នាយករដ្ឋមន្ត្រីអង់គ្លេសលោកស្រី Theresa May កាលពីថ្ងៃពុធបានរួចផុតពីការបោះឆ្នោតសម្តែងទំនុកចិត្តមួយដោយសមាជិកសភារបស់លោកស្រីផ្ទាល់ ប៉ុន្តែបានបាត់បង់ការគាំទ្រមួយភាគបីពីសហសេវិករបស់លោកស្រីដែលនេះបង្ហាញពីការប្រយុទ្ធដែលលោកស្រីនៅតែប្រឈមមុខដើម្បីទទួលបានកិច្ចព្រមព្រៀង Brexit តាមរយៈរដ្ឋសភា។
លោកស្រី May បានឈ្នះការគាំទ្រពីសមាជិកសភាអភិរក្សចំនួន២០០នាក់ប៉ុន្តែ១១៧នាក់បានបោះឆ្នោតទម្លាក់លោកស្រីហើយបន្ទាប់មក លោកស្រីបានសារភាពថា លោកស្រីនឹងចុះចេញពីតំណែងមុនការបោះឆ្នោតឆ្នាំ២០២២។
លោកស្រីបាននិយាយនៅខាងក្រៅការិយាល័យ Downing Street របស់លោកស្រីបន្ទាប់ពីលទ្ធផលត្រូវបានប្រកាសថា “ខ្ញុំរីករាយដែលបានទទួលការគាំទ្រពីមិត្តរួមការងាររបស់ខ្ញុំនៅក្នុងការបោះឆ្នោតនារាត្រីនេះប៉ុន្តែមានមិត្តរួមការងារជាច្រើនបានបោះឆ្នោតប្រឆាំងខ្ញុំហើយខ្ញុំបានស្ដាប់នូវអ្វីដែលពួកគេនិយាយ”។
លោកស្រីបាននិយាយទៀតថា លោកស្រីចង់បន្តការងារជាមួយនឹងការនាំមកនូវកិច្ចព្រមព្រៀង Brexit និងចង់ឃើញ “អ្នកនយោបាយនៅគ្រប់ទិសទីទាំងអស់មករួបរួមគ្នា”។
លទ្ធផលដែលប្រកាសបន្ទាប់ពីការបោះឆ្នោតសម្ងាត់មួយត្រូវបានអបអរជាមួយនឹងការលើកទឹកចិត្តដ៏ធំធេងពីសំណាក់អ្នកគាំទ្រលោកស្រី May ដែលបានប្រមូលផ្តុំគ្នានៅខាងក្នុងរដ្ឋសភា។
ការបោះឆ្នោតសម្តែងទំនុកចិត្តនេះបានធ្វើឡើងក្រោយការសម្រេចចិត្តរបស់លោកស្រីកាលពីថ្ងៃចន្ទក្នុងការពន្យារពេលការបោះឆ្នោតតាមផែនការមួយនៅក្នុងសភាស្តីពីកិច្ចព្រមព្រៀងនេះពីព្រោះលោកស្រីភ័យខ្លាចនៃការទទួលបរាជ័យ។
លោកស្រីបានសន្យាថានឹងរៀបចំការបោះឆ្នោតនោះនៅថ្ងៃទី២១ខែមករា។ លោកស្រីអាចនឹងនៅតែចាញ់នៅពេលនោះហើយធ្វើអោយដំណើរការ Brexit ធ្លាក់ចូលទៅក្នុងវិបត្តិថ្មី។
លោកស្រី May បានធ្វើដំណើរទៅកាន់ទីក្រុងប្រ៊ុសសែលនៅថ្ងៃព្រហស្បតិ៍សម្រាប់កិច្ចប្រជុំកំពូលសហភាពអឺរ៉ុបមុនការគ្រោងទុកដែលនៅទីនោះ លោកស្រីនឹងដាក់សម្ពាធលើមេដឹកនាំដទៃទៀតអោយផ្តល់អ្វីមួយដល់លោកស្រីដើម្បីបញ្ជាក់កិច្ចព្រមព្រៀង Brexit ចំពោះសមាជិកសភាដែលមានការសង្ស័យ៕ AFP
Source: Kampuchea Thmey Daily
0 Comments