គិលានដ្ឋាន ដែលជាអំណោយរបស់ សម្ដេចតេជោ និងសម្ដេចកិត្តិព្រឹទ្ធបណ្ឌិត ជូនកងពលតូចអន្តរាគមន៍លេខ១២៨ មានតម្លៃជាង៧ម៉ឺនដុល្លារ ត្រូវបានសម្ពោធដាក់ឲ្យប្រើប្រាស់

ភ្នំពេញ ៖ គិលានដ្ឋានកងពលតូចអន្តរាគមន៍លេខ១២៨ ជាអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្ដេចកិត្តិព្រឹទ្ធបណ្ឌិតស្ថិតនៅក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង(អូពងមាន់) ត្រូវបានសម្ពោធជាផ្លូវការនាព្រឹកថ្ងៃទី២៦មករា ដោយមានការអញ្ជើញចូលរួមពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី។

តាមការឲ្យដឹងពីលោកឧត្ដមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ លើកឡើងពីកិច្ចសហការល្អប្រសើរជាមួយរដ្ឋបាលរាជធានីភ្នំពេញ ក្នុងនាមជាអង្គភាពសម្ព័ន្ធមេត្រីនឹងគ្នា ធ្វើឲ្យអង្គភាពកងពលតូចអន្តរាគមន៍លេខ១២៨ ឈរជើងនៅតំបន់អូអាល័យ ស្រុកសៀមប៉ាង ខេត្តស្ទឹងត្រែង ដែលជាអង្គភាពទើបបង្កើតថ្មី មានការប្រែមុខមាត់ថ្មីទាំងការកសាងមូលដ្ឋានទ័ព និងហេដ្ឋារចនាសម្ពន្ធ ក៏ដូចការលើកកម្ពស់ជីវភាពកងទ័ព និងគ្រួសារកងទ័ព។

លោកឧត្ដមសេនីយ៍ក៏បានលើកឡើងពីស្ថានភាពតាមបណ្ដោយព្រំដែន ដែលអង្គភាព១២៨ ឈរជើងមានលក្ខណៈល្អប្រសើរជាមួយភាគីឡាវ និងបានរួមចំណែកធ្វើឲ្យតំបន់ព្រំដែនក្លាយជាព្រំដែនសន្តិភាព ព្រំដែនអភិវឌ្ឍន៍ និងបង្កលក្ខណៈងាយស្រួលដល់ប្រជាពលរដ្ឋទាំងសងខាង អាចធ្វើទំនាក់ទំនងរកគ្នាយ៉ាងល្អ ប្រសើរក្រោមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។

លោកបន្តថា គិលានដ្ឋានដែលត្រូវសម្ពោធជាផ្លូវការនាពេលនេះ គឺជា សមិទ្ធផល និងជាសក្ខីភាព នៃការគិតគូររបស់សម្ដេចតេជោ និង សម្តេចកិត្តិព្រឹទ្ធបណ្ឌិត ជូនដល់អង្គភាពអន្តរាគមន៍លេខ១២៨ តាមរយៈរដ្ឋបាលរាជធានីរាប់ប្រើប្រាស់ពិនិត្យព្យាបាលជំងឺជូនកងទ័ព និងប្រជាពលរដ្ឋនៅតំបន់នេះនិងកាត់បន្ថយការចំណាយក្នុងការព្យាបាលជំងឺ និងសង្គ្រោះបឋមដល់ប្រជាពលរដ្ឋយើង។

លោក ឃួង ស្រេង បានមានប្រសាសន៍ថា ប្រទេសជាតិមួយខ្លាំង គឺខ្លាំងដោយសារកងទ័ព ហើយកងទ័ពសម័យនេះមិនខុសពីកងទ័ពសម័យមុនទេ គឺក្នុងតួនាទីភារកិច្ច និងកាតព្វកិច្ចស្មោះត្រង់ចំពោះ ជាតិ សាសនា ព្រះមហាក្សត្រ,ការពាររដ្ឋធម្មនុញ្ញ ការពាររាជរដ្ឋាភិបាល ការពារទឹកដី និងថែរក្សាសុខសន្តិភាពជូនជាតិមាតុភូមិ និងប្រជាជន។
លោកបន្តថា ទោះបីកម្ពុជាជាប្រទេសតូច ប្រជាជនតិច ប៉ុន្តែជាភ័ព្វសំណាងខ្ពស់ណាស់ដែលយើងមានកងទ័ពដ៏ស្មោះត្រង់ មានស្មារតីឆន្ទៈស្នេហាជាតិ និងមានអគ្គមគ្គុទ្ទេសក៍ដឹកនាំដ៏ឆ្នើម គឺ សម្ដេចអគ្គមហាសេនាបតីតេជោ ហ៊ុន សែន ជាប្រមុខ។

ជាមួយគ្នានេះ ទោះបីសង្គមជាតិយើងនាពេលបច្ចុប្បន្នមានសុខសន្តិភាពពេញលេញ ជម្លោះដែនអធិបតេយ្យមានសភាពស្ងប់ស្ងាត់ តំបន់ព្រំដែនមានការអភិវឌ្ឍន៍ និងជីវភាពប្រជាពលរដ្ឋ មានការលើកកម្ពស់ ប៉ុន្តែយើងមិនអាចស្កប់ស្កល់នោះទេ យើងចាំបាច់ត្រូវតែបន្តរួមគ្នាថែរក្សា សុខសន្តិភាព និងការអភិវឌ្ឍសង្គមដូចសព្វថ្ងៃនេះ ហើយពិតណាស់យើងមិនអាចខ្វះបានឡើយ នូវវត្តមានកងទ័ពដែលជាតួអង្គប្រតិបត្តិករដ៏សំខាន់បំផុត ដូច្នេះ បញ្ហាជីវភាពសុខទុក្ខកងទ័ព និងសុខភាពគ្រួសារកងទ័ព គឺជាកត្តាដែលត្រូវយកចិត្តទុកដាក់ ជាអាទិភាព។ នេះជាលើកទី២ហើយ ដែលប្រតិភូរដ្ឋបាលរាជធានីភ្នំពេញបានមកសួរសុខទុក្ខកងទ័ពនៅអង្គភាព១២៨ ក្រោយពីបានចងសម្ព័ន្ធមេត្រីភាពជាមួយរាជធានីភ្នំពេញកាលពីថ្ងៃទី១៥ ខែកញ្ញា ឆ្នាំ២០១៧ ហើយក៏ស្របគ្នានឹងដំណើរសួរសុខទុក្ខវីរៈកងទ័ពជួរមុខនៅបញ្ជាការដ្ឋានកងពលធំអន្តរាគមន៍លេខ៣,កងពលតូចអន្តរាគមន៍លេខ៩ និងវរៈនគរបាលការពារព្រំដែនលេខ៧៩៣ ខេត្តព្រះវិហារផងដែរ។

គិលានដ្ឋាននេះ ចាប់សាងសង់កាលពីថ្ងៃទី២ ខែកុម្ភៈ ឆ្នាំ២០១៨ មានបណ្ដោយ៣០ម៉ែត្រ ទទឹង៧ម៉ែត្រ មានខ្លោងទ្វារ របងដែលចំណាយថវិកាសាងសង់ប្រមាណ៧ម៉ឺនដុល្លារអាមេរិក ដែលជាអំណោយរបស់សម្ដេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត តាមរយៈរដ្ឋបាលរាជធានីភ្នំពេញ។ ដើម្បីផ្សារភ្ជាប់មនោសញ្ចេតនាជាមួយកងពលតូចអន្តរាគមន៍លេខ១២៨។

លោក ឃួង ស្រេង និងលោកស្រី បានផ្តល់ជូនអំណោយរបស់ សម្ដេចតេជោ រួមមាន ថវិកា,មី,ទឹកស៊ីអ៊ីវ,ទឹកត្រី,ស្រាបៀ,ប្រេងម៉ាស៊ូត,ប្រេងសាំង,អង្ករ,ស័ង្កសី,ដែកគោលចម្រុះ, រួមទាំងថ្នាំពេទ្យជាច្រើនមុខទៀតផងដែរ។

គួរបញ្ជាក់ផងដែរ ក្នុងឱកាសនោះដែរ ឆ្លើយតបតាមការស្នើសុំរបស់លោកឧត្ដមសេនីយ៍ទោ មៀច សាមុត លើការសុំសាងសង់អគារចិត្តសាស្ត្រមួយខ្នង និងបង្គន់អនាម័យមួយខ្នង ដែលមានតម្លៃជាង៨ម៉ឺនដុល្លារបន្ថែមទៀតនោះ លោក ឃួង ស្រេង បានឯកភាពសម្រេចប្រគល់ជូនតាមសំណើ ដែលអគារនេះ ក៏ជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ជូនអង្គភាពកងពលតូចអន្តរាគមន៍លេខ១២៨ ឈរជើងនៅតំបន់អូអាល័យ ស្រុកសៀមប៉ាង ខេត្តស្ទឹងត្រែង៕