អ្នកប្រដាល់ជើងខ្លាំងកម្ពុជាផល សោភ័ណ្ឌ ក្លិបតាឡីដំរីមានរិទ្ធ ត្រូវគេផ្គូផ្គងអោយជួបប្រកួតសាកកណ្តាប់ដៃជាមួយអ្នកប្រដាល់ថៃ ឌេនភីឈិត(Denphichhit ) នារសៀលថ្ងៃទី១៥ ធ្នូ ២០១៨ខាងមុខនេះ នៅលើសង្វៀនបាយ័នស្ទឹងមានជ័យ ។ អ្នកប្រដាល់ទាំងពីរនាក់នេះ ជួបប្រកួតគ្នាក្នុងទម្ងន់៦៥គីឡូក្រាម ។
ឌេនភីឈិតនេះ គេធ្លាប់មកប្រកួតនៅស្រុកខ្មែរប៉ុន្មានលើកហើយ តែមិនដែលប៉ះជាមួយផល សោភ័ណ្ឌនោះទេ ។ ដូច្នេះនេះជាលើកទី១ហើយ សម្រាប់ការជួបគ្នារវាងផល សោភ័ណ្ឌ និង ឌេនភីឈិត ។
បើតាមលោកProsith Phramkeson អ្នកដឹកនាំកីឡាករថៃមកប្រកួត បាននិយាយប្រាប់អោយដឹងថា ” ឌេនភីឈិតនេះ គេមិនធ្លាប់ដែលជួបផលសោភ័ណ្ឌទេ.......ជាដៃគូទី១របស់ផល សោភ័ណ្ឌ ហើយគេក៏ជាកីឡាករលំដាប់របស់ទូរទស្សន៍ប៉ុស្តិ៍លេខ៧ថៃផងដែរ...” ។
ប៉ុន្តែគេនៅចាំបានថា អ្នកប្រដាល់ថៃរូបនេះ(ឌេនភីឈិត) គេធ្លាប់មកប្រកួតនៅស្រុកខ្មែរប៉ុន្មានដងហើយកន្លងមក តែនៅសង្វៀនផ្សេងមិនមែននៅសង្វៀនរបស់បាយ័ន ។ឌេនភីឈិត ធ្លាប់ជួបប្រកួតជាមួយមាស ច័ន្ទមាន សមាគមកីឡាក្រសួងការពារជាតិពីរដង ដោយវាយស្មើពិន្ទុគ្នាម្តង និងចាញ់ច័ន្ទមានក្នុងទឹកទី៣ម្តង ។
ឌេនភីឈិត គេជាជើងខ្លាំងម្នាក់ដែលមានកណ្តាប់ដៃខ្លាំង ។អ្នកប្រដាល់ថៃរូបនេះ មានប្រវត្តិប្រកួត៨១លើក វាយឈ្នះ៦៦លើក ចាញ់១៤លើក និង ស្មើ០១លើក ។
ក្រុមអ្នកវិភាគប្រដាល់ក្នុងស្រុក បានអះអាងថា ឌេនភីឈិត មកជួបផល សោភ័ណ្ឌ លើកនេះ គេក៏រឹតតែយ៉ាប់ជាងជួបមាស ច័ន្ទមានទៅទៀត ព្រោះថាផល សោភ័ណ្ឌ គេល្អជាងមាស ច័ន្ទមាន ។
ទោះជាយ៉ាងណា ការប្រកួតលើកនេះ ផល សោភ័ណ្ឌ មិនអាចធ្វេសប្រហែសនឹងឌេនភីឈិត បានឡើយ ព្រោះអ្នកប្រដាល់ថៃរូបនេះ ក៏មិនសាមញ្ញនោះដែរ ឆ្លងតាមការប្រកួតជាមួយមាស ច័ន្ទមាន កន្លងមកនោះ ។
ផល សោភ័ណ្ឌ មានកំនត់ត្រាប្រកួតចំនួន១២១លើក វាយឈ្នះ១០១លើកហើយ ដោយចាញ់តែ១៩លើកនិងស្មើ០១លើក ហើយធ្លាប់ផ្តួលគូប្រកួតអោយសន្លប់លើរេញចំនួន៤២លើក ។ សោភ័ណ្ឌ ប្រកួតចុងក្រោយនេះ គេបានយកឈ្នះអ្នកប្រដាល់ជើងខ្លាំងថៃឈ្មោះឃុម ភេត ដោយពិន្ទុ កាលពីថ្ងៃទី២៥វិច្ឆិកា២០១៨កន្លងទៅនេះ ។
យ៉ាងណាសម្រាប់ការជួបគ្នារវាងផល សោភ័ណ្ឌ និង ឌេនភីឈិតនេះ គេរំពឹងថា ផល សោភ័ណ្ឌ នឹងឈ្នះការប្រកួតនេះ ។ដូច្នេះចាំមើល តើផល សោភ័ណ្ឌ អាចយកឈ្នះឌេនភីឈិត បានមែនឬអត់សម្រាប់ជំនួបលើកដំបូងនេះ ? ។
ចំណែក នូវ ដារ៉ូ អ្នកប្រដាល់ក្លិបអាណាចក្រគុនខ្មែរ ត្រូវគេផ្តល់ឪកាសអោយជួបប្រកួតសងសឹកជាមួយអ្នកប្រដាល់ថៃ ថងប្រាន២៦(Thorng Phran26 ) ដោយប្រកួតក្នុងទម្ងន់៦៣,៥០០ គ.ក្រ ។ ពីរនាក់នេះ ធ្លាប់ប៉ះគ្នាម្តងកាលពីថ្ងៃទី០៤វិច្ឆិកា២០១៨ ដោយនូវ ដារ៉ូចាញ់ត្រឹមពិន្ទុប៉ុណ្ណោះ ។
នូវ ដារ៉ូ ជាអ្នកប្រដាល់ខ្លាំងស្រករក្រោយម្នាក់ ។ គេបានឆ្លងកាត់ការប្រកួតជាមួយអ្នកប្រដាល់ថៃទើបតែបាន៦លើកប៉ុណ្ណោះ ។ ដូច្នេះ លើកនេះជាលើកទី៧ ដែលគេជួបប្រកួតជាមួយថៃនោះ ។ ជួបប្រកួតជាមួយថៃលើកចុងក្រោយនោះគឺវាយចាញ់ថងប្រាន២៦នេះឯង ប៉ុន្តែចាញ់ត្រឹមពិន្ទុប៉ុណ្ណោះ ។
នូវ ដារ៉ូ មានប្រវត្តិប្រកួតប្រមាណជា៥៥លើក ក្នុងនោះវាយឈ្នះ៣៨លើក ចាញ់១៣ លើក និងស្មើ ០៤លើក ។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថា ដារ៉ូអាចសងសឹកយកឈ្នះ ថងប្រាន២៦បានឬក៏អត់នោះទេ? ។
ថងប្រាន២៦. ជាជើងខ្លាំង ដែលមានស្នៀតទាត់ និងកណ្តាប់ដៃល្អ ។ ដូច្នេះ នូវ ដារ៉ូ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អនិងខ្លាំង ។ អ្នកប្រដាល់ថៃរូបនេះ មានប្រវត្តិប្រកួតចំនួន៧០លើក ឈ្នះ៥៩លើក ចាញ់១០លើក និង ស្មើ០១លើក ។ ចាំមើល រវាងនូវ ដារ៉ូ និង ថងប្រាន២៦ តើនរណាជាអ្នកឈ្នះនៅក្នុងការជួបគ្នានេះ ?៕
Source: Kampuchea Thmey Daily
0 Comments