ភ្នំពេញ ៖ លោកសាស្ដ្រាចារ្យ ម៉ម ប៊ុនហេងរដ្ឋមន្ដ្រីក្រសួងសុខាភិបាលកាលពីរសៀលថ្ងៃទី១៣ ខែកុម្ភៈ ឆ្នាំ២០ ១៩ បានដឹកនាំក្រុមគ្រូពេទ្យស្ម័គ្រចិត្ត របស់សាកលវិទ្យាល័យវិទ្យាសាស្ត្រសុខាភិបាល ចុះអប់រំសុខភាពនិងពិនិត្យព្យាបាលជំងឺទូទៅជូនប្រជាពលរដ្ឋប្រមាណជាង២០០នាក់រស់នៅសង្កាត់គោកឃ្លាង ខណ្ឌសែនសុខ រាជធានីភ្នំពេញ។
លោក សាស្ត្រាចារ្យ សាផុនវឌ្ឍនៈសកលវិទ្យាធិការសាកលវិទ្យាល័យវិទ្យាសាស្ត្រាសុខាភិបាលបានមានប្រសាសន៍ថា គោលបំណងក្នុងការចុះមកពិនិត្យព្យាបាលជួនប្រជាពលរដ្ឋនាពេលនេះដើម្បីបង្ខិតសេវាព្យាបាលឲ្យកាន់តែជិតជាមួយប្រជាពលរដ្ឋនិងដើម្បីចូលរួមចំណែកកាត់បន្ថយការលំបាកនិងការចំណាយរបស់ពួកគាត់ផងដែរពិសេសប្រជាពលរដ្ឋដែលខ្វះខាតជីវភាព វ័យចាស់ជរា ស្ត្រីមេម៉ាយជាដើម។
លោកសាស្ត្រាចារ្យសាផុនវឌ្ឍនៈបានបន្តថា ការចុះពិនិត្យនិងព្យាបាលជំងឺជូនដល់ប្រជាពលរដ្ឋ ដោយឥតគិតថ្លៃនាពេលនេះរួមមានជំងឺភ្នែក ធ្មេញ ត្រចៀក ពិនិត្យជំងឺទូទៅ ពិនិត្យផ្ទៃពោះ មើលអេកូ ពិនិត្យបេះដូងនិងជំងឺមួយចំនួនទៀត។
លោកសាស្ត្រាចារ្យបានបន្ថែមទៀតថា ក្នុងករណីអ្នកជំងឺដែលត្រូវវះកាត់នឹងបញ្ជូនទៅវះកាត់នៅមន្ទីរពេទ្យនានាព្រោះថា ការព្យាបាលនេះគឺមើលទៅលើជំងឺស្រាលៗប៉ុណ្ណោះ។
មានប្រសាសន៍សំណេះសំណាល នាឱកាសនោះលោកសាស្ត្រាចារ្យម៉ម ប៊ុនហេងបានពាំនាំនូវការសាកសួរសុខទុក្ខពីសំណាក់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ជូនដល់លោកតាលោកយាយមាមីងពូនិងក្មួយៗ ដែលបានអញ្ជើញមកពិនិត្យនិងព្យាបាលជំងឺនៅទីនេះព្រោះថាសម្តេចតែងតែមានក្តីកង្វល់ខ្លាំងណាស់ចំពោះសុខទុក្ខនិងសុខភាពរបស់បងប្អូនប្រជាពលរដ្ឋយើង។
លោកសាស្ត្រាចារ្យម៉ម ប៊ុនហេង បានមានប្រសាសន៍ការចុះព្យាបាលជួនប្រជាពលរដ្ឋដោយឥតគិតថ្លៃនេះគឺជាគោលនយោបាយរបស់រាជរដ្ឋាភិបាលក្នុងការការយកចិត្តទុកដាក់ចំពោះសុខភាពប្រជាពលរដ្ឋយើង ដើម្បីផ្ដល់នូវភាពងាយស្រួល ដល់ប្រជាជនកាន់តែច្រើន ក្នុងការការពារសុខភាព ឲ្យបានកាន់តែប្រសើរ។
ទន្ទឹមនឹងនេះ គឺផ្តល់ការព្យាបាលជូនប្រជាពលរដ្ឋ ដោយឥតគិតថ្លៃ និងមិនប្រកាន់និន្នាការ នយោបាយ ឬសាសនា ប្រមូលកម្លាំងស្ម័គ្រចិត្ត ចូលរួមធ្វើសកម្មភាពមនុស្សធម៌និងបណ្តុះបណ្តាលធនធានមនុស្សពិសេស ផ្តល់ជំនាញដល់និស្សិតពេទ្យ ឲ្យកាន់តែមានជំនាញបន្ថែម។
ជាមួយគ្នានេះដែរ លោករដ្ឋមន្ត្រីបានក្រើនរំលឹកដល់បងប្អូនប្រជាពលរដ្ឋត្រូវចេះថែរក្សាសុខភាពឲ្យបានល្អ ហើយនៅពេលមានបញ្ហាសុខភាពសូមប្រញាប់រួសរាន់ទៅមណ្ឌលសុខភាព ឬមន្ទីរពេទ្យដែលនៅជិតផ្ទះដើម្បីឲ្យគ្រូពេទ្យពិនិត្យនិងនិងព្យាបាលជំងឺឲ្យបានទាន់ពេលវេលាពិសេសត្រូវអនុវត្តគោលការណ៍អនាម័យ ហូបស្អាត រស់នៅស្អាតនិងផឹកស្អាតឲ្យបានខ្ជាប់ខ្ជួនដើម្បីបញ្ចៀសកុំឲ្យឆ្លងជំងឺផ្សេងៗតាមរយៈទឹកនិងចំណីអាហារដែលមិនស្អាត៕
Source: Kampuchea Thmey Daily
0 Comments