មេដឹកនាំ​បក្ស​ប្រឆាំង​វេ​ណេ​ហ្ស៊ូ​អេ​ឡា​បង្កើន​សម្ពាធ​លើ​លោក Maduro

កាលពី​ថ្ងៃ​សុក្រ មេដឹកនាំ​គណបក្សប្រឆាំង​របស់​ប្រទេស​វេ​ណេ​ហ្ស៊ូ​អេ​ឡា​ បាន​បង្កើន​យុទ្ធនាការ​របស់​ខ្លួន​ដើម្បី​ទម្លាក់​លោក​ប្រធានាធិបតី Nicolas Maduro ដោយ​លោក​បាន​អំពាវនាវ​ឲ្យ​មាន​បាតុកម្ម​ទ្រង់ទ្រាយ​ធំ​មួយ​និង​បដិសេធ​សំណើ​កិច្ចចរចា​ជាមួយ​មេដឹកនាំ​សង្គមនិយម។

ប្រធាន​សភាជាតិ​លោក Juan Guaido ដែល​បានប្រកាស​ខ្លួន​ថា​ជា​ប្រធានាធិបតី​ស្តីទី​អំឡុង​ការ​ប្រមូលផ្តុំ​តាម​ដង​ផ្លូវ​ ដោយ​មនុស្ស​រាប់​ម៉ឺន​នាក់​កាលពី​ថ្ងៃ​ពុធ​បាន​និយាយ​ថា លោក​នឹង​មិន​ចូលរួម​ការសន្ទនា​ក្លែងក្លាយ​មួយ​ស្តីពី​វិបត្តិ ​ដែល​បាន​សម្លាប់​មនុស្ស​ចំនួន​២៦​នាក់​នៅ​សប្តាហ៍​នេះ​ក្នុងការ​ប៉ះទង្គិច​គ្នា​រវាង​សកម្មជន​ប្រឆាំង​លោក Maduro និង​កងកម្លាំង​សន្តិសុខ​ទេ។

បន្ទាប់ពី​ការឈឺចាប់​ផ្នែក​សេដ្ឋកិច្ច​រយៈពេល​៤​ឆ្នាំ​ដែល​បានធ្វើ​ឲ្យ​ប្រជាជន​វេ​ណេ​ហ្ស៊ូ​អេ​ឡា​ខ្វះ​ចំណីអាហារ​និង​ឱសថ​ហើយ​បាន​ជំរុញ​ឲ្យ​មនុស្ស​ជាង​ពីរលាន​នាក់​ភៀសខ្លួន​ចេញពី​ប្រទេស​, គណបក្សប្រឆាំង​បានទទួល​សំឡេងគាំទ្រ​ក្នុង​ខែ​នេះ​ចំពោះ​លោក Guaido បន្ទាប់ពី​លោក Maduro បាន​ស្បថ​ចូលកាន់​តំណែង​ប្រធានាធិបតី​ជា​លើក​ទី​ពីរ​បន្ទាប់ពី​ការបោះឆ្នោត​ដ៏​ចម្រូងចម្រាស​។​

ប្រទេស​ម៉ិ​ក​ស៊ិ​ក​បានផ្តល់​សំណើ​រៀបចំ​ការចរចារ​រវាង​មេដឹកនាំ​គូប្រជែង​ទាំងពីរ​ហើយ​លោក Maduro បាន​និយាយថា លោក​ត្រៀមខ្លួន​ទៅគ្រប់​ទីកន្លែង​ដែល​ត្រូវ​ទៅ​។ ប៉ុន្តែ​លោក Guaido ដែល​ត្រូវបាន​គាំទ្រ​ដោយ​សហរដ្ឋអាមេរិក​និង​បណ្តា​ប្រទេស​អាមេរិក​ឡាទីន​ជាច្រើន​បាន​ប្រាប់​អ្នកគាំទ្រ​នៅ​ទីក្រុង Caracas ថា “​សាធារណជន​នឹង​បន្ត​នៅតាម​ដងផ្លូវ​រហូតដល់​យើង​បញ្ចប់​ការដណ្តើម​អំណាច មាន​រដ្ឋាភិបាល​អន្តរ​កាល​និង​ការបោះឆ្នោត​ដោយ​សេរី​”​។​

សហភាព​អឺរ៉ុប​និង​សហរដ្ឋអាមេរិក​បា​នប​ង្កើ​ន​សម្ពាធ​លើ​លោក Maduro ឲ្យ​យល់ព្រម​ចំពោះ​ការបោះឆ្នោត​ថ្មី​មួយ​។ អ្នកការទូត​សហភាព​អ៊ឺរ៉ុប​ម្នាក់​បាន​ប្រាប់ AFP ថា ប្លុក​នេះ​ចង់បាន​ការអំពាវនាវ​ភ្លាមៗ​សម្រាប់​ការបោះឆ្នោត​នាពេល​អនាគត​ដ៏​ខ្លី​ខាងមុខ​។​

ស្របពេល​ជាមួយគ្នា​នោះដែរ ក្រសួងការបរទេស​អា​មេ​រិ​កបាន​និយាយថា រដ្ឋមន្ត្រី​ក្រសួងការបរទេស​សហរដ្ឋអាមេរិក​លោក Mike Pompeo នឹង​បញ្ជាក់​ពី​ការគាំទ្រ​របស់​អាមេរិក​ដល់​ប្រជាជន​វេ​ណេ​ហ្ស៊ូ​អេ​ឡា​នៅឯ​កិច្ចប្រជុំ​ក្រុមប្រឹក្សាសន្តិសុខ​អង្គការសហប្រជាជាតិ​នៅ​ថ្ងៃ​សៅរ៍​និង​ជំរុញ​ឲ្យ​រដ្ឋ​ជា​សមាជិក​ទទួលស្គាល់​លោក Guaido ជា​ប្រធានាធិបតី​បណ្តោះអាសន្ន​។​

រដ្ឋបាល​របស់លោក​ប្រធានាធិបតី Donald Trump បាន​ដឹកនាំ​ការដាក់​សម្ពាធ​ជា​អន្តរជាតិ​លើ​លោក Maduro ដែល​បាន​ចោទប្រកាន់​ទីក្រុង​វ៉ាស៊ីនតោន​ថា​ប៉ុនប៉ង​ធ្វើ​រដ្ឋប្រហារ​។​

កាលពី​ថ្ងៃ​សុក្រ លោក Pompeo បានប្រកាសថា សហរដ្ឋអាមេរិក​បាន​តែងតាំង​ប្រេសិត​ថ្មី​មួយ​ដើម្បី​ដឹកនាំ​កិច្ចខិតខំ​ប្រឹងប្រែង​ដើម្បី​ជួយ​វេ​ណេ​ហ្ស៊ូ​អេ​ឡា​ឲ្យ​សម្រេចបាន​នូវ​លទ្ធិប្រជាធិបតេយ្យ​៕ AFP

​

Source: Kampuchea Thmey Daily