សៀមរាប ៖ សមត្ថកិច្ចបានឲ្យដឹងថា នាយកសាលាអន្លង់សំណរបើកម៉ូតូឆ្លងផ្លូវមិនប្រុងប្រយ័ត្ន ត្រូវបានរថយន្តស៊ាំយ៉ុងបុកពេញទំហឹងបណ្តាលឲ្យស្លាប់ ខណៈបញ្ជូនដល់នៅមន្ទីរពេទ្យ។ ចំណែកម្ចាស់រថយន្តរត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅថ្ងៃទី៦ ខែកញ្ញា ឆ្នាំ២០១៨តាមបណ្តោយផ្លូវជាតិលេខ៦ ក្នុងភូមិកំពង់ក្ដី១ ឃុំកំពង់ក្ដី ស្រុកជីក្រែង ខេត្តសៀមរាប។
នគរបាលស្រុកជីក្រែងបានឲ្យដឹងថា នៅមុនពេលកើតហេតុគេបានឃើញរថយន្តម៉ាកសាំយ៉ុង ពណ៌ស ពាក់ស្លាកលេខ សៀមរាប 2B-8338 បើកបរដោយជនមិនស្គាល់អត្តសញ្ញាណបានបើកបរពីទិសកើតទៅទិសលិច។ចំណែកម៉ូតូម៉ាក Wave ពណ៌ខ្មៅ ពាក់ស្លាកលេខ សៀមរាប 1D-8134 បានបើកបរដោយឈ្មោះ ឡាយ ភិរម្យ ភេទប្រុស អាយុ៤៨ឆ្នាំ រស់នៅភូមិស្រមរ ឃុំជីក្រែង ស្រុកជីក្រែង ខេត្តសៀមរាបមុខរបរ ជានាយកសាលាអន្លង់សំណរ។
រថយន្ដ និង ម៉ូតូត្រូវបានសមត្ថកិច្ចយកទៅរក្សាទុកអធិការនគរបាលស្រុកជីក្រែងដើម្បីរង់ចាំធ្វើការដោះស្រាយតាមផ្លូវច្បាប់ ចំណែកសាកសពត្រូវបានប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments