វង្ស ណ​យ ​សន្លប់​ទឹក​៤ ខណៈ​ លាភ រដ្ឋា ឈ្នះ​ពិន្ទុ​ថៃ​

​ប្រដាល់ ៖ វង្ស ណ​យ អ្នក​ប្រដាល់​ក្លិប​កុលបុត្រ​គុន​ខ្មែរ ត្រូវ​អ្នក​ប្រដាល់​ថៃ​ចំណូល​ថ្មី​Phat Many វាយ​ឲ្យ​សន្លប់​ក្នុង​ទឹក​ទី​៤ កាលពី​ថ្ងៃទី​០៨ ខែ​ធ្នូ​ ឆ្នាំ​២០១៨ នៅលើ​សង្វៀន​ខា​រ៉ា​បាវ​ទូរទស្សន៍​អាស៊ី​អាគ្នេយ៍។
​
នៅក្នុង​ការប្រកួត​ទឹក​ដំបូង វង្ស ណ​យ ត្រូវ Phat Many ទាត់​ចំ​កញ្ចឹងក​មួយ​ជើង បណ្ដាល​ឲ្យ​ដួល​លើ​រេញ ត្រូវ​អាជ្ញាកណ្ដាល​រាប់​ដល់​៨។ ហើយ​មកដល់​ទឹក​ទី​៤ វង្ស ណ​យ ភ្លាត់ស្នៀត ​និង​រាង​ប្រហែស​បន្តិច​ផង ក៏ត្រូវ Phat Many Phakao វាយ​កែង​ចំ​មុខ ធ្វើ​ឲ្យ​សន្លប់​លែង​ក្រោក​តែម្ដង ទោះបី​អាជ្ញាកណ្ដាល​រាប់​ដល់​ដប់​ហើយ​ក្តី។
​
ចំណែក លាភ រដ្ឋា អ្នក​ប្រដាល់​ក្លិប​ដី​ឡូ​តិ៍​មាន​រិ​ទ្ធ​ខេត្ត​បន្ទាយមានជ័យ បាន​ប្រកួត​ឈ្នះ អ្នក​ប្រដាល់​ថៃ Phat Phayav ដោយ​ពិន្ទុ ក្រោយពី​វាយ​គ្នា​យ៉ាង​ស្វិតស្វាញ​៥​ទឹក​ពេញ​នោះ។ ពីរ​នាក់​នេះ ជួប​ប្រកួត​គ្នា​ក្នុង​ប្រភេទ​ទម្ងន់​៦០គីឡូក្រាម។​

Phat Phayav អ្នក​ប្រដាល់​ថៃ​ចំណូល​ថ្មី​រូបនេះ ស៊ូ​ណាស់​ដោយ​ក្នុងការ​ប្រកួត​នេះ ត្រូវ​ លាភ រដ្ឋា ដាល់​ចំ​មុខ​ពេញៗ ប៉ុន្តែ​គេ​នៅតែ​ប្រកួត​បាន​ដដែល។​ រដ្ឋា​ វាយ​ឡើង​ចង់​អស់កម្លាំង​ដៃ​របស់​គេ​ទៅ​ហើយ ក៏​នៅតែ​មិនអាច​ផ្ដួល Phat Phayav ឲ្យសន្លប់​បាន គឺ​បាន​ត្រឹម​ឈ្នះ​ពិន្ទុ​ប៉ុណ្ណោះ។​
​
ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ អ៊ុង កំសត់ អ្នក​ប្រដាល់​ក្លិប​ព្រៃទទឹង ខេត្តបាត់ដំបង ប្រកួត​ឈ្នះ​ សោម វិឆ័យ អ្នក​ប្រដាល់​ក្លិប​វិបុល​ដា​រិ​ទ្ធ ដោយ​ដោយ​ពិន្ទុ ហើយ ពុទ្ធ ភា​រិន្ទ អ្នក​ប្រដាល់​ក្លិប​ពុទ្ធ​សេរី​វង្ស​កីឡា វាយ​ចាញ់ ​ងួន គា ក្លិប​រាជសីហ៍​ ខេត្តរតនគិរី​ដោយ​ពិន្ទុ។

•​ម៉ឺន មេ​ឃា ផ្តួល​ថៃ​ទឹក​៤ ឯ​សរ រាជសីហ៍ ផ្តួល អ៊ីរ៉ង់​ទឹក​៣
​អ្នក​ប្រដាល់​ជើង​ខ្លាំង​កម្ពុជា​២​រូប បាន​វាយ​ឈ្នះ អ្នក​ប្រដាល់​ថៃ ​និង​អ៊ីរ៉ង់ មុន​ទឹក​ទី​៥​ដូចគ្នា​នៅក្នុង​ការ​ឡើង​ប្រកួត​ក្នុង​កម្មវិធី​ប្រដាល់​ពេលយប់​Ganzberg Top Fighter លើស​ង្វៀន​SEATV ថ្ងៃទី ០៨ ខែ​ធ្នូ ឆ្នាំ​២០១៨។
​
ម៉ឺន មេ​ឃា អ្នក​ប្រដាល់​វ័យក្មេង ក្លិប​អេ​ភូ​ថង​កីឡា គេ​បាន​ផ្ដួល​អ្នក​ប្រដាល់​ថៃ​ចំណូល​ថ្មី Kaptanlek ឲ្យ​បោះបង់ចោល​ការប្រកួត​ក្នុង​ទឹក​ទី​៤។ អ្នក​ប្រដាល់​ថៃ​រូបនេះ ត្រូវ​ ម៉ឺន សុភា ទាត់​ឲ្យ​ខូច​ភ្លៅ​ឆ្វេង មិន​អាច​ក្រោក​ប្រកួត​បាន។
Kaptanlek គេ​មិន​ធ្លាប់​មក​ប្រកួត​នៅ​ស្រុក​ខ្មែរ​ម្តង​ណា​នៅឡើយ​ទេ​កន្លងមក។ អ្នក​ប្រដាល់​ថៃ Kaptanlek នេះ មាន​កម្ពស់​ទាប​ជាង​ មេ​ឃា គឺ​១,៦៨​ម៉ែត្រ ប៉ុន្តែ​មាន​កំណត់ត្រា​ប្រកួត​ច្រើនជាង ​មេ​ឃា គឺ​៦០​លើក ឈ្នះ​៥០​លើក ចាញ់​១០​លើក មិនដែល​ស្មើ។
​
ចំពោះ សរ រាជសីហ៍ អ្នក​ប្រដាល់​ក្លិប​មោងឬស្សី​មរតក​គុន​ខ្មែរ​ខេត្ត​បាត់ដំបង​វិញ គេ​បាន​ផ្ដួល អ្នក​ប្រដាល់​អ៊ីរ៉ង់​ ឈ្មោះ​Aboozar ឲ្យ​បោះបង់ចោល​ការប្រកួត​ក្នុង​ទឹក​ទី​៣។ ពួកគេ​ប្រកួត​គ្នា​ក្នុង​ប្រភេទ​ទម្ងន់​៧៥​គីឡូក្រាម។​

Aboozar នេះ គេ​ទើបតែ​មក​ប្រកួត​នៅ​សង្វៀន​ស្រុក​ខ្មែរ លើក​ទី​១​ប៉ុណ្ណោះ។ ដូច្នេះ​ហើយ ទើប​មិន​អាច​ស៊ូ​ជាមួយ​ សរ រាជសីហ៍​ បាន​គ្រប់​៥​ទឹក​នោះ។ គួរបញ្ជាក់​ឲ្យ​ដឹង​ដែរ​ថា សរ រាជសីហ៍ កាលពី​ថ្ងៃ​ទី​១១ ខែ​វិច្ឆិកា​ ឆ្នាំ​២០១៨​កន្លងទៅនេះ បាន​វាយ​ស្មើ​ពិន្ទុ​ជាមួយ​អ្នក​ប្រដាល់​អ៊ីរ៉ង់ ​ឈ្មោះ Akbari Keraimant នៅ​លើ​សង្វៀន​SEATV​នេះ៕



Source: Kampuchea Thmey Daily