ភ្នំពេញ ៖ បុរសកំហូចម្នាក់ បានលួចយកលុយពីអតិថិជនរបស់ក្រុមហ៊ុន ទៅលេងល្បែងអស់ហើយ និងគ្មានប្រាក់សងក្រុមហ៊ុនវិញ ត្រូវបានកម្លាំងកងរាជអាវុធហត្ថរាជធានីភ្នំពេញ ចាប់ខ្លួន តាមពាក្យបណ្តឹងរបស់ក្រុមហ៊ុន ហើយកសាងសំណុំរឿងបញ្ជូនមកតុលាការនៅថ្ងៃទី៧ខែកញ្ញា ឆ្នាំ២០១៨។
មន្ត្រីអាវុធហត្ថនិយាយថា ជនសង្ស័យឈ្មោះ អ៊ុក សុផាន់ណា អាយុ៣៦ឆ្នាំ មានទីលំនៅផ្ទះលេខ៣១ ផ្លូវលំ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ។ ជនសង្ស័យរូបនេះ ត្រូវបានកម្លាំងកងរាជអាវុធហត្ថរាជធានីភ្នំពេញចាប់ខ្លួន កាលពីព្រឹកថ្ងៃទី៥ ខែកញ្ញា ឆ្នាំ២០១៨ នៅម្តុំស្ថានីយចាក់ប្រេងសូគីមិច ក្បែរអតីតរង្វង់មូលទួលគោក សង្កាត់បឹងកក់២ ខណ្ឌទួលគោក។
ការចាប់ខ្លួននេះ ធ្វើឡើងបន្ទាប់ពីទទួលបានពាក្យបណ្តឹងរបស់ជនរងគ្រោះ ដោយបានប្តឹងចោទប្រកាន់ថា ជនសង្ស័យបានប្រមូលលុយពីអតិថិជនរបស់ក្រុមហ៊ុន មិនយកទៅបង់ឲ្យក្រុមហ៊ុន ម្តងហើយម្តងទៀត។ យ៉ាងណាក៏ដោយមន្ត្រីអាវុធហត្ថមិនបានបង្ហើបពីចំនួនទឹកប្រាក់នោះទេ។
ចំណែកជនសង្ស័យបានសារភាពថា រូបគេយកលុយពីអតិថិជន របស់ក្រុមហ៊ុនទៅលេងល្បែងអស់ហើយ និងគ្មានប្រាក់សងក្រុមហ៊ុនវិញ ទើបអាវុធហត្ថចាប់ខ្លួនតែម្តងទៅ៕
Source: Kampuchea Thmey Daily
0 Comments