រដ្ឋមន្ត្រី​ក្រសួងបរិស្ថាន​ជំរុញ​ដល់​ក្រុមហ៊ុន​វិនិយោគ​លើ​វិស័យ​សំណង់​គោរព​ច្បាប់​ដើម្បី​ធានា​សំណង់​មានគុណ​ភាព​និង​ស្តង់ដារ​បរិស្ថាន​ខ្ពស់

ភ្នំពេញ ​៖​ លោក​សាយ សំ​អាល់ រដ្ឋមន្ត្រី​ក្រសួងបរិស្ថាន​បាន​ជំរុញ​និង​លើកទឹកចិត្ត​ឲ្យ​ក្រុមហ៊ុន​វិនិយោគ​លើ​វិស័យ​សំណង់​ទាំងអស់​ត្រូវ​គោរព​ច្បាប់​និង​លិខិត​បទដ្ឋាន​គតិយុត្តិ​និង​បទដ្ឋាន​គោលការណ៍​ណែនាំ​បច្ចេកទេស​ពាក់ព័ន្ធ​នឹង​ការ​គាំពារ​បរិស្ថាន​ដើម្បី​ធានា​សំណង់​មានគុណ​ភាព​និង​ស្តង់ដារ​បរិស្ថាន​ខ្ពស់​។



ថ្លែង​ក្នុង​ពិធី​បញ្ចុះ​បឋមសិលា​បើក​ការដ្ឋាន​សាងសង់ មជ្ឈមណ្ឌល​សហគមន៍​ធុរកិច្ច និង​អគារ​ការិយាល័យ THE POINT​កាលពី​ព្រឹក​ថ្ងៃទី​១២​ធ្នូ ​លោក​ សាយ​ សំ​អាល់​ បាន​លើកទឹកចិត្ត​ឲ្យ​ក្រុមហ៊ុន​វិនិយោគ​លើ​វិស័យ​សំណង់​ត្រូវ​យកចិត្តទុកដាក់​អនុវត្ត​ឲ្យ​បាន​ខ្ជាប់ខ្ជួន​តាមច្បាប់​និង​លិខិតបទដ្ឋាន​គតិយុត្តិ​និង​បទដ្ឋាន​គោលការណ៍​ណែនាំ​បច្ចេកទេស​ពាក់ព័ន្ធ​នឹង​ការ​គាំពារ​បរិស្ថាន គ្រប់គ្រង​ប្រកបដោយ​ប្រសិទ្ធភាព​ដើម្បី​ធានា​បាន​នូវ​សោ​ភណ្ឌ​ភាព​គុណភាព​សុ​វត្ថិភាព​និង​សណ្តាប់ធ្នាប់​សាធារណៈ​។

លោក​រដ្ឋមន្ត្រី​បាន​បន្ត​ទៀត​ថា «​ពិត​ណាស់​ការអនុវត្ត​តាមច្បាប់​គតិយុត្តិ​ជា​ធរមាន​ពី​សំណាក់​វិនិយោគិន​នៅ​កម្ពុជា ​គឺជា​ការ​ចូលរួម​ចំណែក​ដ៏​សំខាន់​ជាមួយ​រាជរដ្ឋាភិបាល​ក្នុង​ការ​លើកកម្ពស់​សុខុមាល​ភាព​របស់​ប្រជាពលរដ្ឋ​បរិស្ថាន​ល្អ សុខដុមរមនា​ក្នុងសង្គម​»​។



លោក​រដ្ឋមន្ត្រី​សង្ឃឹមថា ​ក្រុមហ៊ុន 3DS PROPERTY MANAGEMENT ដែល​សាងសង់​អគារ​THE POINT​នឹង​កសាង​អគារ​នេះ​ឲ្យ​ក្លាយជា​អគារ​គំរូ​ដោយ​រួមបញ្ចូល​នៃ​ទិដ្ឋភាព​សំខាន់ៗ​នៃ​អគារ​ឆ្លាត​វៃ​ទាំង​គុណភាព​បច្ចេកទេស​ទាំង​សោ​ភណ្ឌ​ភាព​ប្រកបដោយ​រចនាបថ​ដែល​ឆ្លុះបញ្ចាំង​ពី​វប្បធម៌​និង​អរិយធម៌​ខ្មែរ​មាន​ដំណោះស្រាយ​បច្ចេកវិទ្យា​សម្រាប់​ធានា​នូវ​សន្តិសុខ​សុវត្ថិភាព​ព្រមទាំង​ស្តង់ដារ​បរិស្ថាន​សម្រាប់​គាំពារ​កិច្ច​បរិស្ថាន​អនាម័យ​សុខុមាលភាព​ដូចជា​រៀបចំ​ប្រព័ន្ធ​លូ​ឲ្យ​បាន​ត្រឹមត្រូវ​នឹងមាន​លំហ​បៃតង​សមស្រប​។

លោក​សាយ​ សំ​អាល់ ​បាន​បន្ថែម​ថា ​វត្តមាន​អគារ​THE POINT នេះ​នឹង​ចូល​រួម​កាត់បន្ថយ​អត្រា​នៃ​ភាព​ក្រីក្រ តាមរយៈ​ការបង្កើត​ការងារ កាត់បន្ថយ​ចំនួន​កម្មករ​ចំណាកស្រុក និង​លើកកម្ពស់​សេដ្ឋកិច្ចជាតិ​របស់​យើង​មួយ​កម្រិត​ទៀត​។

លោក ផូ​រ សុធា​រៈ អគ្គនាយក​ក្រុមហ៊ុន 3DS PROPERTY MANAGEMENT បាន​មានប្រសាសន៍​ឲ្យ​ដឹង​ថា The Point ត្រូវ​បាន​រចនា​ឡើង ជា​គោលដៅ​សម្រាប់​ជា​កន្លែង​ទិញ​ទំនិញ ពិសា​ភោជនីយ​អាហារ និង​ជា​សួន​លំហែ​ដែល​មាន​ដើមឈើ​ធំៗ​ព័ទ្ធជុំវិញ​ទៅ​ដោយ​អគារ​ខ្ពស់ៗ​។ កន្លែង​លក់ទំនិញ​ដ៏​សម្បូរ​បែប​ដែល​ស្ថិតនៅ​ជាន់​ផ្ទាល់​ដី​របស់ The Point ធ្វើ​ឲ្យ​អ្នក​មក​ទស្សនា​មាន​ភាពងាយស្រួល និង​មាន​អារម្មណ៍​ដូចជា​កំពុង​ដើរ​កំសាន្ត​។



ក្រៅ​ពី​នេះ​ភាព​ទាក់ទាញ​ផ្សេងទៀត​នឹង​កើតមាន​លើ​អាង​បៃតង​ដ៏​ប្រណិត​អម​ជាមួយ​ដើមឈើ​ធំៗ ដែល​ជា​ម្លប់​ដល់​កន្លែង​អង្គុយ​សម្រាក​។

លោក​បាន​បន្ត​ថា ​អគារ The Point​នេះ​មាន​កម្ពស់ ៦​ជាន់ និង​ទំហំ​10187.92 ម៉ែត្រការ៉េ​ដែល​អាច​ទទួល​បុគ្គលិក​បាន​ដល់ 1,000 នាក់​ដោយ​គ្មាន​ជា​បញ្ហា​ចោទ​នោះ​ទេ​។ រីឯ​ចំណត​យានយន្ត អាច​ផ្ទុក​រថយន្ត​បាន​រហូតដល់ 200 គ្រឿង និង​ទោចក្រយានយន្ត​រាប់រយ​គ្រឿង​ទៀត​។

លោក​បាន​បញ្ជាក់​ថា ​អគារ​នេះ​គ្រោង​បញ្ចប់​ការសាងសង់​នៅ​ត្រីមាស​ទី​៤​ឆ្នាំ​២០១៩​ខាងមុខនេះ​ដោយ​គ្រោង​នឹង​ចំណាយ​ថវិកា​ក្នុង​ការ​សាងសង់​ប្រមាណ​ជាង​៧​លាន​ដុល្លារ​អាមេរិក​៕

Source: Kampuchea Thmey Daily