ភ្នំពេញ ៖ លោក បណ្ឌិត អ៊ិតសំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានណែនាំដល់សិស្សនិស្សិត និងយុវជនកម្ពុជាទាំងអស់ទាំងអ្នកមានការងារធ្វើនិងអ្នកដែលមិនទាន់មានការងារធ្វើត្រូវខិតខំប្រឹងប្រែងសិក្សាជំនាញវិជ្ជាជីវៈថ្មីៗនិងមានបច្ចេកវិទ្យាទំនើបៗដើម្បីឆ្លើយតបទៅនឹងទីផ្សារការងារនាពេលបច្ចុប្បន្នដែលជួយបង្កើនប្រាក់ចំណូលដល់សេដ្ឋកិច្ចគ្រួសារឲ្យកាន់តែប្រសើរឡើង។
ថ្លែងក្នុងពិធីចែកសញ្ញាបត្រដល់សិស្សនិស្សិតជាង៦០០នាក់នៃវិទ្យាស្ថានអភិវឌ្ឍន៍និស្សិតនៅព្រឹកថ្ងៃទី១៤កុម្ភៈនៅវិទ្យាស្ថានជាតិអប់រំ លោក រដ្ឋមន្ត្រីបានមានប្រសាសន៍ថាមុខជំនាញដែលសិស្សនិស្សិតគួរតែសិក្សារួមមានគ្រឿងយន្ត អគ្គិសនី អេឡិចត្រូនិច ជំនាញសំណង់និងវិស្វករជាដើមដើម្បីឆ្លើយតបទៅនឹងការរីកចំរើនវិទ្យាសាស្ត្ររបស់ពិភពលោកនាពេលបច្ចុប្បន្នពិសេសឆ្លើយតបទៅនឹងបដិវត្តន៍ឧស្សាហកម្មជំនាន់ទី៤ដែលផ្តោតទៅលើបច្ចេកវិទ្យាអ៊ិនធឺណែត។
លោករដ្ឋមន្ត្រីបានបន្ថែមថា បច្ចេកវិទ្យាទំនើបនេះ កំពុងជះឥទ្ធិពលដល់ការផ្លាស់ប្តូររបៀបរបបនៃប្រតិបត្តិការអាជីវកម្ម និង ការងារគ្រប់ប្រភេទដូចជាសេវារថយន្តតាក់ស៊ី សេវាធនាគារ-ហិរញ្ញវត្ថុ ការទិញ-លក់ទំនិញ ឬការកក់សណ្ឋាគារ និង សំបុត្រយន្តហោះជាដើមតាមរយៈការប្រើប្រាស់ស្វ័យប្រវត្តិកម្ម មនុស្សយន្តនិងបញ្ញាសិប្បនិមិត្តជំនួសឲ្យកម្លាំងពលកម្មនិងបញ្ញាមនុស្សវិញ។
លោកបណ្ឌិត អ៊ិតសំហេងបានបញ្ជាក់ថា ស្ថិតក្នុងបរិការណ៍នេះ ទាមទារឲ្យកម្ពុជាចាំបាច់ចាប់យកគំរូនិងយុទ្ធសាស្ត្រកំណើនថ្មីដោយកែប្រែពីការប្រើប្រាស់កម្លាំងពលកម្មមនុស្សទៅប្រើប្រាស់បច្ចេកវិទ្យាទំនើបវិញ ដើម្បីជំរុញផលិតភាពការងារ ចូលរួមលើកស្ទួយសេដ្ឋកិច្ចជាតិឲ្យកាន់តែរីកចម្រើន។
លោក គា បូរ៉ាត នាយកវិទ្យាស្ថានអភិវឌ្ឍន៍និស្សិតបានគាំទ្រទាំងស្រុងចំពោះគំនិតនេះព្រោះជួយឲ្យនិស្សិតងាយស្រួលក្នុងការស្វែងរកការងារធ្វើពេលរៀនចប់។ ជាក់ស្តែងសិស្សនិស្សិតដែលរៀនចប់ពីវិទ្យាស្ថានមានប្រមាណ៩៦ភាគរយ ដែលមានការងារធ្វើនិងទទួលបានប្រាក់ខែសមរម្យសម្រាប់ចិញ្ចឹមជីវិតប្រចាំថ្ងៃ។
ចំណែក កញ្ញា ហេង ម៉េងគីម និស្សិតដែលទើបទទួលបានសញ្ញាបត្រផ្នែកជំនាញគណនេយ្យនៃវិទ្យាស្ថានអភិវឌ្ឍន៍និងបច្ចុប្បន្នបម្រើការងារនៅធនាគារអេស៊ីលីដាបានផ្តាំផ្ញើដល់និស្សិតជំនាន់ក្រោយៗត្រូវខិតខំរៀនជំនាញវិជ្ជាជីវៈផ្សេងៗនិងព្យាយាមស្វែងរកបទពិសោធន៍ពីបណ្តាស្ថាប័នពាក់ព័ន្ធនានា។
កញ្ញាបានបន្តថា «នាងខ្ញុំសូមសំណូមពរដល់ប្អូនៗនិស្សិតជំនាន់ក្រោយត្រូវខិតខំប្រែងប្រែងរៀនសូត្រនិងត្រូវចេះស្វែងរកបទពិសោធន៍ពីស្ថាប័នផ្សេងៗបើទោះបីជាកំពុងសិក្សាក៏ដោយដើម្បីងាយស្រួលក្នុងការស្វែងរកការងារធ្វើពេលកំពុងសិក្សានិងពេលបញ្ចប់ការសិក្សា។
យ៉ាងណាក៏ដោយលោកបណ្ឌិតរដ្ឋមន្ត្រីបានអះអាងថា «តាងនាមឲ្យថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ និងក្នុងនាមខ្លួនខ្ញុំផ្ទាល់ សូមសម្តែងនូវក្តីសរសើរដោយស្មោះចំពោះក្មួយៗជ័យលាភី ថ្នាក់ដឹកនាំ សាស្ត្រាចារ្យ និងបុគ្គលិកសិក្សាទាំងអស់ នៃ វិទ្យាស្ថានអភិវឌ្ឍន៍និស្សិត ដែលបានសម្រេចលទ្ធផលល្អប្រសើរលើគ្រប់ផ្នែក ក្នុងការបំពេញភារកិច្ចតាមតួនាទីរៀងៗខ្លួន ក្នុងឆ្នាំសិក្សាកន្លងមក»។
លោករដ្ឋមន្ត្រីបានឲ្យដឹងថា លទ្ធផលដ៏ថ្លៃថ្លានេះ គឺពិតជាបានមកពីការខិតខំ និងស្មារតីឧស្សាហ៍ព្យាយាមរបស់ក្មួយៗនិស្សិត ក្នុងការគោរពវិន័យ និងការរៀនសូត្រ ក្រោមការណែនាំរបស់ថ្នាក់ដឹកនាំ ការអប់រំ និងការបង្រៀនរបស់សាស្ត្រាចារ្យនៃវិទ្យាស្ថានអភិវឌ្ឍន៍និស្សិត។ នេះគឺជាជោគជ័យថ្មីមួយរបស់វិទ្យាស្ថានអភិវឌ្ឍន៍និស្សិត ក្នុងការលើកកម្ពស់គុណភាពអប់រំបណ្តុះបណ្តាលរបស់ក្រសួងការងារ និងបណ្តុះបណ្តាលវិជ្ជាជីវៈ និងរបស់រាជរដ្ឋាភិបាល ដែលជានិច្ចកាលយកចិត្តទុកដាក់ការកសាងជំនាន់យុវវ័យសម្រាប់បន្តវេន។
គួរបញ្ជាក់ថា ការជំរុញឲ្យសិស្សនិស្សិតរៀនជំនាញវិជ្ជាជីវៈថ្មីៗនេះដោយសារបច្ចុប្បន្នមាននិស្សិតមួយចំនួនសិក្សា ផ្នែកគ្រប់គ្រង ព័ត៌មានវិទ្យា រដ្ឋបាល ធនាគារ និងសេដ្ឋកិច្ចជាដើមដែលមិនបានឆ្លើយតបទៅនឹងតម្រូវការការងារទីផ្សារនាពេលបច្ចុប្បន្ន៕
Source: Kampuchea Thmey Daily
0 Comments