សំណុំរឿង ទំនាស់ដីធ្លី ម្តាយ និងកូនបង្កើតត្រកូលស៊ិន រយៈពេលជាង១០ឆ្នាំមកហើយ ដូចជាមិនចប់សោះ

ព្រះសីហនុ ៖ រហូតមកដល់ពេលនេះ ទំនាស់ដណ្ដើម កេរមរតក រវាង លោក ស៊ិន វិសាល កូនប្រុស បង្កើត (សព) លោក ស៊ិន សុង ជាមួយនឹងម្តាយបង្កើត របស់ខ្លួន គឺ លោកជំទាវ ឡុង សាខន លើទីតាំងដីធ្លីមួយកន្លែង ស្ថិតក្នុងភូមិលេខ០៥ សង្កាត់លេខ០៤ ក្រុងព្រះសីហនុ (ហៅតំបន់ ភ្នំ៩៦) បានអូសបន្លាយ រយៈពេលជាង១០ឆ្នាំមកហើយ ដូចជា ដោះស្រាយ មិនចេញសោះ ដោយក្នុងនោះលោក ស៊ិន វិសាល បញ្ជាក់ថា គាត់មិនចង់បានអ្វីក្រៅពីដីធ្លី ដែលបន្សល់ទុកពី ខ្មោច លោក ស៊ិនសុង ជាឪពុករបស់គាត់នោះទេ ប៉ុន្តែសម្រាប់ លោកស្រី ឡុង សាខន វិញកន្លងមក ក៏ធ្លាប់ បានបញ្ជាក់ផងដែរថា ដីធ្លី ដែល លោក ស៊ីនវិសាល ទាមទារនោះមួយចំនួន ត្រូវបានធ្វើការបែងចែកឲ្យប្អូនៗ និងមួយចំនួនទៀត បានលក់ឲ្យអ្នកផ្សេង ធ្វើប្លង់កម្មសិទ្ធិស្របច្បាប់អស់ទៅហើយ ដូចនេះ ដីធ្លីដែលលោក ស៊ិន វិសាល ធ្វើការប្តឹងទាមទារនោះមិនគ្រប់ចំនួនតាមការចង់បាននោះឡើយ។

ផ្តើមចេញពីមួលហេតុបែបនេះ ក៏បានកើតជាទំនាស់ប្តឹងផ្តល់ បែកផ្សែង និងឈានដល់ការផ្ទុះអាវុធ យ៉ាងខ្លាំងក្លាមិនចាញ់ ការធ្វើសង្គ្រាមនៅលើសមភូមិនោះឡើយ។

ក្រោយមក លោក ស៊ិន វិសាល បានដាក់ពាក្យបណ្ដឹងម្តាយបង្កើតរបស់ខ្លួនទាមទារយកដីនោះវិញ ទាំងអស់ ដោយមិនខ្វល់ថា ដីដែលជាទ្រព្យបន្សល់ទុកពីឪពុកខ្លួន នោះ ម្តាយធ្វើការបែងចែកឲ្យទៅអ្នកណា ឬលក់ ឲ្យអ្នកណានោះទេ គឺត្រូវតែប្តឹងយកវិញទាំងអស់។ ចំណែកឯប្រព័ន្ធតុលាការកន្លងមកក៏បានព្យាយាមធ្វើកិច្ចការនេះច្រើនផងដែរ ក្នុងគោលបំណងបញ្ចប់បញ្ហា ទំនាស់ ហើយ លទ្ធផលចុងក្រោយបានត្រឹមចេញដីការក្សាការពារ លើទីតាំងដីទំនាស់ តាមការស្នើសុំរបស់ភាគី លោក ស៊ិន វិសាល តែប៉ុណ្ណោះ ដើម្បីបន្តនីតិវិធី។

ក្នុងពេលចុះអនុវត្ត ដីការក្សាការពារ របស់សាលាឧទ្ធរណ៍ដែល មានម្ចាស់បំណុល លោក ស៊ិន វិសាល និង កូនបំណុល លោក ស្រី ឡុង សាខន (ម្តាយ បង្កើត ) លេខ ១២/ចុះ ថ្ងៃទី០៦-ខែមិនា ឆ្នាំ -២០១៨ ដឹកនាំដោយ លោក គួន ចន្ថា ចៅក្រមអមសាលាដំបូងខេត្តព្រះសីហនុ នាព្រឹក ថ្ងៃ២២ ខែ មករា ឆ្នាំ២០១៩ កន្លងទៅថ្មីនេះ ក៏ស្រាប់តែមានការផ្ទុះឡើងនៅករណីថ្មីមួយទៀត បានកើតឡើង ខណៈពេល លោក ស៊ិន វិសាល បានបញ្ជាឲ្យគ្រឿងចក្រ ទៅធ្វើការ ឈូស ឆាយរបងថ្ម និងផ្ទះ កម្មករយាមដី របស់ លោក លី ទៀស្រេង ដែលជាភាគី មិនមានការពាក់ព័ន្ធអ្វីសោះនោះ បណ្តាលឲ្យខូចខាត យ៉ាងដំណំ ជាហេតុធ្វើឲ្យ លោក លីទៀ ស្រេង ខឹងយ៉ាងខ្លាំងក៏បានស្ទុះទៅឃាត់ និងបានយកដបសាំង ដេញគប់គ្រឿងចក្រ និងភាគី លោក ស៊ិន វិសាល ក្នុងគោលបំណង ការពារ ទ្រព្យសម្បត្តិរបស់ខ្លួន។

ព្រឹត្តិការបែបនេះ ត្រូវបាន លោក ស៊ិន វិសាល ធ្វើការចោទប្រកាន់ លោក លីទៀ ស្រេង ថា មានចេតនា ប៉ុនប៉ងដុត សម្លាប់ខ្លួន ទាំងរស់ និងបានដាក់ពាក្យបណ្ដឹង លោក លី ទៀស្រេង ផងដែរ។

ដោយឡែក សម្រាប់ លោក លី ទៀ ស្រេង បាន អះអាងថា ដីការក្សាការពារ ខាងលើនេះ មិនមានការពាក់ព័ន្ធនឹងលោកទេ ចុះហេតុអី យកគ្រឿងចក្រ មកឈូសបំផ្លាញ ផ្ទះ និងដីជាកម្មសិទ្ធិ ស្របច្បាប់របស់លោកទៅវិញ។

ជាមួយគ្នានេះ លោក លី ទៀស្រេង ក៏បានបញ្ជាក់ផងដែរថា ដីនេះ លោកបានទិញពីលោកស្រី ជំទាវ ឡុង សាខន ហើយបានធ្វើប្លង់កម្មសិទ្ធិ មកឈ្មោះរបស់លោកស្របច្បាប់អស់ហើយ គ្មានអ្វីពាក់ព័ន្ធនឹង លោក ស៊ិន វិសាល នោះឡើយ។ បញ្ហានេះ លោកក៏បានដាក់ពាក្យបណ្ដឹងទៅលោក ស៊ិន វិសាល វិញផងដែរ លើបទល្មើសចំនួន២ គឺទី០១-បទបំផ្លិចបំផ្លាញទ្រព្យសម្បត្តិរបស់គាត់ ខណៈពេលទីតាំងដីរបស់គាត់មានប័ណ្ណកម្មសិទ្ធិស្របច្បាប់ និង បទល្មើសទី០២-អំពី បទ មនុស្សឃាតដោយចេតនាមកលើរូបគាត់ និងក្រុមកម្មកររបស់គាត់។

ដោយឡែក លោក គួន ចន្ថា ចៅក្រមអមសាលាដំបូងខេត្តព្រះសីហនុ ដែលបានដឹកនាំក្រុមការងារចុះអនុវត្តដីការក្សាការពាររបស់សាលាឧទ្ធរណ៍ លេខ ១២/០៦-០៣ -២០១៨ បានធ្វើការបដិសេធថា សម្រាប់រូបលោក ពុំបានបញ្ជាឲ្យគ្រឿងចក្រមកវាយកម្ទេចលំនៅដ្ឋានរបស់ លោក លី ទាស្រេង នេះទេ គឺលោកត្រឹមតែអានដីការក្សាការពាររបស់សាលាឧទ្ធរណ៍ លេខ ១២/០៦-០៣ -២០១៨ តែប៉ុណ្ណោះ ឯ រឿងអ្វីផ្សេង លោកពុំទទួលខុសត្រូវឡើយ ឯ រឿងរ៉ាវផ្សេងៗ ដែលភាគីទាំងពីរកើតទុក្ខ មិនសុខចិត្តអ្វី អាចប្តឹងទៅស្ថាប័នតុលាការបាន៕