ស្វាយរៀង ៖ មុនពេលចូលឆ្នាំជនជាតិចិន_វៀតណាមមកដល់ឈ្មួញសម្រុកនាំជ្រូកវៀតណាមឆ្លងដែនចូលមករដ្ឋបាលខេត្តស្វាយរៀងយ៉ាងគំហុកតាមច្រកទ្វារតំបន់ព្រំដែន និងច្រករបៀងក្នុងមួយយប់ៗចាប់ពី១ពាន់ក្បាលទៅ១២០០ក្បាលសង្ស័យពុំមានការត្រួតពិនិត្យសុខភាពសត្វពីមន្ត្រីពេទ្យសត្វទេមើលទៅ ដោយឈ្មួញធ្វើសកម្មភាពដឹកជញ្ជូននៅពេលយប់កណ្តាលអធ្រាត្រ ឬម៉ោង១.០០យប់រំលងអធ្រាត្រ។
ប្រជាពលរដ្ឋមានការព្រួយបារម្ភអំពីសុវត្ថិភាពម្ហូបអាហារជាពិសេសការនាំជ្រូកពីប្រទេសវៀតណាមតាមច្រករបៀងមកចែកចាយ និងពិឃាដយកសាច់លក់នៅលើទីផ្សារខ្វះការត្រួតពិនិត្យសុខភាពសត្វឲ្យបានត្រឹមត្រូវ។ ដោយមានលិចឮមិនច្បាស់ការថា បច្ចុប្បន្នជ្រូកវៀតណាមមានកើតជំងឺជ្រូកទើបមានការបារម្ភ បើគ្មានការត្រួតពិនិត្យឲ្យបានម៉ត់ចត់នោះ។
ទាក់ទិនករណីនេះដែរ មន្ត្រីនគរបាលវរៈការពារព្រំដែនម្នាក់បានបង្ហើបឲ្យដឹងថា ឈ្មួញនាំជ្រូកពីប្រទេសវៀតណាមឆ្លងដែនចូលមកខេត្តស្វាយរៀងមាន២ក្រុមហ៊ុនគឺ៖១,ក្រុមហ៊ុនអង្គរសុខសារិទ្ធមានជ័យ ដែលមានឈ្មោះលោកឧកញ៉ាជឹមសុខ ជាប្រធានក្រុមហ៊ុនដែលមានទីលំនៅបច្ចុប្បន្ននៅភូមិកំពង់សឹង ឃុំកំពង់សឹង ស្រុកព្រះស្តេច ខេត្តព្រៃវែង ដឹកជញ្ជូនសត្វ\ច្បាប់អនុញ្ញាតឲ្យនាំចូល ផលិតផលមានដើមកំណើតពីសត្វ ជ្រូករស់ ចំនួន៦០០ក្បាលចេញដំណើរពីប្រទេសវៀតណាមចូលតាមច្រករបៀងមនោរម្យស្ថិតនៅភូមិមនោរម្យ ឃុំមនោរម្យ ស្រុកស្វាយទាប និងច្រករបៀងព្រំដែនធ្លកសង្កាត់ច្រកម្ទេសក្រុងបាវិតឆ្ពោះទៅចែកចាយក្នុងខេត្តស្វាយរៀង និងដឹកឆ្ពោះទៅរាជធានីភ្នំពេញ។ ២,ក្រុមហ៊ុនដានីដែង ដែលមានលោកឧកញ៉ា ខៅហេងជាប្រធានក្រុមហ៊ុន ។
បើតាមឈ្មោះឈន មេការក្រុមហ៊ុនដានីដែងបានឲ្យដឹងថា ក្រុមហ៊ុនដានីដែងមានច្បាប់អនុញ្ញាតពីក្រសួងកសិកម្មរុក្ខាប្រមាញ់ និងនេសាទឲ្យនាំជ្រូកវៀតណាមពីប្រទេសវៀតណាមចូលតាមច្រកទ្វារទ្វេភាគីបុស្សមន ឃុំបុសមន ស្រុករំដួលក្នុង១ថ្ងៃ៦០០ក្បាល ជាក់ស្តែងគឺនាំចូលតាមច្រកទ្វារតំបន់ព្រំដែនព្រៃតាអីស្រុកស្វាយទាប។
ប្រភពដដែលបន្តទៀតថា ច្បាប់អនុញ្ញាតគឺ៦០០ក្បាលក្នុងមួយថ្ងៃក៏ប៉ុន្តែជាក់ស្តែងគឺតាមការនាំចូលរបស់ឈ្មួញវៀតណាមថ្ងៃខ្លះ៣៣០ក្បាលថ្ងៃខ្លះ៤០០ក្បាលនិងថ្ងៃខ្លះ៦០០ក្បាល ហើយជ្រូករស់ទាំងអស់នេះគឺដឹកឆ្ពោះទៅរាជធានីភ្នំពេញ។
បើតាមលោកប៉ែនចន្ធីប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្តបានមានប្រសាសន៍ថា ជ្រូករស់ដែលក្រុមហ៊ុនទាំងពីរនាំចូលពីប្រទេសវៀតណាមនោះគឺមានច្បាប់អនុញ្ញាត ហើយក៏មានមន្ត្រីពេទ្យសត្វបានចុះទៅពិនិត្យសុខភាពសត្វតាមវិញ្ញាបនបត្រអនាម័យសត្វចេញដោយនាយកដ្ឋានអភិវឌ្ឍន៍បសុសត្វនៃប្រទេសវៀតណាមនិងពិនិត្យមើលសុខភាពជ្រូក រួចរាប់ចំនួនក្បាលទើបចេញលិខិតកាត់ស្តុកឲ្យ។
រីឯលោកខៀវសារឿនប្រធានសាខាគយ និងរដ្ឋាករខេត្តស្វាយរៀងបានមានប្រសាសន៍ថា ជ្រូកដែលក្រុមហ៊ុនអង្គរសុខសារិទ្ធមានជ័យ និងក្រុមហ៊ុនដានីដែងនាំចូលគឺមានច្បាប់និងបង់ពន្ធចូលរដ្ឋត្រឹមត្រូវ។
រីឯមហាជនវិញបានដាក់ចម្ងល់ថា បើមានច្បាប់ហេតុអីឈ្មួញដឹកជ្រូកចូលមកពីប្រទេសវៀតណាមនៅតែពេលយប់ពាក់កណ្តាលអធ្រាត្រ សំនួរសួថាតើមានមន្ត្រីពេទ្យសត្វចុះពិនិត្យសុខភាពសត្វបែបណាបើជ្រូកដាក់ក្នុងទ្រុងជុចគរគំនរដូចភ្នំដឹកហួសទ្រុងក្នុងរថយន្តយីឌុបមួយគ្រឿងដឹកចាប់ពី២០០ក្បាលទៅ៣៣០ក្បាលឯណោះយប់ងងឹតពិនិត្យដឹងដែរឬ? ។មហាជនបានបង្ហើបទៀតថា កាលពីវេលាម៉ោង២យប់ទៀបភ្លឺថ្ងៃទី២កុម្ភៈគេឃើញមានរថយន្តយីឌុបដឹកជ្រូកចេញពីច្រកទ្វារតំបន់ព្រំដែនព្រៃតាអីចំនួន២គ្រឿងឆ្ពោះទៅរាជធានីភ្នំពេញ ហើយកាលពីវេលាម៉ោង៨និង១៥នាទីព្រឹកថ្ងៃទី១កុម្ភៈ២០១៩ មន្ត្រីពេទ្យសត្វ ខេត្តព្រៃវែងពិនិត្យនិងបាញ់ថ្នាំលើយានយន្តដឹកសត្វជ្រូកមាន់ទានៅលើកាំណាត់ផ្លូវជាតិលេខ១ត្រង់ចំណុច ឃុំកំពង់សឹងស្រុកព្រះស្តេចខេត្តព្រៃវែង ពិនិត្យលើជ្រូក២០០ក្បាលសរសេរវិក្កយបត្ររាយការណ៍តែ៨០ក្បាលទេ ធ្វើឲ្យលោកប្រធានការិយាល័យផលិតកម្មសត្វនិងបសុព្យាបាលខេត្តព្រៃវែងប្រតិកម្មស្តីបន្ទោសឲ្យមន្ត្រីខ្លួនបែកធ្លាយដល់មហាជននាំគ្នាគ្រវីក្បាលហួសចិត្តតើសង្ឃឹមអីទាន៕
Source: Kampuchea Thmey Daily
0 Comments