ហ្វីលីតា ដែលបានផ្តល់ព័ត៌មានដល់សមត្ថកិច្ចក្រោយពេលមានការសង្ស័យ ។ ជាមួយគ្នានេះ លោក អធិការ ក៏បាន សំណូមពរផងដែរទៅ ដល់ប្រជាពលរដ្ឋ ជាពិសេសម្ចាស់ផ្ទះសំណាក់ ផ្ទះជួល បើសិនសិនជាមានការសង្ស័យ ត្រូវ ផ្តល់ព័ត៌មាន ភ្លាមៗ ដល់សមត្ថកិច្ច ដើម្បី មានវិធានការតាមផ្លូវច្បាប់ ។
បច្ចុប្បន្ន ជនសង្ស័យទាំង៥ ត្រូវបាន សមត្ថកិច្ច ប៉ូលិស អធិការដ្ឋាននគរបាលស្រុក ព្រៃនប់ កសាងសំណុំរឿង បញ្ជូនខ្លួនមកស្នងការដ្ឋាននគរបាលខេត្តចាត់ការ តាមនីតិវិធី បញ្ជូនទៅសាលាដំបូង ខេត្ត ផ្តន្ទាទោសតាមផ្លូវច្បាប់៕
Source: Kampuchea Thmey Daily
0 Comments