បាត់ដំបង ៖ ជនរងគ្រោះម្នាក់ បានរងរបួសធ្ងន់ធ្ងរសន្លប់ស្ដូកស្ដឹងនៅនឹងកន្លែងកើតហេតុ ខណៈជួបហេតុការណ៍ដ៏រន្ធត់មួយបានកើតឡើង។
ហេតុការណ៍ខាងលើ សមត្ថកិច្ច បានឲ្យដឹងថា បានកើតឡើងកាលពីថ្ងៃទី០២ ខែកុម្ភៈ ឆ្នាំ២០១៩ថ្មីៗនេះ នៅវេលាម៉ោង៨និង៣០នាទី ត្រង់ចំណុចក្រុមទី៦ ភូមិវាលទ្រា ឃុំអូរតាគី ស្រុកថ្មគោល លើកំណាត់ផ្លូវជាតិលេខ៥ បង្កឡើងដោយរថយន្តលាយស៊ីម៉ងត៍ម៉ាកសាំយ៉ុងរបស់ក្រុមហ៊ុន(តាំងណាំសែខនហ្គ្រីត) បុកពីក្រោយម៉ូតូអូសរទេះ បណ្ដាលឲ្យអ្នកបើកបរម៉ូតូរបួសធ្ងន់ធ្ងរសន្លប់នៅនឹងកន្លែងកើតហេតុតែម្ដង។
សមត្ថកិច្ចបន្តថា រថយន្តបង្កម៉ាកសាំងយ៉ុង(SAngyong) ពណ៌ស ពាក់ស្លាកលេខបប៥A.០០៤២ មុនកើតហេតុ បានបើកបរពីទិសខាងត្បូង ឆ្ពោះទៅជើង លុះមកដល់ចំណុចកើតហេតុខាងលើ បានបុកម៉ូតូអូសរទេះដឹកធូបលក់ចំពីក្រោយ បណ្ដាលឲ្យអ្នកបើកបរម៉ូតូរងរបួសធ្ងន់០១នាក់(ប្រុស) ហើយរថយន្តបានបើកចេញពីកន្លែងកើតហេតុចម្ងាយប្រហែល១៥០ម ទើបឈប់រថយន្តទុកចោល ចុះរត់គេចខ្លួនបាត់តែម្ដង។
សមត្ថកិច្ចបានបន្តឲ្យដឹងថា អ្នកបើកបររថយន្តមិនស្គាល់អត្តសញ្ញាណ ដោយសារតែរត់គេចខ្លួនបាត់ហើយជនរងគ្រោះជាអ្នកបើកបរម៉ូតូអូសរទេះ ក៏មិនស្គាល់ឈ្មោះផងដែរ សន្លប់បាត់ស្មារតី គ្រាន់តែដឹងថា ជនរងគ្រោះនៅខេត្តកំពង់ចាម បានបើកបរម៉ូតូម៉ាកយ៉ាមហា(Yamaha)ពណ៌ក្រហម គ្មានស្លាកលេខ។
បច្ចុប្បន្ន ករណីនេះ ក្រោយពីសមត្ថកិច្ចជំនាញបានធ្វើការវាស់វែងត្រឹមត្រូវហើយ រថយន្តបង្ក និងម៉ូតូជនរងគ្រោះ ត្រូវបានយកទៅរក្សាទុកនៅអធិការដ្ឋាននគរបាលស្រុកថ្មគោល ដើម្បីកសាងសំណុំរឿងចាត់ការបន្តតាមនីតិវិធី។ ចំណែកជនរងគ្រោះ កំពុងតែសង្គ្រោះបន្ទាន់នៅមន្ទីរពេទ្យបង្អែកស្រុកមិនទាន់ដឹងថា មានក្តីសង្ឃឹម ឬយ៉ាងណានោះទេ៕
Source: Kampuchea Thmey Daily
0 Comments