ក្រុមអ្នកភូមិក្នុងរដ្ឋភាគខាងជើងចាមមូ និងកាស្មៀរបស់ប្រទេសឥណ្ឌា កំពុងរស់នៅទាំងសេចក្តីភ័យខ្លាច ក្រោយពេលមានការផ្លោងគ្រាប់កាំភ្លើងធំ និងការផ្ទុះអាវុធដោយទាហានប៉ាគីស្ថាន ជាហេតុបណ្ដាលឲ្យមនុស្ស៦នាក់ បាត់បង់ជីវិត ក្នុងនោះរួមទាំងស្ត្រីម្នាក់ផងដែរ ហើយមនុស្សយ៉ាងហោច១០នាក់ផ្សេងទៀត បានរងរបួស។
ការផ្លោងគ្រាប់កាំភ្លើងត្បាល់ និងការបាញ់តដៃដាក់គ្នា បានកើតមានឡើងតាំងពីថ្ងៃសុក្រមកម្ល៉េះ នៅថ្ងៃដែលប្រទេសប៉ាគីស្ថាន ប្រារព្ធទិវាឯករាជជាតិរបស់ពួកគេ ពោលគឺរយៈពេល១ថ្ងៃប៉ុណ្ណោះ មុនពេលដែលប្រទេសឥណ្ឌា អបអរថ្ងៃទិវាទទួលបានឯករាជ្យពីចក្រភពអង់គ្លេស ឆ្នាំ១៩៤៧។
ចាប់តាំងពីសប្តាហ៍មុនមក ភាពតានតឹងបានកើនឡើងនៅតាមខ្សែបន្ទាត់ព្រំដែនរវាងប្រទេសទាំងពីរ ដែលជាខ្សែបន្ទាត់ឈប់បាញ់បែងចែករវាងប្រទេសឥណ្ឌា និងប៉ាគីស្ថាន។
ប្រភពព័ត៌មានបានឲ្យដឹងថា អ្នកភូមិជាច្រើននាក់ បានរត់ភៀសខ្លួនចេញពីផ្ទះសម្បែងរបស់ខ្លួនទៅកាន់ទីសុវត្ថិភាព ក្រោយគ្រាប់កាំភ្លើងត្រូវចំលំនៅដ្ឋានរបស់ពួកគេរួចមកនោះ។
អ្នកស្រុកម្នាក់ឈ្មោះ មហាម៉ាដ រ៉ាហ្សាក់ បាននិយាយថា ស្ថានភាពកាន់តែមិនអាចព្យាករណ៍បានមុន ហើយការផ្លោងគ្រាប់កាំភ្លើងធំ និងការបាញ់តគ្នា នៅតាមតំបន់ព្រំដែន បានធ្វើឲ្យខូចខាតទ្រព្យសម្បតិ្ត និងអាយុជីវិតមនុស្សជាច្រើននាក់៕
សេចក្តីភ័យខ្លាច បានកើតមានឡើងនៅក្នុងតំបន់កាស្មៀ ក្រោយផ្ទុះអាវុធនៅតាមព្រំដែន
0 Comments