ភ្នំពេញ ៖ ថ្លែងនៅក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិ ជូនមន្ត្រីនគរបាលជាតិ ផែនអន្តោប្រវេសន៍ និងអធិការដ្ឋាននគរបាលខណ្ឌឫស្សីកែវ នៃស្នងការដ្ឋាននគរបាលរាជធានីភ្នំពេញចំនួន២៩រូប កាលពីថ្ងៃទី២២ ខែមករា ឆ្នាំ២០១៩ លោក ជា ពិសី អភិបាលខណ្ឌឫស្សីកែវ បានថ្លែងដោយជំរុញឲ្យអធិការខណ្ឌឫស្សីកែវ ចុះធ្វើកិច្ចសន្យាជាមួយម្ចាស់ក្លឹបកម្សាន្ត និងអាជីវកម្មក្នុងវិស័យទេសចរណ៍ និងការលុបបំបាត់ការប្រើប្រាស់ ការជួញដូរ និងការចែកចាយគ្រឿងញៀនក្នុងមូលដ្ឋានខណ្ឌឫស្សីកែវ។
លោកអភិបាលខណ្ឌ បន្តថា បើពិនិត្យឃើញក្លឹបកម្សាន្ត អាជីវកម្មដ្ឋាន និងទីតាំងសប្បាយណាពាក់ព័ន្ធនឹងគ្រឿងញៀន ត្រូវចាត់វិធានការ និងរាយការណ៍ជូនយោបល់មកគណៈបញ្ជាការឯកភាពខណ្ឌ ដើម្បីបិទអាជីវកម្មនោះតែម្តង។
លោកលើកឡើងទៀតថា អធិការនគរបាលខណ្ឌឫស្សីកែវ ត្រូវយកចិត្តទុកដាក់លើការងារគ្រប់គ្រងសន្តិសុខ សុវត្ថិភាព តាមក្លឹបកម្សាន្ត និងអាជីវកម្មដ្ឋានក្នុងវិស័យទេសចរណ៍នៅក្នុងរាជធានីភ្នំពេញ និងត្រូវយកចិត្តទុកដាក់ពង្រឹងការងារ ដោះស្រាយបញ្ហាប្រឈមរបស់មន្ត្រី ក្រោមឱវាទ និងរក្សាសាមគ្គីភាពផ្ទៃក្នុងរបស់មន្ត្រី។
ជាមួយគ្នានោះ ត្រូវព្យាយាមបណ្ដុះបណ្ដាលការងារដល់មន្ត្រីវ័យក្មេងនៅអមជាមួយនឹងមន្ត្រីចាស់ ដើម្បីឲ្យជួយការងារ និងចែករំលែកបទពិសោធន៍ (មនុស្សចាស់ជាឃ្លាំងចំណេះដឹង) និងត្រូវពង្រឹងយកចិត្តទុកដាក់លើការរក្សាសន្តិសុខសុវត្ថិភាព សណ្ដាប់ធ្នាប់ និងរបៀបរៀបរយសាធារណៈឲ្យកាន់តែល្អប្រសើរជាងមុន។
លោក ជា ពិសី ក៏បានជំរុញផងដែរ ឲ្យអធិការនគរបាលខណ្ឌឫស្សីកែវ ត្រូវផ្តល់សេវាសាធារណៈជូនប្រជាពលរដ្ឋនៅក្នុងមូលដ្ឋានខណ្ឌរបស់ខ្លួនឲ្យបានល្អប្រសើរជាងមុន និងត្រូវរៀបចំក្រុមការងារផ្សព្វផ្សាយក្នុងយុទ្ធនាការផ្តល់សេវាជូនប្រជាពលរដ្ឋរួមមាន ការផ្តល់អត្តសញ្ញាណប័ណ្ណ សៀវភៅ
គ្រួសារ សៀវភៅស្នាក់នៅ ជាដើម និងជំរុញការគ្រប់គ្រងស្ថិតិប្រជាជនស្នាក់នៅអចិន្ត្រៃយ៍ មិនអចិន្ត្រៃយ៍ ជនអន្តោប្រវេសន៍ នៅក្នុងមូលដ្ឋានឲ្យបានល្អ ជាពិសេសត្រូវអនុវត្តឲ្យបានដាច់ខាតនូវគោលនយោបាយភូមិ-សង្កាត់ មានសុវត្ថិភាពទាំង៩ចំណុច របស់រាជរដ្ឋាភិបាលកម្ពុជាឲ្យបានល្អ។
លោកអភិបាល ក៏បានសង្កត់ធ្ងន់ផងដែរចំពោះការងាររៀបចំសណ្ដាប់ធ្នាប់ការអនុវត្តច្បាប់ចរាចរណ៍ផ្លូវគោកការងារ ឆែកអាវុធជាតិផ្ទុះ គ្រឿងស្រវឹង និងសារធាតុញៀន ត្រូវធ្វើជាប្រចាំ និងមានការបត់បែនតាមសភាពការណ៍ជាក់ស្ដែង៕
Source: Kampuchea Thmey Daily
0 Comments