កាលពីថ្ងៃអង្គារ អ្នកកាសែតជនជាតិអារ៉ាប៊ីសាអ៊ូឌីតឈ្មោះ Jamal Khashoggi ដែលត្រូវបានគេធ្វើឃាតកាលពីខែតុលានៅឯស្ថានកុងស៊ុលរបស់ប្រទេសគាត់ប្រចាំទីក្រុងអ៊ីស្តង់ប៊ុលគឺបានជាប់ឈ្មោះជា “បុគ្គលល្បីល្បាញប្រចាំឆ្នាំ” របស់ទស្សនាវដ្តី Time ។ នេះជាកិត្តិយស ដែលគាត់បានចែករំលែកជាមួយអ្នកកាសែតដែលត្រូវបានកំណត់គោលដៅផ្សេងទៀតដែលត្រូវបានគេទទួលស្គាល់ថាជា “អ្នកគាំពារ” នៃសេចក្តីពិត។
ក្នុងចំណោមអ្នកដែលជាប់ឈ្មោះជាមួយលោក Khashoggi គឺមានអ្នកសារព័ត៌មានហ្វីលីពីនឈ្មោះ Maria Ressa , អ្នករាយការណ៍របស់រ៉យទ័រឈ្មោះ Wa Lone និង Kyaw Soe Oo ដែលបច្ចុប្បន្នកំពុងជាប់ពន្ធនាគារនៅប្រទេសមីយ៉ាន់ម៉ានិងកម្លាំងពលកម្មនៃកាសែត Capital Gazette ក្នុងទីក្រុង Annapolis របស់សហរដ្ឋអាមេរិកដោយរួមទាំងបុគ្គលិកប្រាំនាក់ដែលត្រូវបានសម្លាប់នៅក្នុងការបាញ់ប្រហារកាលពីខែមិថុនាផងដែរ។
លោក Edward Felsenthal និពន្ធនាយកទស្សនាវដ្តី Time បាននិយាយថា “នៅពេលយើងពិនិត្យមើលជម្រើសនេះ វាច្បាស់ណាស់ថា ការចោទប្រកាន់និងការរំលោភបំពានសេចក្តីពិតគឺជារឿងធម្មតានៅក្នុងរឿងសំខាន់ៗជាច្រើននៅឆ្នាំនេះចាប់ពីប្រទេសរុស្ស៊ីទៅក្រុងរីយ៉ាដហើយទៅតំបន់ Silicon Valley។ ដូច្នេះយើងបានជ្រើសរើសបុគ្គលទាំងបួននាក់និងក្រុមមួយដែលមានហានិភ័យខ្ពស់ក្នុងការស្វែងរកការពិតដោយចាប់ផ្តើមពីលោក Jamal Khashoggi ទៅ”។
ទស្សនាវដ្តី Time ដែលបានប្រគល់ពានរង្វាន់ “បុគ្គលល្បីល្បាញប្រចាំឆ្នាំ” ចាប់តាំងពីឆ្នាំ១៩២៧មកបានចេញផ្សាយគំរបទស្សនាវដ្តីចំនួនបួនច្បាប់ផ្សេងគ្នាសម្រាប់ការបោះពុម្ពនៅសប្តាហ៍នេះដែលគម្របនីមួយៗបានបង្ហាញពីអ្នកមានកិត្តិយសផ្សេងៗគ្នា។
ដោយពន្យល់ពីការសម្រេចចិត្តក្នុងការផ្តល់កិត្តិយសដល់អ្នកសារព័ត៌មាន Khashoggi របស់កាសែត Washington Post, លោក Felsenthal បាននិយាយថា វាពិតជាកម្រណាស់ដែលថា ឥទ្ធិពលរបស់មនុស្សម្នាក់បានរីកដុះដាលយ៉ាងខ្លាំងនៅក្នុងការស្លាប់។
អ្នកទទួលបានកិត្តិយសផ្សេងទៀតដូចជាលោក Wa Lone អាយុ៣២ឆ្នាំនិងលោក Kyaw Soe Oo អាយុ២៨ឆ្នាំគឺបានលាតត្រដាងអំពីការសម្លាប់ក្រៅប្រព័ន្ធតុលាការលើបុរសជនជាតិរ៉ូហ៊ីងយ៉ាចំនួន១០នាក់ក្នុងអំឡុងការបង្ក្រាបយ៉ាងឃោរឃៅនៅរដ្ឋរ៉ាក់ឃីនភាគខាងលិចប្រទេសមីយ៉ាន់ម៉ាកាលពីឆ្នាំមុន។
ចំណែកលោកស្រី Marie Ressa គឺជានាយកប្រតិបត្តិនៃបណ្តាញសារព័ត៌មាន Rappler ដែលជាវេបសាយព័ត៌មានហ្វីលីពីនមួយបានទទួលរងការវាយប្រហារពីកិច្ចខិតខំប្រឹងប្រែងរបស់រដ្ឋាភិបាលដើម្បីបិទបាំងការរិះគន់លើលោកប្រធានាធិបតី Rodrigo Duterte ។
ហើយបុគ្គលិកនៃកាសែត Capital Gazette ក្នុងទីក្រុង Annapolis នៃរដ្ឋ Maryland ក៏បានចែករំលែកជ័យលាភីឆ្នាំនេះផងដែរ។ បន្ទប់ព័ត៌មានរបស់ពួកគេត្រូវបានវាយប្រហារដោយខ្មាន់កាំភ្លើង Jarrod Ramos កាលពីខែមិថុនាដោយបណ្តាលអោយអ្នកកាសែតចំនួន៤នាក់និងជំនួយការផ្នែកលក់ម្នាក់ស្លាប់៕ AFP
Source: Kampuchea Thmey Daily
0 Comments