សម្តេចប៉ាប Francis កាលពីថ្ងៃព្រហស្បតិ៍ បានបើកការប្រារព្ធទិវាយុវជនពិភពលោកជាផ្លូវការដែលបានទាក់ទាញយុវជនប្រហែល២០០,០០០នាក់ពីជុំវិញពិភពលោកឲ្យមកប្រទេសប៉ាណាម៉ា ដែលជាកន្លែងគាត់ត្រូវបានគេរំពឹងថានឹងការពារជនអន្តោប្រវេសន៍អាមេរិកកណ្តាលនិងសិទ្ធិមនុស្ស។
បព្វជិតអាយុ៨២ឆ្នាំរូបនេះបានជិះយន្តហោះចូលក្នុងប្រទេសប៉ាណាម៉ាកាលពីថ្ងៃពុធនៅពេលចាប់ផ្តើមដំណើរទស្សនកិច្ចរយៈពេល៥ថ្ងៃសម្រាប់អ្នកកាន់សាសនាកាតូលិកវ័យក្មេង។
សម្តេចប៉ាបនឹងធ្វើទស្សនកិច្ចសួរសុខទុក្ខប្រធានាធិបតី Juan Carlos Varela មុនពេលថ្លែងទៅកាន់គណៈសង្ឃអាមេរិកកណ្តាលនៅព្រះវិហារ Saint Francis of Assisi សតវត្សទី១៧។
សុន្ទរកថារបស់សម្តេចប៉ាបគឺផ្តោតយ៉ាងខ្លាំងទៅលើការធ្វើចំណាកស្រុកដែលធ្វើឲ្យប៉ះពាល់ដល់តំបន់នេះជាពិសេសនៅពេលដែលក្បួនជនចំណាកស្រុកថ្មីមកពីប្រទេសហុងឌូរ៉ាស ហ្គាតេម៉ាឡានិងអែលសាល់វ៉ាឌ័រធ្វើដំណើរតាមភាគខាងជើងប្រទេសម៉ិកស៊ិកទៅព្រំដែនអាមេរិក។
សុន្ទរកថានិងការសម្តែងធម្មទេសនារបស់គាត់ក៏ទាក់ទងនឹងភាពក្រីក្រ អំពើពុករលួយនិងអំពើហិង្សាផងដែរ។ ជនអន្តោប្រវេសន៍ជាច្រើននិយាយថា ពួកគេកំពុងព្យាយាមរត់គេចខ្លួន។
មុនពេលគាត់ទៅដល់ប្រទេសប៉ាណាម៉ា សម្តេចប៉ាប Francis បានរិះគន់ចំពោះអ្វីដែលគាត់និយាយថាគឺការភ័យខ្លាចរបស់មនុស្សជាច្រើនចំពោះជនចំណាកស្រុក។
នៅក្នុងការឆ្លើយតបទៅនឹងសំណួររបស់អ្នកយកព័ត៌មាននៅលើយន្តហោះសម្តេចប៉ាបអំពីផែនការរបស់លោកប្រធានាធិបតីអាមេរិក Donald Trump ក្នុងការកសាងជញ្ជាំងព្រំដែនដើម្បីរារាំងពួកគេ សម្តេចប៉ាបបាននិយាយថា ការភ័យខ្លាចចំពោះជនចំណាកស្រុកគឺធ្វើឲ្យយើងឆ្កួត។
មុនពេលចាប់ផ្តើមដំណើរទស្សនកិច្ចរបស់គាត់ សម្តេចប៉ាបបានជួបជនអន្តោប្រវេសន៍ចំនួនប្រាំបីនាក់ដែលរស់នៅក្នុងទីក្រុងរ៉ូម។
អ្នកធម្មយាត្រាជាង១,០០០នាក់បានអបអរសាទរការមកដល់របស់សម្តេចប៉ាប Francis នៅឯអាកាសយានដ្ឋាន Tocumen ដោយគ្រវីទង់ជាតិប៉ាណាម៉ានិងទង់ពណ៌លឿងនិងសរបស់បុរីវ៉ាទីកង់។
មនុស្សរាប់ម៉ឺននាក់បានស្រែកអបអរសាទរនិងគ្រវីទង់នៅពេលសម្តេចប៉ាបធ្វើដំណើរតាមផ្លូវចម្ងាយ៣០គីឡូម៉ែត្រឆ្ពោះទៅកាន់វិមាន Papal Nunciature នៅទីក្រុងប៉ាណាម៉ាស៊ីធីជាទីដែលគាត់បានចំណាយពេលមួយយប់ខណៈហ្វូងអ្នកធ្វើធម្មយាត្រាបានធ្វើពិធីបួងសួងនៅពីក្រោយរបាំងសន្តិសុខនៅខាងក្រៅ៕ AFP
Source: Kampuchea Thmey Daily
0 Comments