ភ្នំពេញ ៖ លោក លី ឃឹ ឈាង នាយករដ្ឋមន្ត្រីនៃក្រុមប្រឹក្សារដ្ឋនៃសាធារណរដ្ឋប្រជាមានិតចិនបានចូលរួមអបអរសាទរចំពោះសម្តេចតេជោហ៊ុន សែន ដែលត្រូវបានជ្រើសតាំងជានាយករដ្ឋមន្ត្រីសាជាថ្មីទៀត បន្ទាប់ពីរដ្ឋសភានៃព្រះរាជាណាចក្រកម្ពុជាបានបោះឆ្នោតផ្តល់សេចក្តីទុកចិត្តជាឯកច្ឆន្ទ កាលពីថ្ងៃទី៦ ខែកញ្ញារួចមក។
លោក លី ឃឹ ឈាង នាយករដ្ឋមន្ត្រីនៃក្រុមប្រឹក្សារដ្ឋនៃសាធារណរដ្ឋប្រជាមានិតចិនបានអះអាងថា នឹងបង្កើនការសហការជាមួយកម្ពុជាដើម្បីជំរុញឆ្ពោះទៅមុខក្នុងការបង្កើតសហគមន៍នៃអនាគតរួមគ្នាមួយរវាងចិន និង កម្ពុជា ជាយុទ្ធសាស្ត្រសំដៅឈានទៅរួមចំណែកជាវិជ្ជមានក្នុងការរក្សាបាននូវសន្តិភាពនិងស្ថិរភាពក្នុងតំបន់ និង ពិភពលោក។
ថ្លែងនៅក្នុងលិខិតអបអរសាទរមួយកាលពីថ្ងៃទី៦កញ្ញាដែលបានផ្សព្វផ្សាយនៅតាមបណ្តាសារព័ត៌មានក្នុងស្រុក លោកនាយករដ្ឋមន្ត្រីចិនបានមានប្រសាសន៍ថា «ខ្ញុំសូមសំដែងការកោតសរសើរយ៉ាងកក់ក្តៅក្នុងនាមរដ្ឋាភិបាលចិននិងក្នុងនាមខ្ញុំផ្ទាល់ជូនឯកឧត្តមលោកជំទាវជាថ្មីម្តងទៀតស្តីពីជំហររបស់នាយករដ្ឋមន្ត្រីនៃរាជរដ្ឋាភិបាលកម្ពុជាថ្មី»។
លោកនាយករដ្ឋមន្ត្រីចិនសង្ឃឹមថា ក្រោមការដឹកនាំដ៏មុតមាំរបស់សម្តេចតេជោហ៊ុន សែនប្រជាជនកម្ពុជានឹងបន្តការរីកចម្រើនទៅមុខក្នុងបុព្វហេតុនៃការស្ថាបនាជាតិហើយភាគីចិនមានសេចក្តីរីករាយយ៉ាងជ្រាលជ្រៅហើយជឿជាក់ថា សម្តេចតេជោហ៊ុន សែន នឹងបន្តដឹកនាំប្រជាជនកម្ពុជាដើម្បីកសាងប្រទេសឲ្យមានវិបុលភាពនិងរឹងមាំជាងមុន។
លោកនាយករដ្ឋមន្ត្រីបានបន្តទៀតថា ប៉ុន្មានឆ្នាំថ្មីៗនេះមានការផ្លាស់ប្តូរថ្នាក់ខ្ពស់ជាញឹកញាប់ហើយមានសមិទ្ធផលនៃកិច្ចសហប្រតិបត្តិការប្រកបដោយផ្លែផ្កានិងការសម្របសម្រួលពហុភាគីជិតស្និទ្ធរវាងចិន និង កម្ពុជា ដែលធ្វើឲ្យទំនាក់ទំនងចិន-កម្ពុជា បានសម្រេចនូវការអភិវឌ្ឍដ៏ទូលំទូលាយដែលនាំមកនូវផលប្រយោជន៍ជាក់ស្តែងដល់ប្រទេសនិងប្រជាជនទាំងពីរ។
នៅក្នុងលិខិតដដែលនោះលោក នាយករដ្ឋមន្ត្រីបានបញ្ជាក់ថា បានជួបនឹងធ្វើកិច្ចចរចាជាមួយសម្តេចជាច្រើនលើក ហើយបានរក្សាទំនាក់ទំនងការងារល្អនិងមិត្តភាពផ្ទាល់ខ្លួនយ៉ាងជ្រាលជ្រៅ។
លោកនាយករដ្ឋមន្ត្រីបានអះអាងទៀតថា ដើម្បីប្រារព្ធខួបលើកទី៦០ នៃការបង្កើតទំនាក់ទំនងការទូតទ្វេភាគី លោកនឹងភ្ជាប់ការងារជាមួយសម្តេច ដើម្បីជំរុញឆ្ពោះទៅមុខក្នុងការបង្កើតសហគមន៍នៃអនាគតរួមគ្នាមួយរវាងចិននិងកម្ពុជា ដោយមានសារៈសំខាន់ជាយុទ្ធសាស្ត្រដែលបានរួមចំណែកជាវិជ្ជមានចំពោះ សន្តិភាពនិងស្ថិរភាពក្នុងតំបន់និងពិភពលោក។
គួរបញ្ជាក់ថា កាលពីថ្ងៃទី៦ខែកញ្ញាឆ្នាំ២០១៨សម្តេចតេជោហ៊ុនសែនត្រូវបានរដ្ឋសភានៃព្រះរាជាណាចក្រកម្ពុជាបោះឆ្នោត ផ្តល់ក្តីទុកចិត្តឲ្យជានាយករដ្ឋមន្ត្រីដើម្បីបន្តដឹកនាំរាជរដ្ឋាភិបាលអាណត្តិទី៦បន្តទៀត ដើម្បីការរីកចម្រើនសេដ្ឋកិច្ច និងសង្គម។
សម្តេចនាយករដ្ឋមន្ត្រីបានបង្ហាញពីការប្តេជ្ញាចិត្ត ប្រឹងប្រែងយកឲ្យអស់ពីសមត្ថភាព ក្នុងការដឹកនាំស្ថាប័នរបស់ខ្លួនដើម្បីធានាបាននូវសុខសន្តិភាព ជំរុញការអភិវឌ្ឍសេដ្ឋកិច្ច-សង្គម និងលើកកម្ពស់ស្ថានភាពជីវភាពរស់នៅរបស់ប្រជាពលរដ្ឋ ឲ្យបានកាន់តែរីកចម្រើនបន្ថែមទៀតឲ្យស្របតាមជំនឿទុកចិត្តដែលប្រជាពលរដ្ឋបានបោះឆ្នោតគាំទ្រកាលពីពេលថ្មីៗនេះ៕
Source: Kampuchea Thmey Daily
0 Comments