ភ្នំពេញ ៖ ផ្ទះល្វែងមួយខ្នង ដែលមានលេខ៤៣Cផ្លូវ៤៣BTក្រុមទី១ភូមិត្នោតជ្រុំ៣ សង្កាត់បឹងទំពុន ខណ្ឌមានជ័យ រាជធានីភ្នំពេញ ត្រូវបានអគ្គិភ័យឆាបឆេះទាំងកណ្តាលថ្ងៃត្រង់ខណៈដែលម្ចាស់ស្ថិតនៅក្នុងផ្ទះ ហើយបញ្ជាក់ដល់សមត្ថកិច្ចថា ទុសេចរន្តអគ្គិសនី។
តាមប្រភពពីម្ចាស់ផ្ទះឈ្មោះគឹម ស្រី ភេទស្រី អាយុ៣៥ឆ្នាំ បានឲ្យសមត្ថកិច្ចដឹងថា នៅវេលាម៉ោង១១និង៤០នាទីព្រឹក ថ្ងៃទី១២ ខែធ្នូនេះ គាត់កំពុងអង្គុយចុចទូរស័ព្ទនៅក្នុងផ្ទះស្រាប់តែឃើញផ្សែងហុយចេញពីប្រអប់ភ្លើងក្នុងផ្ទះហើយគាត់ក៏បានរត់មកក្រៅផ្ទះស្រែកឲ្យអ្នកជិតខាងជួយ។
ភ្លាមៗនោះ អ្នកជិតខាងបានយកបំពង់ពន្លត់អគ្គិភ័យទៅជួយបាញ់ពន្លត់ជាបន្តបន្ទាប់អស់ប្រមាណជា១១បំពង់តែមិនរលត់ទើបទូរស័ព្ទទៅរថយន្តពន្លត់អគ្គិភ័យមកជួយបាញ់ពន្លត់។
ម្ចាស់ផ្ទះបានបន្តថា មូលហេតុដែលភ្លើងកាន់តែឆាបឆេះខ្លាំងឡើងៗនេះ គឺដោយសារឆេះរាលទៅកន្លែងស្តុកចានជ័រដែលដាក់គរក្នុងផ្ទះទើបបង្កឲ្យកម្លាំងអណ្តាតភ្លើងឆេះកាន់តែខ្លាំង។
ទាក់ទិនទៅករណីអគ្គិភ័យនេះលោកពេជ្រ កែវមុនី អភិបាលនៃគណៈអភិបាលខណ្ឌមានជ័យដែលលោកបានចុះទៅដល់ចំណុចកើតហេតុបានមានប្រសាសន៍ថា ក្នុងហេតុការណ៍នេះពុំមានអ្នកណាម្នាក់គ្រោះថ្នាក់និងមិនបង្កឲ្យឆ្លងរាលដាលដល់ផ្ទះអ្នកជិតខាងនោះទេ ព្រោះមានកិច្ចអន្តរាគមន៍ពីរថយន្តពន្លត់អគ្គិភ័យមកជួយបាញ់ពន្លត់រហូតដល់ទៅ៤គ្រឿង។
លោកពេជ្រ កែវមុនី បានមានប្រសាសន៍ការទុសេខ្សែភ្លើងនៅផ្ទះកើតហេតុគឺមិនដឹងមកពីខ្សែភ្លើងចាស់ ឬ មកពីប្រើប្រាស់ភ្លើងហួសកម្លាំង។ ទោះជាយ៉ាងណាក៏លោកអភិបាលខណ្ឌបានថ្លែងអំណរគុណដល់កម្លាំងសមត្ថកិច្ចចំរុះដែលបានចុះមកជួយទាន់សភាពការណ៍ទាំងការបាញ់ពន្លត់និងរៀបចំសម្រួលចរាចរណ៍តាមដងផ្លូវដើម្បីឲ្យរថយន្តពន្លត់អគ្គិភ័យធ្វើដំណើរបានលឿនទាន់ពេលដោយពុំមានការកកស្ទះចរាចរណ៍។ ចំពោះគ្រោះអគ្គិភ័យនេះគឺបានបំផ្លាញទ្រព្យសម្បត្តិក្នុងផ្ទះស្ទើរទាំងស្រុង៕
Source: Kampuchea Thmey Daily
0 Comments