ភ្នំពេញ ៖ យោងតាមរបាយការណ៍ដែលទទួលបានពីនគរបាលខណ្ឌដូនពេញប្រាប់ឲ្យដឹងថា រយៈពេលជាង៣ជាងខែ ឆ្នាំ២០១៨នេះ កម្លាំងនគរបាលខណ្ឌដូនពេញបង្ក្រាបបទល្មើសគ្រឿងញៀន សរុប២៥ករណី ឃាត់ខ្លួនជនសង្ស័យ ប្រុស ស្រី ប្រមាណ៥២នាក់ ក្នុងនោះស្រី១១នាក់ )។
មន្ត្រីនគរបាលខណ្ឌដូនពេញប្រាប់បន្តថា ការបង្ក្រាបបទល្មើសគ្រឿងញៀនទាំង២៥ករណីនោះ ដកហូតថ្នាំញៀន ប្រភេទ ក្រាមពណ៌សថ្លា ប្រមាណ១៦៦កញ្ចប់តូច និង ២៦កញ្ចប់ធំ ទម្ងន់សរុប ២៩៤,១១ក្រាម កញ្ឆាក្រៀម១កញ្ចប់ ទម្ងន់៦,១១ក្រាម ទូរស័ព្ទដៃ ចំនួន១៣គ្រឿង កាបូបដៃ៤ លុយខ្មែរ ចំនួន១១៤,០០០រៀល ថង់ប្លាស្ទិកមួយចំនួន ប្រអប់ជ័រ១ ម៉ូតូចំនួន៨គ្រឿង បំពង់ជ័រ៥ ដបទឹកសុទ្ធ៣ កាបូបស្ពាយ១ ស្រោមដៃ១គូ ជញ្ជីងសម្រាប់ថ្លឹងគ្រឿងញៀន ចំនួន២គ្រឿង ដាវ ចំនួន១ដើម និងកុំព្យូទ័រ ចំនួន៨គ្រឿង។
ប្រភពព័ត៌មានប្រាប់បន្តទៀតថា បទល្មើសគ្រឿងញៀនទាំង ២៥ករណី ដែលបានបង្ក្រាបនេះ គឺគិតចាប់ពីថ្ងៃទី៩ ខែកញ្ញា ឆ្នាំ២០១៨ រហូតមកដល់ថ្ងៃទី១២ ខែធ្នូ ឆ្នាំ២០១៨ ក្នុងនោះប្រើប្រាស់ដោយខុសច្បាប់៦ករណី ឃាត់ជនសង្ស័យ១៨នាក់ ( ស្រី៥នាក់ )។
ជួញដូរដោយខុសច្បាប់១០ករណី ឃាត់ជនសង្ស័យ១០នាក់ ( ២នាក់)។ ជួញដូរ និង ប្រើប្រាស់ ដោយខុសច្បាប់៧ករណី ឃាត់ខ្លួនជនសង្ស័យ២២នាក់ ( ស្រី៤នាក់ )។ រក្សាទុក ដោយខុសច្បាប់ ឃាត់ជនសង្ស័យ២នាក់ ( ប្រុស )។
សូមបញ្ជាក់ឲ្យដឹងថា កាលពីវេលាម៉ោង១០និង៣០នាទី ថ្ងៃទី១០ ខែធ្នូ ឆ្នាំ២០១៨ ជនសង្ស័យ៥នាក់ ជាមុខសញ្ញាជួញដូរ និង ប្រើប្រាស់គ្រឿងញៀន ត្រូវកម្លាំងនគរបាល នៃអធិការដ្ឋាននគរបាលដូនពេញ បង្ក្រាបជាក់ស្ដែងដកហូតថ្នាំញៀន តូច ធំ ប្រមាណ៣៤កញ្ចប់ រួមទាំងវត្ថុតាងពាក់ព័ន្ធមួយចំនួនទៀត នៅចំណុចក្រុម៤៣ ភូមិ០៨ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
ជនសង្ស័យទាំង០៥នាក់ រួមមាន ៖
១/-ឈ្មោះ សួន សុខចំរើន ភេទប្រុស អាយុ៣១ឆ្នាំ ជនជាតិខ្មែរ ស្នាក់នៅផ្ទះលេខ១០៩ ផ្លូវ១៣០ សង្កាត់ផ្សារចាស់ មុខរបរមិនពិត (ជួញដូរគ្រឿងញៀន។
២/-ឈ្មោះ ហម ឆដា ភេទប្រុស អាយុ ៣៧ឆ្នាំជនជាតិខ្មែរ ស្នាក់នៅផ្ទះលេខ១០៥ ផ្សារដឹហ្គោ សង្កាត់អូរឫស្សី ខណ្ឌ៧មករា មុខរបរមិនពិត (ជួញដូរគ្រឿងញៀន)។
៣/-ឈ្មោះ ជា សំរេច ភេទប្រុស អាយុ ៣៥ឆ្នាំ ជនជាតិខ្មែរ ស្នាក់នៅមិនពិតប្រាកដ មុខរបរមិនពិត (ប្រើប្រាស់គ្រឿងញៀន )។
៤/-ឈ្មោះ តុប វុធ្ធី ភេទប្រុស អាយុ១៩ឆ្នាំ ជនជាតិខ្មែរ ស្នាក់នៅផ្ទះលេខ៨៤ ផ្លូវ១០៧ ភូមិ០៤ សង្កាត់អូរឫស្សី៤ ខណ្ឌ៧មករា មុខរបរមិនពិត ( ប្រើប្រាស់គ្រឿងញៀន)។ ៥/ឈ្មោះ ម៉ុច ចន្ទតារ៉ា ភេទប្រុស អាយុ២១ឆ្នាំ ជនជាតិខ្មែរ ស្នាក់នៅផ្ទះជួល សង្កាត់ផ្សារថ្មី៣ មុខរបរមិនពិត (ប្រើប្រាស់គ្រឿងញៀន)។
ចំណែក វត្ថុតាងចាប់យក រួមមាន ១/-ក្រាមពណ៌សថ្លា (គ្រឿងញៀន) ចំនួន៣៤កញ្ចប់ (ធំចំនួន០២កញ្ចប់ តូច៣២កញ្ចប់។ ២/ជញ្ជីងថ្លឹងគ្រឿងញៀន ចំនួន០១គ្រឿង។ ៣/-ឧបករណ៍ប្រើប្រាស់សម្រាប់សេពគ្រឿងញៀនមួយចំនួន។ ៤/-ថង់សម្រាប់ច្រកគ្រឿងញៀនធ្វើសកម្មភាពមួយចំនួន។ ៥/-ដាវកែច្នៃ ចំនួន០១ដើម។
ក្រោយពីឃាត់ខ្លួន ជនសង្ស័យទាំង៥នាក់ ត្រូវបាននគរបាលខណ្ឌដូនពេញ កសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ ដើម្បីអនុវត្តតាមនីតិវិធី៕
Source: Kampuchea Thmey Daily
0 Comments