ភ្នំពេញ ៖ ពិតជារឿងដ៏ហួសចិត្ត និងមិនអាចទទួលយកបាន ទើបកំពូលតារាចម្រៀងស្រីចាស់វស្សាលំដាប់ប្រទេសសំឡេងពីរោះរណ្ដំចិត្ត អ្នកនាង ម៉េង កែវពេជ្ជតា ថ្មីៗនេះ បានទម្លាយសារចេញពីចិត្តរៀបរាប់នូវហេតុការណ៍ដ៏កម្រដែលខ្លួនទើបនឹងជួបប្រទះនាអំឡុងពេលចូលរួមអបអរពិធីជប់លៀងគម្រប់ខួបអាពាហ៍ពិពាហ៍របស់មិត្តភ័ក្ដិ និងអ្នកគាំទ្រខ្លួន។
ការបញ្ចេញសាររៀបរាប់ហាក់មានអារម្មណ៍មិនអស់ចិត្តនឹងទង្វើរបស់បុគ្គលមួយក្រុម មានគ្នា៣ ឬ៤នាក់ពីតារាស្រី អ្នកនាង ម៉េង កែវពេជ្ជាតា នោះគឺបានផ្ដើមចេញពីការសុំថតរូបអនុស្សាវរីយ៍។ ប៉ុន្តែលទ្ធផលចុងក្រោយ បែរជាត្រូវជួបរឿងហួសចិត្តទៅវិញ គឺបុគ្គលម្នាក់ ស្ថិតក្នុងក្រុមនោះ បែរជានិយាយបំផ្លើសការពិត លើសពីអ្វីដែលនាងបាននិយាយ។
ផ្អែកតាមសាររបស់ អ្នកនាង ម៉េង កែវពេជ្ជតា បានរៀបរាប់នៅលើបណ្ដាញសង្គមហ្វេសប៊ុកថា តើខ្ញុំខុសដែរមែនទេ? យប់មិញពេលខ្ញុំច្រៀងក្នុងពិធីឆ្លងឆ្នាំនៅសណ្ឋាគារប្រណិត Sokha Hotel ចប់ខ្ញុំក៏បន្តមកកម្មវិធីឥតព្រៀងទុកមួយរបស់ហ្វ៊ែន ( ម៉ោង ប្រហែលជា១១ យប់ )គឺជាខួបអាពាហ៍ពិពាហ៍ ដែលប្រារព្ធនៅក្នុងភោជនីយដ្ឋាន។ ពេលខ្ញុំដើរចូលទៅ និងបានអង្គុយមិនទាន់ទាំងញ៉ាំអ្វីមួយម៉ាត់ផង ក៏មានភ្ញៀវតុផ្សេង មិនមែនភ្ញៀវពិធីទេ ដើរមកសុំខ្ញុំទៅតុរបស់គាត់ ដើម្បីថតរូបជាមួយបងប្រុសគាត់។
អ្នកនាង ម៉េង កែវពេជ្ជតា បាននិយាយទៀតថា ទោះពេលនោះខ្ញុំកំពុងហេវហត់ អស់កម្លាំង និងឃ្លានយ៉ាងណា តែដោយគោរពលើគាត់ជាទស្សនិកជន ខ្ញុំក៏បានទៅឈរថតជាមួយគាត់ ព្រមទាំងមានបុរសពីរនាក់ទៀតក្នុងស្ថានភាពស្រវឹងដូចគ្នា។
ក្នុងពេលថត ពួកគាត់បានលូកដៃឱបចង្កេះខ្ញុំ និងចង់ប្រកៀកស្មាខ្ញុំ ដែលកាយវិការនេះខ្ញុំមិនដែលទេក៏មិនចូលចិត្តដែរ ខ្ញុំទើសទាល់ណាស់ ប៉ុន្តែខ្ញុំបានត្រឹមងាកចេញ ហើយខំសើចយកចិត្តក្នុងន័យកុំឲ្យគាត់ខឹង ព្រោះមើលទៅវាមិនទំនងមែន។
តារាចម្រៀងសំឡេងមនោសញ្ចេតនា អ្នកនាង ម៉េង កែវពេជ្ជតា បន្តថា ក្រោយពីថតរួច ខ្ញុំក៏សំពះអរគុណ និងលាមកតុរបស់ខ្ញុំ ដែលមានបងៗខ្ញុំអង្គុយចាំ។
ក្រោយញ៉ាំអាហារសម្រន់ការឃ្លានបន្តិច ខ្ញុំក៏ឡើងច្រៀងជូនពរម្ចាស់ពិធី និងបានដើរត្រលប់បម្រុងមកអង្គុយតុ ស្រាប់តែភ្ញៀវដដែលដើរមករកខ្ញុំ ហើយសុំខ្ញុំថតរូបជាមួយបងប្រុសគាត់ម្តងទៀត។
ពេលនោះខ្ញុំក៏បានឆ្លើយយ៉ាងរហ័សថា " ថតទៀតហើយ ? តែក្រែងមុននេះថតច្រើនប៉ុស្តិ៍ដែរមែនទេបង? ខ្ញុំសូមទោស កុំថតទៀតអី ថតរួចហើយ ប៉ុណ្ណឹងបានហើយ ខ្ញុំសូមអនុញ្ញាតហូបបាយសិនណាបង។
ជាងនេះទៅទៀត តារាចម្រៀង អ្នកនាង ម៉េង កែវពេជ្ជតា បានលើកឡើងថា ស្រាប់តែភ្ញៀវនោះគាត់ប្រែទឹកមុខខឹងភ្លាម ហើយនិយាយពាក្យបំផ្លើសប្រាប់ទៅគ្នាគាត់ថា " គេមិនថតជាមួយបងឯងទេ គេថាមុខបងឯងមិនស្អាត គេថាបងឯងមិនសមនឹងគេ ណ្ហើយមិនថតក៏បាន .." ។ ខ្ញុំ និងបងប្អូនម្ចាស់ពិធីឮហើយហួសចិត្តណាស់ ប៉ុន្តែពួកយើងខ្ជិលវែងឆ្ងាយចាត់ទុកថាគាត់ស្រវឹងទៅចុះ។ ប៉ុន្តែខ្ញុំមិនអស់ចិត្តទេ ព្រោះហេតុអីក៏គាត់កាឡៃពាក្យនៅនឹងមុខខ្ញុំទៅជារឿងផ្សេងទៅវិញ ? ហើយការដែលខ្ញុំបដិសេធន៍ដូច្នេះ តើខុសដែរមែនទេ?។ ម៉េ
ហេតុអីក៏សិទ្ធអ្នកសិល្បៈកាន់តែរួញខ្លីបែបនេះ? តើមកពីសិល្បៈគ្មានសិទ្ធ ឬក៏មកពីអ្នកនោះចង្អៀតចង្អល់ ? សោកស្តាយដែលខំឆ្លើយតបសំណូមពរប៉ុណ្ណឹងហើយ ចុងក្រោយនៅតែគេខឹងបាន..ខ្ញុំចង់ប្រាប់ថា ខ្ញុំក៏ចេះខឹង និងចេះអន់ចិត្តដែរ។ នេះជាសម្តីបន្ថែមរបស់តារាស្រីអ្នកនាង ម៉េង កែវពេជ្ជតា ចំពោះហេតុការណ៍ខាងលើ៕
Source: Kampuchea Thmey Daily
0 Comments