កំពង់ឆ្នាំង ៖ មហោស្រពសិល្បៈយុវជនខេត្តកំពង់ឆ្នាំង ក្រោមប្រធានបទ«យុវជនដើម្បីវប្បធម៌ជាតិ»ក្នុងគោលបំណងផ្តល់ឱកាសដល់យុវជនខ្មែរទទួលបានការអប់រំបណ្តុះបណ្តាលអំពីការសម្ដែងសិល្បៈឲ្យបានត្រឹមត្រូវតាមក្បូនខ្នាតនៃលក្ខណៈវប្បធម៌ជាតិ ស្របពេលលំហូរវប្បធម៌សកលភាវូបនីយកម្មបរទេសកំពុងជ្រៀតចូល។ មហោស្រពនេះបានធ្វើឡើងនៅក្នុងសាលប្រជុំមន្ទីរនយោបាយខេត្តនៅព្រឹកថ្ងៃទី១០ ខែកុម្ភៈ ឆ្នាំ២០១៥ រៀបចំដោយមន្ទីរវប្បធម៌និងវិចិត្រសិល្បៈខេត្ត ដោយមានការចូលរួមរបស់ឯកឧត្តម អ៊ុក សុជាតិ រដ្ឋលេខាធិការក្រសួងវប្បធម៌និងវិចិត្រសិល្បៈ និងមន្ត្រីរាជការជុំវិញខេត្តនិងសិស្សវិទ្យាល័យជាច្រើនរូបទៀត។
លោក អ៊ុន សំអុល អភិបាលរងខេត្តកំពង់ឆ្នាំងដែលបានចូលរួមក្នុងមហោស្រពសិល្បៈយុវជននេះបានថ្លែងឲ្យដឹងថា ការប្រារឰមហោស្រពសិល្បៈយុវជនក្នុងថ្ងៃនេះ គឺក្នុងគោលបំណង និងទិសដៅផ្តល់ឱកាសលើកទឹកចិត្តដល់យុវជនខ្មែរក្នុងប្រព័ន្ធសិក្សា និងក្រៅប្រព័ន្ធឲ្យទទួលបាននូវការអប់រំបណ្តុះបណ្តាលអំពីការសម្ដែងសិល្បៈឲ្យបានត្រឹមត្រូវតាមក្បួនខ្នាតនៃលក្ខណៈជាតិ និងលើកស្ទួយថែរក្សាវប្បធម៌ជាតិឲ្យស្ថិតស្ថេរគង់វង្ស នៅក្នុងកាលៈទេសៈ វប្បធម៌ជាតិកំពុងប្រឈម និងការហូរចូលវប្បធម៌សកលភាវូបនីយកម្មពីបរទេសបច្ចុប្បន្ននេះ។
តាមរយៈមហោស្រពនេះចង់ឲ្យយុវជនខ្មែរមានការពិចារណា និងមានគំនិតច្នៃប្រឌិតចំពោះសកលភាវូបនីយកម្មពេលនេះដើម្បីឲ្យយុវជនចូលរួមអភិរក្ស អភិវឌ្ឍន៍វប្បធម៌ជាតិ និងបង្ហាញឲ្យឃើញផងដែរនូវការអនុវត្តន៍គោលដៅថ្មី «កម្ពុជាព្រះរាជាណាចក្រនៃវប្បធម៌» ដែលជាចលករជួយជំរុញបន្ថែមការប្រើប្រាស់សក្ដានុពលវប្បធម៌ខ្មែរដើម្បីអភិវឌ្ឍន៍សេដ្ឋកិច្ចជាតិ។
នៅក្នុងមហោស្រពនេះដែរ យុវជនវិទ្យាល័យព្រះបាទសុរាម្រឹត និងវិទ្យាល័យក្រុងកំពង់ឆ្នាំងបានសម្ដែងរបាំតំណាងឲ្យការប្រមុខរបរធ្វើស្រែចម្ការ ស្មូនឆ្នាំង ធ្វើកញ្ជើល្អី របស់អ្នកខេត្តកំពង់ឆ្នាំង និងល្ខោននិយាយខ្លី អប់រំដល់សិស្សឲ្យលះបង់ការដើរលេងពាលាអាវាសែ ត្រូវខិតខំរៀនសូតដើម្បីអនាគតរបស់ខ្លួនដែលជាសសរទ្រូងរបស់ជាតិ និងជាទំពាំងស្នងឫស្សី ធ្វើឲ្យអ្នកចូលរួមមហោស្រពពេញចិត្តគ្រប់ៗគ្នា។
លោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្តបានឲ្យដឹងដែរថា របាំ និងល្ខោននិយាយអប់រំខាងលើនេះនឹងត្រូវអប់រំហ្វឹកហាត់បន្ថែម ដោយលោកគ្រូ អ្នកគ្រូសិល្បៈនៃមន្ទីរវប្បធម៌និងវិចិត្រសិល្បៈខេត្ត ដើម្បីត្រៀមយកទៅប្រឡងនៅថ្នាក់ជាតិក្នុងពេលខាងមុខ។ លោកបានឲ្យដឹងទៀតថា ក្នុងឆ្នាំ២០១៤កន្លងមក ក្រុមសិល្បៈអាយ៉ៃរឿងរបស់ខេត្តកំពង់ឆ្នាំងបានទទួលជ័យលាភីឆ្នើមក្នុងការប្រកួតសិល្បៈមហាជននៅថ្នាក់ភូមិភាគ។ ដោយឡែកសិល្បៈការិនីម្នាក់ផ្នែកស្មូតកំណាព្យ ក៏ទទួលបានជ័យលាភីលេខ១ទូទាំងប្រទេសពេលប្រឡងមហោស្រពថ្នាក់ជាតិនៅកោះពេជ្រ។ លោក អ៊ុក សុជាតិ រដ្ឋលេខាធិការក្រសួងវប្បធម៌ និងវិចិត្រសិល្បៈបានមានមតិសំណេះសំណាលនិងផ្តាំផ្ញើថា លោកសូមកោតសរសើរដោយស្មោះចំពោះការរាំរបាំជូនពរ ការសម្ដែងរបាំទាក់ទងនឹងជីវភាពរស់នៅរបស់អ្នកខេត្តកំពង់ឆ្នាំង និងការសម្ដែងល្ខោននិយាយអប់រំរបស់ក្មួយៗសិស្សវិទ្យាល័យទាំង២។ ការសម្ដែងនិងរាំរបាំនេះពិតជាគួរឲ្យទាក់ទាញណាស់ ទោះបីមានការខ្វះខាតតិចតួចត្រូវកែលំអក៏ដោយ តែអាចទទួលយកបាន។ លោកសូមឲ្យមន្ទីរវប្បធម៌ និងវិចិត្រសិល្បៈខេត្តខិតខំបន្ថែមទៀតក្នុងការជួយហ្វឹកហាត់រៀនសូត្រដល់ក្មួយសិស្សវិទ្យាល័យទាំង២ឲ្យក្លាយជាអ្នកសិល្បៈ និងអ្នកសម្ដែងដ៏ល្អទៅអនាគត។ ទន្ទឹមនេះ មន្ទីរ ត្រូវខិតខំស្រាវជ្រាវរៀបចំជួសជុលរមណីយដ្ឋានវប្បធម៌ប្រវត្តិសាស្ត្រទាំងឡាយនៅក្នុងខេត្ត និងបណ្ដាស្នាដៃច្នៃប្រឌិតវត្ថុប្រើប្រាស់នានា ដែលតំណាងឲ្យមរតកវប្បធម៌ជាតិរបស់ប្រជាពលរដ្ឋខេត្តកំពង់ឆ្នាំងឲ្យមានគុណភាព និងសោភ័ណភាព ដើម្បីប្រកួតប្រជែងក្នុងទីផ្សារលើកស្ទួយជីវភាពប្រជាពលរដ្ឋ៕
( ឈៀង ថារិទ្ធ )
0 Comments