-ធានាឲ្យបាននូវកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់ ៧ ភាគរយ
-សម្រេចឲ្យបាននូវគោលដៅនៃការកាត់បន្ថយភាពក្រីក្រ ឲ្យស្ថិតនៅក្នុងអត្រាទាបជាង ១០ ភាគរយ
ភ្នំពេញ ៖ នៅក្នុងកិច្ចប្រជុំគណៈរដ្ឋមន្ត្រីលើកដំបូងនាព្រឹកថ្ងៃទី ៧ ខែ កញ្ញា នេះ នៅវិមានសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញដោយសង្ខេបនូវយុទ្ធសាស្ត្រចតុកោណដំណាក់កាលទី៤ ដើម្បីកំណើនការងារ សមធម៌ និងប្រសិទ្ធភាព ដែលជារបៀបវារៈគោលនយោបាយសង្គម សេដ្ឋកិច្ចសម្រាប់ជំរុញអនុវត្តន៍ប្រកបដោយប្រសិទ្ធភាព នូវកម្មវិធីនយោបាយរបស់រាជរដ្ឋាភិបាល ។ យុទ្ធសាស្ត្រចតុកោណដំណាក់កាលទី ៤ ដែលសម្តេចបានអះអាងជាកិច្ចការដែលត្រូវបន្តពង្រឹងនិងពង្រីកសមិទ្ធផលនានាដែលបានអនុវត្តក្នុងយុទ្ធសាស្ត្រ ៣ដំណាក់កាលកន្លងមក។
ប្រមុខរាជរដ្ឋាភិបាលបានយកវេទិកានៃកិច្ចប្រជុំគណៈរដ្ឋមន្ត្រីលើកទី ១ ដើម្បីប្រកាសជូនជនរួមជាតិកម្ពុជា និងភាគីពាក់ព័ន្ធទាំងអស់ឲ្យបានជ្រាបអំពីអាទិភាពគោលនយោបាយសំខាន់ៗ និងការប្តេជ្ញាចិត្តឥតងាករេរបស់រាជរដ្ឋាភិបាលនីតិកាលថ្មីនេះ និងការអនុវត្តកំណែទម្រង់សំខាន់ៗ ក្នុងគោលដៅបម្រើដល់ប្រយោជន៍ជាតិឆ្លើយតបទៅនឹងសេចក្តីត្រូវការរបស់ប្រជាជាតិ ផ្អែកលើគោលនយោបាយរបស់គណបក្សប្រជាជនកម្ពុជាសម្រាប់កសាងនិងការពារមាតុភូមិឆ្នាំ ២០១៨-២០២៣ ដែលប្រជាពលរដ្ឋទូទាំងប្រទេសបានផ្ដល់ការគាំទ្រភ្លូកទឹកភ្លូកដីកន្លងទៅ តាមរយៈការបោះឆ្នោតគាំទ្រគណបក្សប្រជាជនកម្ពុជា កាលពីថ្ងៃទី ២៩ ខែ កក្កដា ២០១៨ ។ រាជរដ្ឋាភិបាលបានរៀបចំគោលនយោបាយរបស់ខ្លួនសំរាប់នីតិកាលទី ៦ នៃរដ្ឋសភាលើមូលដ្ឋាននៃការវាយតម្លៃគ្រប់ជ្រុងជ្រោយលើលទ្ធផលការងារដែលបានអនុវត្តនៅក្នុងនីតិកាលមុនៗ ក៏ដូចជាបរិកាជាតិ និងអន្តរជាតិក្នុងពេលបច្ចុប្បន្ននិងទៅអនាគត ព្រមទាំងយកចិត្តទុកដាក់ឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជន ។
កម្មវិធីនយោបាយនេះ បានកំណត់ដាក់ចេញនូវគោលដៅជាយុទ្ធសាស្ត្រគោលនយោបាយធំៗ ជាអាទិភាព គោលនយោបាយអភិវឌ្ឍតាមវិស័យ និង វិធានការជាក់ស្តែង ជាអាទិភាព សម្រាប់អនុវត្តចាប់ពីឆ្នាំ ២០១៩ ទៅ ដែលជាក្របខណ្ឌសម្រាប់តម្រង់ទិសសម្រាប់រាជរដ្ឋាភិបាលកម្ពុជាក្នុងការបន្តបេសកកម្មបម្រើជាតិ និងប្រជាជននៅក្នុងនីតិកាលទី៦ នេះ។ លើមូលដ្ឋាននេះ រាជរដ្ឋាភិបាលក៏បានរៀបចំយុទ្ធសាស្ត្រចតុកោណដំណាក់កាលទី៤ ដើម្បីកំណើន ការងារ សមធម៌ និង ប្រសិទ្ធភាព កសាងមូលដ្ឋានឆ្ពោះទៅចក្ខុវិស័យកម្ពុជាឆ្នាំ ២០៥០ ដែលជារបៀបវារៈគោលនយោបាយសង្គមសេដ្ឋកិច្ចសម្រាប់ជំរុញអនុវត្តន៍ប្រកបដោយប្រសិទ្ធភាព នូវកម្មវិធីនយោបាយរបស់ខ្លួន និង ជាមគ្គទេសក៍សម្រាប់តម្រង់សកម្មភាពរបស់គ្រប់តួអង្គទាំងអស់ក្នុងគោលដៅបន្តនិងកិច្ចអភិវឌ្ឍន៍ប្រកបដោយចីរភាពនិងបរិយាប័ន្ន សម្រាប់រយៈពេលមធ្យមនិងវែងទៅមុខ តាមរយៈការកែទម្រង់មុតស្រួច សំដៅបន្តលើកស្ទួយប្រសិទ្ធភាពនៃស្ថាប័នសាធារណៈ និងសក្តិសិទ្ធភាពនៃការគ្រប់គ្រងធនធានសរុបរបស់ជាតិ។
ប្រមុខរាជរដ្ឋាភិបាលបានធ្វើការសង្ខេបអំពីសាវតា នៃការកកើតឡើងនៃយុទ្ធចតុកោណដំណាក់កាលទី៤ ដែលជារួមយុទ្ធសាស្ត្រចតុកោណទាំងបីដំណាក់កាលបានបំពេញនូវតួនាទីយ៉ាងល្អប្រសើរជារបៀបវារៈអភិវឌ្ឍន៍សង្គមសេដ្ឋកិច្ចកម្ពុជា ការអនុវត្តយុទ្ធសាស្ត្រចតុកោណឆ្លងកាត់ដំណាក់កាលទាំងបីជាបន្តបន្ទាប់បានផ្ដល់ផលជាការផ្លាស់ប្ដូរស៊ីជម្រៅនៃរចនាសម្ព័ន្ធសេដ្ឋកិច្ច និងការលើកកម្ពស់ជីវភាពប្រជាជនកាន់តែប្រសើរឡើងទាំងខាងសម្ភារៈនិងស្មារតី តាមរយៈកំណើនសេដ្ឋកិច្ចប្រកបដោយចីរភាព ការបង្កើតការងារជូនប្រជាជន ការធានាសមធម៌សង្គម ការពង្រឹងអភិបាលកិច្ចនៃស្ថាប័នរដ្ឋ និងការនាំកម្ពុជាឆ្លងកាត់ដោយជោគជ័យពីចំណាត់ថ្នាក់ប្រទេសដែលមានចំណូលទាប ក្លាយទៅជាប្រទេសមានចំណូលមធ្យមកម្រិតទាបកាលពីពេលថ្មីៗកន្លងទៅនេះ។ សម្រាប់រយៈពេលមធ្យមខាងមុខ ការអភិវឌ្ឍសង្គមសេដ្ឋកិច្ចកម្ពុជានឹងឈានដល់ដំណាក់កាលប្រែប្រួលថ្មីមួយទៀតដែលជាអន្តរកាលទៅសម្រេចឋានៈជាប្រទេសមានចំណូលមធ្យមកម្រិតខ្ពស់។
កិច្ចការនេះ ទាមទារនូវការយកចិត្តទុកដាក់ចំពោះការពង្រឹងឡើងនូវស្ថាប័នសាធារណៈដែលជារចនាសម្ព័ន្ធ នៃយន្តការសំណុំវិធានការនៃច្បាប់និងទាំងផ្លូវការ និងមិនផ្លូវការ។
ធនធានមនុស្ស មធ្យោបាយ និង ធនធានហិរញ្ញវត្ថុ ដែលកំណត់នូវទស្សនៈគោលការណ៍ធំៗនិងឥរិយាបថក្នុងការបំពេញមុខងារ ទាំងក្នុងនយោបាយ សេដ្ឋកិច្ច និង សង្គម ក្នុងក្របខ័ណ្ឌនៃកិច្ចដំណើរការប្រជាធិបតេយ្យ និងនីតិរដ្ឋ ដែលមានធម្មនុញ្ញភាពពេញលេញ ដើម្បីដំណើរការអភិវឌ្ឍទៅមុខទៀត ដោយបន្តរក្សាបាននូវកំណើនសេដ្ឋកិច្ចខ្ពស់ ជំរុញការផ្លាស់ប្តូររចនាសម្ព័ន្ធសេដ្ឋកិច្ចសង្គម បង្កើតការងារប្រកបដោយគុណភាព សម្រាប់យុវជន ឆ្លើយតបប្រកបដោយប្រសិទ្ធិភាពចំពោះក្តីរំពឹងទុករបស់ប្រជាជន។ ជាពិសេសដោះស្រាយនូវសេចក្តីត្រូវការរបស់ប្រជាជនដែលចេះតែកើនឡើងជាលំដាប់ រួមបញ្ចូលនូវការទទួលបានសេវាសាធារណៈសំខាន់ៗ ប្រកបដោយគុណភាព ទាំងហេដ្ឋារចនាសម្ព័ន្ធរូបវន្ត សេវាអប់រំ សេវាសុខាភិបាល និងសេវាមូលដ្ឋានចាំបាច់ផ្សេងទៀត ធានានូវសន្តិសុខសង្គម និងសុខមាលភាពរបស់ប្រជាជនទូទៅធានាសុវត្ថិភាពចំណូល ពិសេសសម្រាប់ប្រជាជនងាយរងគ្រោះ ធានាតុល្យភាពនិងកាត់បន្ថយគម្លាតនៃការរីកចម្រើនរវាងទីក្រុង និង ជនបទ រក្សាភាពបត់បែន និងតាមឲ្យទាន់សភាពការណ៍ប្រែប្រួលក្នុងតំបន់និងពិភពលោក ទាញយកផលប្រយោជន៍ជាអតិបរមាពីការរីកចម្រើនផ្នែកបច្ចេកវិទ្យានិងឌីជីថលរូបនីយកម្ម ជាពិសេសក្នុងបរិយាកាសនៃបដិវត្តន៍ឧស្សាហកម្មទី៤ និងលើកកម្ពស់ប្រសិទ្ធភាពការពារ និង អភិរក្សបរិស្ថានធនធានធម្មជាតិ ប្រព័ន្ធអេកួឡូស៊ី តំបន់ជីវៈចំរុះ ព្រៃឈើ និង ជម្រកសត្វព្រៃ ព្រមទាំងការសម្របខ្លួនទៅនិងការប្រែប្រួលអាកាសធាតុ។
សម្តេចតេជោ ក៏បានបង្ហាញអំពីចំណុចខ្លាំង និងចំណុចខ្សោយ នៃយុទ្ធសាស្ត្រចតុកោណដែលបានអនុវត្តន៍បីដំណាក់កាលមកហើយនោះ ។ សម្តេចបានលើកឡើងថា យោងតាមបទពិសោធន៍ក្នុងការអនុវត្តយុទ្ធសាស្ត្រចតុកោណ បីដំណាក់កាលកន្លងមក រាជរដ្ឋាភិបាលអាចធ្វើការវាយតម្លៃបានត្រឹមត្រូវពីភាពខ្លាំងនិងភាពខ្សោយក៏ដូចជាបញ្ហាប្រឈមនិងកាលានុវត្តភាព។ចំណុចខ្លាំងនៃយុទ្ធសាស្ត្រចតុកោណ គឺការផ្ដល់ក្របខណ្ឌគោលនយោបាយប្រទាក់ក្រឡាគ្នាគ្រប់ជ្រុងជ្រោយ ប្រកបដោយសុគតភាព ព្រមទាំងគ្របដណ្ដប់លើវិស័យសំខាន់ៗ សម្រាប់ការចូលរួមគាំទ្រ អនុវត្តពីគ្រប់ក្រសួង ស្ថាប័ន របស់រាជរដ្ឋាភិបាល ដែលជាមូលដ្ឋានយ៉ាងសំខាន់សម្រាប់ការវិភាជន៍ធនធានឆ្ពោះទៅអតិភាពគោលនយោបាយ និង ជាក្របខណ្ឌមួយដ៏ល្អ សម្រាប់កិច្ចសហប្រតិបត្តិការជាមួយដៃគូអភិវឌ្ឍន៍ទាំងអស់ដែលមានការពាក់ព័ន្ធ រួមទាំងវិស័យឯកជននិងសង្គមស៊ីវិលផង។ យ៉ាងណាមិញ ចំណុចខ្សោយនៅក្នុងនេះគឺបញ្ហាប្រសិទ្ធភាពនៃការអនុវត្តដែលពាក់ព័ន្ធជាសំខាន់ទៅនឹងសមត្ថភាពស្ថាប័ន និងប្រសិទ្ធភាពនៃការសម្របសម្រួលរបស់ក្រសួងស្ថាប័ននៅក្នុងការដាក់ចេញនិងអនុវត្តនូវវិធានការគោលនយោបាយជាក់ស្តែង មួយវិញទៀតសកម្មភាពអនុវត្តប្រចាំថ្ងៃក៏នៅមានគម្លាតមិនទាន់មានការផ្សារភ្ជាប់ល្អទៅនឹងគោលបំណង និងគោលនយោបាយរបស់រាជរដ្ឋាភិបាលនិងរបស់ក្រសួងស្ថាប័ន។
ក្នុងន័យនេះ ភាពចាំបាច់នៃការអនុវត្តនូវយុទ្ធសាស្ត្រចតុកោណដំណាក់កាលទី៤ ទៅមុខទៀត ត្រូវបានឆ្លុះបញ្ចាំងនៅក្នុងទិដ្ឋភាពសំខាន់ៗដូចខាងក្រោម៖
ទី១-ភាពចំបាច់ក្នុងការបន្តពង្រឹងនិងពង្រីកនូវសមិទ្ធផលនានាដែលរាជរដ្ឋាភិបាលសម្រេចបានក្នុងនីតិកាលទី៥ កន្លងមក ក៏ដូចជាការបញ្ចប់កិច្ចការដែលសេសសល់នៅក្នុងក្របខណ្ឌយុទ្ធសាស្ត្រចតុកោណទាំងបីដំណាក់កាលមុន តាមរយៈការបន្តពង្រឹងសន្តិភាព ស្ថិរភាពនយោបាយ សន្តិសុខ និង សណ្តាប់ធ្នាប់សង្គម ការលើកស្ទួយនីតិរដ្ឋ សិទ្ធិសេរីភាពនិងសេចក្តីថ្លៃថ្នូររបស់មនុស្ស លទ្ធិប្រជាធិបតេយ្យ សេរីពហុបក្ស និងការអនុវត្តវិធានការជាក់ស្តែងនានា សំដៅលើកកម្ពស់កំរិតជីវភាព និងសុខមាលភាពរបស់ប្រជាជន ជាពិសេសកាសដោះស្រាយប្រសិទ្ធភាពនៃអភិបាលកិច្ចនិងយុត្តិធម៌សង្គម ព្រមទាំងការពង្រឹងសេវាសាធារណ គ្រប់ប្រភេទ។
ទី២-ភាពចាំបាច់ក្នុងការស្វែងរកប្រភពថ្មីដើម្បីធានាកំណើនសេដ្ឋកិច្ចខ្ពស់និងប្រកបដោយចីរភាព ដែលទាញយកប្រយោជន៍ពីកាលានុវត្តភាពក្នុងតំបន់ បង្កើនតម្លៃបន្ថែមក្នុងតំបន់វិស័យជន្ទល់សេដ្ឋកិច្ច ដែលមានស្រាប់ និង អនុវិស័យពាក់ព័ន្ធ ជំរុញការវិនិយោគក្នុងវិស័យកសិកម្ម រៀបចំខ្លួនសម្រាប់ការឈោងចាប់យកបច្ចេកវិទ្យាថ្មីៗក្នុងយុគ្គសម័យឌីជីថល សេដ្ឋកិច្ច digital នឹងឈោងចាប់យកឱកាស ក៏ដូចជាជំនះផលវិបាកពីបដិវត្តន៍ឧស្សាហកម្មទី ៤ ព្រមទាំងលើកកម្ពស់ភាពប្រកួតប្រជែងរបស់កម្ពុជា ក្នុងគោលដៅឆ្លើយតបនិងដោះស្រាយនូវកង្វល់ និងសំណូមពរថ្មីរបស់ប្រជាជនកម្ពុជានៅក្នុងដំណាក់កាលថ្មីនៃការអភិវឌ្ឍ និង គោលដៅបំរើឲ្យបេសកកម្មនៃការដឹកនាំឆ្ពោះទៅសម្រេចបានជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និង ជាប្រទេសអភិវឌ្ឍន៍នៅឆ្នាំ២០៥០។
សម្តេចតេជោនាយករដ្ឋមន្ត្រី ក៏បានបង្ហាញនូវគោលដៅយុទ្ធសាស្ត្រនិងវិស័យអាទិភាពនៃយុទ្ធសាស្ត្រចតុកោណដំណាក់កាលទី៤ ដោយរាជរដ្ឋាភិបាលបានកំណត់យកគោលដៅយុទ្ធសាស្ត្រ ៤ និង វិស័យអាទិភាព ៤ ជាការប្ដេជ្ញាចិត្តក្នុងការអនុវត្តបន្តនៅក្នុងយុទ្ធសាស្ត្រចតុកោណដំណាក់កាលទី ៤ នេះ។
គោលដៅយុទ្ធសាស្ត្រទាំង ៤ នោះរួមមាន ៖ ទី១-ធានាឲ្យបាននូវកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់ ៧ ភាគរយ ប្រកបដោយចីរភាពនិងធន់នឹងវិបត្តិ តាមរយៈការធ្វើពិពិធកម្មនៃមូលដ្ឋានសេដ្ឋកិច្ចថ្មីៗដោយទូលំទូលាយនិងភាពប្រកួតប្រជែងជាមួយនឹងការថែរក្សាស្ថិរភាពម៉ាក្រូសេដ្ឋកិច្ច តាមរយៈការគ្រប់គ្រងអតិផរណាឲ្យនៅទាប ការធានាស្ថេរភាពអត្រាប្ដូរប្រាក់ និងការខិតខំបង្កើនទុនបម្រុងជាប្រចាំ និងការគ្រប់គ្រងបំណុលសាធារណៈដោយគត់ម៉ត់។
ទី២-ការបង្កើតការងារឲ្យបានកាន់តែច្រើនទាំងបរិមាណនិងគុណភាពជូនដល់ប្រជាជនកម្ពុជា ជាពិសេសសម្រាប់ស្រទាប់យុវជន តាមរយៈការផ្ដល់ជំនាញព័ត៌មានទីផ្សារការងារ ការកែលម្អលក្ខខណ្ឌការងារ ការលើកកម្ពស់សកម្មភាពធុរកិច្ច និងការជំរុញការវិនិយោគទាំងក្នុងប្រទេសនិងក្រៅប្រទេស។
ទី៣-សម្រេចឲ្យបាននូវគោលដៅនៃការកាត់បន្ថយភាពក្រីក្រឲ្យស្ថិតនៅក្នុងអាត្រាទាបជាង១០ ភាគរយ។ ការពារមិនឲ្យភាពក្រីក្រវិលត្រឡប់មកវិញ ដោយផ្តោតលើការលើកកម្ពស់ ការចូលរួមក្នុងយន្តការទីផ្សារ ការអនុវត្តគោលនយោបាយគាំពារសង្គម ការកាត់បន្ថយបន្ទុកជីវភាពរស់នៅ និង ការផ្តល់សេវាសាធារណប្រកបដោយគុណភាព និងការកាត់បន្ថយគម្លាតសង្គម។
ទី៤-ការបន្តពង្រឹងសមត្ថភាពនិងអភិបាលកិច្ចនៃស្ថាប័នរដ្ឋ ទាំងថ្នាក់ជាតិនិងថ្នាក់ក្រោមជាតិ ដើម្បីធានានូវប្រសិទ្ធភាពនិងសក្តិសិទ្ធភាពនៃសេវាសាធារណៈសំដៅបម្រើប្រជាជនឲ្យបានកាន់តែប្រសើរឡើង ក៏ដូចជាលើកកម្ពស់បរិយាកាសធុរកិច្ចនិងបរិស្ថានអំណោយផល។
ចំណែកវិស័យអាទិភាពទាំង៤ សម្តេចតេជោបានធ្វើការបញ្ជាក់ថា ក្នុងនីតិកាលកន្លងមករដ្ឋាភិបាលបានកំណត់យកអាទិភាពចំនួន ៤ គឺ ផ្លូវ ទឹក ភ្លើង និង មនុស្ស ដើម្បីអភិវឌ្ឍន៍ប្រទេសដែលលំដាប់នោះត្រូវបានផ្លាស់ប្ដូរទៅតាមដំណាក់កាលនីមួយៗនៃការអភិវឌ្ឍប្រទេស។
ក្នុងដំណាក់កាលពីខាងដើមយុទ្ធសាស្ត្រចតុកោណបានផ្ដោតអាទិភាពទី១ ទៅលើផ្លូវ ហើយទឹក ភ្លើងនិងមនុស្សជាអាទីភាពបន្តបន្ទាប់ ។ ក្នុងយុទ្ធសាស្ត្រចតុកោណដំណាក់កាលទី ៣ មនុស្សបានក្លាយជាអាទិភាពទី១ វិញ ហើយ ផ្លូវ ទឹក ភ្លើង បានក្លាយជាអទិភាពបន្តបន្ទាប់ ។ សម្រាប់យុទ្ធសាស្ត្រចតុកោណដំណាក់កាលទី៤ នឹងផ្ដោតការយកចិត្តទុកដាក់លើវិស័យអាទិភាព ៤ នេះដដែល ដោយតម្កល់មនុស្សជាអតិភាពនៅលើទេ។
សម្តេចតេជោ ក៏បានបង្ហាញផងដែរថា រចនាសម្ព័ន្ធនៃយុទ្ធសាស្ត្រចតុកោណដំណាក់កាលទី៤ នៅតែរក្សាជារួមនូវសមាសភាពនិងរចនាសម្ព័ន្ធដើមរបស់ខ្លួនដដែលពោលគឺ៖
ក-ស្នូលនៃយុទ្ធសាស្ត្រ គឺការបង្កើនល្បឿននៃការកែទម្រង់អភិបាលកិច្ច។
ខ-បរិស្ថានគ្របដណ្តប់សម្រាប់ការអនុវត្តយុទ្ធសាស្ត្រទាំងមូល ។
គ-យុទ្ធសាស្ត្រទាំង ៤ ដែលរួមមាន ១-ការអភិវឌ្ឍធនធានមនុស្ស ,២-ការធ្វើពិពិតកម្មសេដ្ឋកិច្ច ,៣-ការអភិវឌ្ឍវិស័យឯកជននិងការងារ,៤-ការអភិវឌ្ឍប្រកបដោយចេរភាពនិងបរិយាប័ន ។
ឃ-មុំយុទ្ធសាស្ត្រចតុកោណនីមួយៗ គ្រាន់តែធ្វើការកែសម្រួលទៅតាមការដ្ឋាននិងមុំមួយចំនួននៃយុទ្ធសាស្ត្រនេះ និងបានបញ្ចូលនូវចំណុចអាទិភាពថ្មីមួយចំនួនដែលបានសំរិតសំរាំង និងសម្រួចសកម្មភាពមួយចំនួនបន្ថែមទៀតដើម្បីឲ្យស្របតាមស្ថានភាពជាក់ស្តែងនូវ បរិកាថ្មីៗរបស់កម្ពុជា។
ខ្លឹមសារសង្ខេបនៃយុទ្ធសាស្ត្រចតុកោណដំណាក់កាលទី៤ លើមូលដ្ឋាននៃរចនាសម្ព័ន្ធខាងលើ គ្រប់ផ្នែកគឺមានភាពប្រហាក់ប្រហែលគ្នាទៅនិង យុទ្ធសាស្ត្រចតុកោណដំណាក់កាលទី៣ ផងដែរ៕
Source: Kampuchea Thmey Daily
0 Comments