សិស្សរៀនបានប្រកបដោយជោគជ័យតែ ក៏មានសំណួរថា តើគ្រូបង្រៀនត្រូវប្រើល្បិចបង្រៀនយ៉ាងណាដើម្បីឲ្យសិស្សបានទទួលជោគជ័យ? តើគ្រូបង្រៀនអាចធ្វើបានដែរឬទេ? គេឆ្លើយថា អាចធ្វើបានដើម្បីឲ្យសិស្សក្នុងថ្នាក់រៀនទាំងមូលបានសម្រេចនូវជោគជ័យ មួយរយភាគរយនោះ។
មុននឹងធ្វើការរៀបរាប់អំពីវិធីដែលនាំឲ្យសិស្សបានទទួលជោគជ័យនៃការបង្រៀននិងរៀន នោះយើងគប្បីបញ្ជាក់អំពី មូលហេតុដែលបណ្តាលឲ្យគ្រូបង្រៀនចង់ឲ្យសិស្សបានទទួលជោគជ័យជាមុនសិន។ ហេតុផលដែលនាំឲ្យគ្រូបង្រៀនចង់ធ្វើការបង្រៀនដោយឲ្យសិស្សបានទទួលនូវជោគជ័យគ្រប់គ្នានោះ ព្រោះកាលណាសិស្សបានទទួលជោគជ័យ គឺតែងធ្វើឲ្យសិស្សនោះមានចិត្តអបអរសប្បាយ និងមានចិត្តស្រឡាញ់ នៃការសិក្សាលើមុខវិជ្ជានោះបន្តទៀត ដើម្បីរូបគេបានទទួលជោគជ័យជាកិត្តិយសរបស់ខ្លួន ឬគេទទួលបាននូវការសរសើរលើកទឹកចិត្តពីគ្រូបង្រៀនគួរឲ្យមានការរំភើបបំផុត។ សិស្សបានទទួលនូវជោគជ័យក្នុងថ្នាក់ តែងធ្វើឲ្យសិស្សនោះកាន់តែចង់រៀន និងកាន់តែស្រឡាញ់ថ្នាក់រៀន និងកាន់តែចង់ធ្វើកិច្ចការដែលគ្រូបានដាក់ឲ្យធ្វើរាល់ថ្ងៃ។ ប្រការសំខាន់ម្យ៉ាងទៀត នៅពេលដែលសិស្សរៀនបានទទួលនូវជោគជ័យនោះ គឺធ្វើឲ្យសិស្សនោះមិនមានការអវត្តមាននៅពេលរៀនផង ហើយក៏ជាចំណុចនៃការកាត់បន្ថយនូវអត្រាត្រួតថ្នាក់ និងកាត់បន្ថយនូវអត្រានៃការបោះបង់ការសិក្សាផង។
ដោយយល់ឃើញថា បើសិស្សបានទទួលជោគជ័យនៃការសិក្សានោះ គឺសិស្សកាន់តែសប្បាយនិងកាន់តែចង់រៀនយ៉ាងជក់ចិត្តឥតបែកបែរនោះ ទេទើបគ្រូបង្រៀនបានរិះរកមធ្យោបាយដើម្បីឲ្យសិស្សរបស់គាត់រៀនបានជោគជ័យទាំងអស់គ្នា។ ដូចនេះតាមរយៈគ្រូស្គាល់សិស្ស គឺត្រូវស្គាល់នូវសមត្ថភាពរបស់សិស្ស ឬស្គាល់នូវគុណភាព និងកម្រិតកម្ពស់នៃការរៀនរបស់សិស្សគ្រប់គ្នា ទាំងអស់។ ជាក់ស្តែងក្នុងថ្នាក់រៀននីមួយៗ តែងមានសិស្សប្រហែល៤០នាក់ ដោយមានការលាយចម្រុះគ្នា ប្រុសស្រី។ ក្នុងនោះ ចំពោះសិស្សរៀនពូកែប្រហែល១០នាក់។ ឯសិស្សរៀនមធ្យមប្រហែល២០នាក់។ ចំណែកឯសិស្សខ្សោយក៏មានប្រហែល១០នាក់ ផងដែរ។ ដូចនេះនៅពេលរៀនគ្រូបង្រៀនតែងមានការចាត់តាំងតាមរយៈការបែងចែកជាក្រុម ដើម្បីឲ្យសិស្សចូលរួមកសាងនូវខ្លឹមសារមេរៀននីមួយៗ ជាមេរៀនប្រចាំថ្ងៃ ទៅតាមកាលវិភាគនៃសប្តាហ៍។ ដើម្បីឲ្យសិស្សបានចេះចែកជាក្រុមដោយមានសមាសភាពលាយចម្រុះគ្នា។ បានសេចក្តីថា ក្រុមនីមួយៗ តែងមានការលាយឡំទៅដោយសិស្សរៀន ពូកែ សិស្សរៀនមធ្យមផង និងមានសិស្សរៀនខ្សោយផង។ សិស្សទាំង៣ប្រភេទនេះតែងមានការចូលរួមរៀនជាមួយគ្នាដែលគេបានស្តាប់គ្នាទៅវិញទៅមក និងមានការសាកសួរគ្នាទៅវិញទៅមកផង។ ជាពិសេសសិស្សក្នុងក្រុមតែងមានការយល់ ឬបានចេះដូចគ្នា និងស្មើគ្នា។ ក្នុងនោះ ចំពោះសិស្សដែលរៀនខ្សោយក៏មានមុខមាត់ស្រស់ស្រាយ ជាមួយនឹងគេតាមសមាជិកក្រុមដែលបានអនុវត្តការងារបានត្រឹមត្រូវហើយដែលជាជោគជ័យរួមគ្នាទាំងស្រុង។
ម្យ៉ាងទៀតប្រសិនបើគ្រូបង្រៀនបានដាក់កិច្ចការឲ្យក្រុមនីមួយៗ ត្រូវបំពេញនោះក៏មានការបែងចែកសមាជិកក្រុមផ្សេងទៀតដែរ។ ឧទាហរណ៍ថា មានក្រុមសិស្សរៀនពូកែ ២ក្រុម ក្រុមសិស្សរៀនមធ្យម៣ក្រុម និងក្រុមសិស្សរៀនយឺត២ក្រុម។ បន្ទាប់គ្រូបង្រៀនបានកំណត់ដោយការដាក់ប្រធានបទឲ្យសិស្សធ្វើដោយឡែកៗ តាមកម្រិតនៃក្រុមគឺ ក្រុមសិស្សរៀនពូកែ មានប្រធានបទបែបពិបាកជាងគេ ក្រុមសិស្សរៀនមធ្យមដាក់កិច្ចការល្មមៗ ដោយមិនសូវពិបាកពេក និងក្រុមសិស្សរៀនខ្សោយ គ្រូដាក់ប្រធានបទបែបងាយស្រួលជាងគេ។ បានសេចក្តីថា សិស្សក្នុងថ្នាក់ទាំងមូលសុទ្ធតែអនុវត្តកិច្ចការបានសម្រេចជោគជ័យទាំងអស់គ្នា។ ទាំងសិស្សរៀនពូកែ និងទាំងសិស្សរៀនមធ្យមនិងទាំងសិស្សរៀនខ្សោយ ផងនោះ បានសម្រេចតាមគោលបំណងរបស់ខ្លួនម្នាក់ៗ គឺជោគជ័យ ឬទៅដល់ទិសដៅស្មើគ្នា។
ដូចនេះនៅពេលដែលសិស្សម្នាក់ៗ បានបញ្ចេញនូវសមត្ថភាពផ្ទាល់ខ្លួនក្នុងការអនុវត្តកិច្ចការបានសម្រេចជោគជ័យហើយនោះ ពួកគេតែងមានការសប្បាយរីករាយចិត្ត និងមានចិត្តចង់រៀននិងចង់បន្តការស្រាវជ្រាវប្រកបដោយការឧស្សាហ៍ព្យាយាមប្រឹងប្រែងគ្រប់គ្នាដើម្បីបានបន្តនូវការទទួលនូវជោគជ័យថ្មីទៀត ពិតប្រាកដ៕
គោលបំណង នៃការបង្រៀនរបស់គ្រូ ដើម្បីឲ្យសិស្សទទួលបានជោគជ័យ
0 Comments