ប្រធានាធិបតីអាមេរិកលោក Donald Trump កាលពីថ្ងៃសុក្របានបញ្ចប់ជាបណ្តោះអាសន្ននូវការបិទរដ្ឋាភិបាលដ៏យូរបំផុតក្នុងប្រវត្តិសាស្ត្រអាមេរិកខណៈពេលដែលលោកបានលុបចោលការទទូចរបស់លោកទៅលើថវិកាភ្លាមៗសម្រាប់ការសាងសង់ជញ្ជាំងនៅតាមបណ្តោយព្រំដែនម៉ិកស៊ិក។
សេចក្តីប្រកាសនៅសួន Rose Garden ក្នុងសេតវិមានអំពីកិច្ចព្រមព្រៀងពីរគណបក្សនេះបានសម្គាល់អំពីការដកថយរបស់លោក Trump, ផ្អាកជម្លោះនយោបាយមួយដែលបានធ្វើឲ្យជាប់គាំងដល់ទីក្រុងវ៉ាស៊ីនតោន, បង្អាក់ការធ្វើដំណើរតាមផ្លូវអាកាសហើយបានបណ្តាលឲ្យបុគ្គលិកជាង៨០០,០០០នាក់មិនទទួលបានប្រាក់ខែរយៈពេលប្រាំសប្តាហ៍។
សមាជិកព្រឹទ្ធសភាជាន់ខ្ពស់ខាងគណបក្សប្រជាធិបតេយ្យលោក Chuck Schumer បាននិយាយថា លោកសង្ឃឹមថា លោក Trump បានរៀនមេរៀនរបស់គាត់។
ទាំងព្រឹទ្ធសភានិងសភាតំណាងរាស្ដ្របានចុះហត្ថលេខាលើកិច្ចព្រមព្រៀងនេះជាមួយការយល់ព្រមជាឯកច្ឆន្ទកាលពីថ្ងៃសុក្រ។ ក្រោយមក សេតវិមានបានបញ្ជាក់ថា លោក Trump បានចុះហត្ថលេខាលើច្បាប់នេះ។
ការផ្លាស់ប្តូរគំនិតរបស់លោក Trump បានកើតឡើងចំពេលដែលរងសម្ពាធដោយសារការបិទរដ្ឋាភិបាលរួមទាំងការចំណាយហិរញ្ញវត្ថុលើបុគ្គលិកដែលកំពុងតវ៉ានិងសេដ្ឋកិច្ចជាតិផងដែរ។
ប៉ុន្តែខណៈដែលលោកប្រធានាធិបតីសុខចិត្តយល់ព្រមបើករដ្ឋាភិបាលឡើងវិញទាំងមិនទទួលបានទឹកប្រាក់ចំនួន៥.៧ពាន់លានដុល្លារសម្រាប់មូលនិធិជញ្ជាំងព្រំដែននោះ លោកនៅតែគំរាមធ្វើសង្គ្រាមសាជាថ្មីជាមួយនឹងការបិទរដ្ឋាភិបាលជាថ្មីឬដាក់រដ្ឋក្នុងគ្រាអាសន្នបើសិនជាមិនមានភាពជោគជ័យណាមួយលើគម្រោងរបស់លោកនៅបីសប្តាហ៍បន្ទាប់។
លោកនិយាយថា “ក្នុងរយៈពេលខ្លី ខ្ញុំនឹងចុះហត្ថលេខាលើសេចក្តីព្រាងច្បាប់មួយដើម្បីបើករដ្ឋាភិបាលរបស់យើង។ ក្នុងរយៈពេល២១ថ្ងៃទៀត ខ្ញុំរំពឹងថា គណបក្សប្រជាធិបតេយ្យនិងគណបក្សសាធារណរដ្ឋនឹងធ្វើសកម្មភាពដោយស្មោះត្រង់ជាមួយគ្នា”។
ទោះបីជាយ៉ាងណាក៏ដោយ លោកបានព្រមានថា “ប្រសិនបើយើងមិនទទួលបានកិច្ចព្រមព្រៀងដោយសមរម្យពីសភាទេនោះ រដ្ឋាភិបាលនឹងបិទម្តងទៀតនៅថ្ងៃទី១៥ខែកុម្ភៈឬខ្ញុំនឹងប្រើប្រាស់អំណាចនៅក្រោមច្បាប់និងរដ្ឋធម្មនុញ្ញនៃសហរដ្ឋអាមេរិកដើម្បីដោះស្រាយភាពអាសន្ននេះ។ យើងពិតជាមិនមានជម្រើសទេប៉ុន្តែត្រូវសាងសង់ជញ្ជាំងដ៏រឹងមាំឬរបាំងដែក”។
គួរបញ្ជាក់ជាថ្មីថា លោក Trump បានបង្កឲ្យមានការបិទរដ្ឋាភិបាលកាលពីខែធ្នូដើម្បីជាមធ្យោបាយដាក់សម្ពាធទៅលើសភារបស់គណបក្សប្រជាធិបតេយ្យបន្ទាប់ពីពួកគេបានបដិសេធការទាមទារមូលនិធិជញ្ជាំងរបស់គាត់៕ AFP
Source: Kampuchea Thmey Daily
0 Comments