ភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានអះអាងថា ការយល់ដឹងពីការថែទាំសុខភាព ជាផ្នែកមួយសំខាន់ក្នុងការធ្វើឲ្យប្រសើរឡើងនូវការស្វែងរកសេវាសុខភាពឲ្យបានត្រឹមត្រូវ និងប្រកបដោយគុណភាពខ្ពស់។
លោកស្រីវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល នៃក្រសួងសុខាភិបាលបានថ្លែងបែបនេះនៅក្នុងសិក្ខាសាលា ស្ដីពី សៀវភៅ “ការយល់ដឹងពីការថែទាំសុខភាពសហគមន៍” ជាឧបករណ៍ដ៏សំខាន់សម្រាប់គម្រោង ការគ្របដណ្ដប់សុខភាពជាសកល ដែលត្រូវយកទៅអនុវត្តន៍នៅខេត្តកំពង់ធំ កំពង់ស្ពឺ និងកំពតដែលរៀបចំចំឡើងមជ្ឈមណ្ឌលជាតិលើកកម្ពស់សុខភាព នៃក្រសួងសុខាភិបាល។
លោកស្រីវេជ្ជបណ្ឌិត ឱ វណ្ណឌីន បានមានប្រសាសន៍ថា សៀវភៅ “ការយល់ដឹងពីការថែទាំសុខភាពសហគមន៍” នេះ មានសារៈសំខាន់សម្រាប់សហគមន៍ដើម្បីយកទៅប្រើប្រាស់ជាគុណប្រយោជន៍ទទួលបាននូវព័ត៌មានសុខភាព ហើយជួយបង្កើននូវចំណេះដឹងអំពីការថែទាំសុខភាព ក៏ដូចជាការជ្រើសរើសសេវាសុខភាពបានត្រឹមត្រូវនៅពេលមានបញ្ហាសុខភាពណាមួយ ដែលនឹងជំរុញឲ្យមានការកែប្រែ និងទទួលយកទម្លាប់រស់នៅប្រកបដោយសុខភាពល្អ ព្រមទាំងលើកកម្ពស់ការប្រើប្រាស់សេវាសុខាភិបាលប្រកបដោយប្រសិទ្ធភាពផងដែរ។
លោកស្រីបានឲ្យដឹងទៀតថា គម្រោងកម្មវិធី “ការគ្របដណ្ដប់សុខភាពជាសកល” នេះ គឺជាការប្ដេជ្ញាចិត្តបន្ថែមទៀតរបស់ក្រសួងសុខាភិបាល ក្នុងការផ្តល់សេវាសុខភាពប្របដោយគុណភាព គុណធម៌ និងសមធម៌។ អាស្រ័យហេតុនេះ យើងទាំងអស់គ្នាចាំបាច់ត្រូវសហការគ្នាឲ្យបានល្អ ដើម្បីរៀបចំសៀវភៅសុខភាពនេះឡើង ឲ្យមានខ្លឹមសារសាមញ្ញ ងាយស្រួលយល់ និងមានភាពទាក់ទាញដល់អតិថិជននៅសហគមន៍របស់យើងឲ្យពួកគាត់ប្រើប្រាស់ជាគុណប្រយោជន៍សុខភាពសម្រាប់ការអប់រំសុខភាពនៅតាមសហគមន៍របស់យើងនេះ។
លោកស្រីបានបន្ថែមទៀតថា សៀវភៅសុខភាពមួយនេះ ក៏នឹងក្លាយជាសមិទ្ធផលរបស់ក្រសួងសុខាភិបាលដែលមានមជ្ឈមណ្ឌលជាតិលើកម្ពស់សុខភាពជាសេនាធិការ ក្នុងការប្រើប្រាស់សម្រាប់ការងារអប់រំនិងលើកកម្ពស់សុខភាព ហើយមជ្ឈមណ្ឌលជាតិលើកម្ពស់សុខភាព ត្រូវសម្របសម្រួលជាមួយអង្គភាព និងស្ថាប័នពាក់ព័ន្ធឲ្យបានល្អ ដើម្បីជំរុញការបង្កើតសៀវភៅនេះឲ្យបានឆាប់ និងអាចដាក់ឲ្យប្រើប្រាស់សៀវភៅនេះដោយក្រុមទ្រទ្រង់សុខភាពភូមិ មណ្ឌលសុខភាព និងអ្នកពាក់ព័ន្ធផ្សេងទៀតដើម្បីជាប្រយោជន៍សាធារណជនគ្រប់រូបគ្រប់វ័យនៅមូលដ្ឋាន។
លោកស្រីបានបញ្ជាក់ទៀតថា ការងារអប់រំសុខភាពលើកកម្ពស់សុខភាពជាការងារលំបាកមួយដែលទាមទារការយកចិត្តទុកដាក់ ទាំងក្នុងការបង្កើតសារអប់រំសម្រាប់សហគមន៍ ការផ្សព្វផ្សាយ និងការជំរុញឲ្យមានការអនុវត្តដោយប្រសិទ្ធភាព និងតម្រូវឲ្យមានការចូលរួមពីអាជ្ញាធរ និងស្ថាប័នពាក់ព័ន្ធក្នុងការជំរុញការផ្លាស់ប្ដូរឥរិយាបថ ដើម្បីសុខភាពផ្ទាល់ខ្លួនរបស់ពួកគាត់។ ការងារនេះតម្រូវឲ្យយើងមានជំនាញច្បាស់លាស់ និងការប្ដេជ្ញាចិត្តខ្ពស់ក្នុងការអនុវត្តការងារ។
ទន្ទឹមនឹងនោះ លោកស្រីអគ្គនាយកបច្ចេកទេសសុខាភិបាល បានណែនាំឲ្យមានការពិគ្រោះយោបល់ជាចុងក្រោយជាមួយក្រុមអ្នកប្រើប្រាស់សៀវភៅនេះ មុននឹងឈានទៅដល់ការអនុម័តសម្រេចរបស់ក្រសួងសុខាភិបាលជាផ្លូវការ៕
Source: Kampuchea Thmey Daily
0 Comments