ស្វាយរៀង ៖ ក្នុងរយៈពេលជិតមួយខែ ដើមឆ្នាំ២០១៩នេះ មានឈ្មួញវៀតណាមលួចនាំម៉ូតូគេចពន្ធពីប្រទេសវៀតណាម ចូលមកកម្ពុជា តាមច្រករបៀងសំរោង ស្ថិតក្នុងភូមិសំរោង ឃុំសំរោង ស្រុកចន្ទ្រា ខេត្តស្វាយរៀង ដូចគេហែកឋិន គ្មានការរំខានពីសមត្ថកិច្ចណានោះទេ សង្ស័យត្រូវថ្នាំ ឬទទួលបានសំណែនទេដឹង បានជាបណ្ដែតបណ្ដោយឲ្យឈ្មួញនាំចូលយ៉ាងរលូនបែបនេះ?។
បើតាមសមត្ថកិច្ចមូលដ្ឋានបានបង្ហើបឲ្យដឹងថា ចាប់ពីដើមខែមករាឆ្នាំ២០១៩ មកដល់ថ្ងៃទី២២មករានេះ ក្រុមឈ្មួញបានសម្រុកនាំម៉ូតូគេចពន្ធពីប្រទេសវៀតណាម ចូលតាមច្រករបៀងសំរោង ដែលនៅខាងត្បូងច្រកទ្វារតំបន់ព្រំដែនសំរោង ប្រមាណជា៣០០ម៉ែត្រ ស្ថិតនៅភូមិសំរោង ឃុំសំរោងស្រុកចន្ទ្រា ក្នុង១ថ្ងៃៗ ចាប់ពី៥០គ្រឿង ទៅ១០០គ្រឿង រួចមានអ្នកមកប្រមូលទិញដឹកតាមរថយន្តដឹកឆ្ពោះទៅរាជធានីភ្នំពេញយ៉ាងរលូន។
ប្រភពដដែលបន្តទៀតថា ក្នុងមួយជើង រថយន្តមួយគ្រឿងដឹកម៉ូតូបាន៧០គ្រឿង ទៅ១០០គ្រឿងហើយម៉ូតូដែលឈ្មួញនាំចូលមកនោះ គឺប្រភេទហុងដាសេ១១០ ម៉ាកវ៉េវ ហៅឆ្លាម ស៊េរីទំនើប តម្លៃដល់ដៃឈ្មួញខ្មែរក្នុង១គ្រឿង ចាប់ពី៥៨០ដុល្លារ រហូតទៅ៨០០ដុល្លារ រហូតទៅដល់២០០០ ទៅ៣០០០ដុល្លារ តាមស៊េរី ឬម៉ូតូថ្មីល្អ។
បើតាមឈ្មួញដែលជាអ្នករកស៊ីទទួលទិញម៉ូតូពីវៀតណាមម្នាក់បានបង្ហើបឲ្យដឹងថា ពួកគាត់ទទួលពីវៀតណាមយកមកលក់បន្តឲ្យទៅ ឈ្មោះ បញ្ញា នៅក្រុងស្វាយរៀង ជាអ្នកប្រមូលទិញ ហើយពួកគាត់បានបង់ប្រាក់ឲ្យមន្ត្រីPMម្នាក់ ឈ្មោះ រិន ជាអ្នកប្រមូលលុយពីឈ្មួញនៅព្រំដែនសំរោង ក្នុង១គ្រឿង ២០ដុល្លារ។
ប្រភពដដែលបានបន្តថា ចំពោះការដឹកម៉ូតូតាមរថយន្ត ឆ្ពោះទៅរាជធានីភ្នំពេញនោះ មិនដឹងថា សមត្ថកិច្ចឈជើងតាមដងផ្លូវបានដឹង ឬយ៉ាងណាទេ។ ក៏ប៉ុន្តែពួកឈ្មួញរកស៊ីម៉ូតូគេចពន្ធទាំងនោះបានបង្ហើបទៀតថា ថៅកែម៉ូតូ ឈ្មោះ បញ្ញា នេះ គេរកស៊ីយូរឆ្នាំមកហើយ មិនដែលសមត្ថកិច្ចណាហ៊ានចាប់ទេ ទំនងមានខ្នងធំណាស់។
ទាក់ទិនករណីខាងលើនេះដែរ មន្ត្រីសាខាគយ និងរដ្ឋាករសំរោងស្រុកចន្ទ្រាបានមានប្រសាសន៍តាមទូរស័ព្ទថា ពិតជាមានឈ្មួញលួចនាំម៉ូតូគេចពន្ធពីប្រទេសវៀតណាមតាមច្រករបៀងសំរោងមែន ក៏ប៉ុន្តែមន្ត្រីគយភាគច្រើននៅប្រចាំការឯសាខាគយ និងរដ្ឋាករខេត្តស្វាយរៀង ពេលចុះល្បាតម្តងៗពួកឈ្មួញដឹងខ្លួន គឺមិនធ្វើសកម្មភាពទេ ពេលមន្ត្រីគយត្រឡប់មកស្នាក់ការវិញ ទើបពួកគេចេញធ្វើសកម្មភាព ទើបពិបាកក្នុងការបង្ក្រាប។
មន្ត្រីគយដដែលបន្តទៀតថា មន្ត្រីគយពិបាកក្នុងការបង្ក្រាបខ្លាំងណាស់ ដោយតាមច្រករបៀងមានសមត្ថកិច្ចនគរបាលវរៈការពារព្រំដែនឈរជើងទីនោះ ដូច្នេះសូមឲ្យអ្នកសារព័ត៌មានសួរទៅសមត្ថកិច្ចនគរបាលវិញ។
មហាជន បានធ្វើរិះគន់ដោយត្រង់ៗថា បើសមត្ថកិច្ចពាក់ព័ន្ធតាមព្រំដែនរួមមាន ៖ គយ នគរបាលការពារព្រំដែន យោធាការពារព្រំដែន និងកងរាជអាវុធហត្ថដែលប្រចាំការនៅទីនោះ ពិសេសសមត្ថកិច្ចគយនៅតែបណ្ដែតបណ្ដោយឲ្យឈ្មួញធ្វើព្យុះធ្វើភ្លៀងបែបនេះ ច្បាស់ចំណូលពន្ធគយត្រូវបាត់បង់មិនបានចូលថវិកាជាតិនោះទេ។
ប្រភពខាងលើបានបន្ថែមថា យើងគិតលេងៗមើល ម៉ូតូមួយគ្រឿង ត្រូវបង់នាំចូលពី២០០ ទៅ៣០០ដុល្លារ តាមស៊េរីចុះមួយថ្ងៃនាំចូលគេចពន្ធមួយថ្ងៃពី៧០ គ្រឿងទៅ១០០គ្រឿងនេះ គ្រាន់ច្រកព្រំដែនសំរោងមួយមិនគិតច្រកព្រំដែនទូទាំងខេត្តផង សួរថា តើរដ្ឋបាត់ចំណូលពន្ធគយប៉ុន្មាន?៕
Source: Kampuchea Thmey Daily
0 Comments