ប្រដាល់ ៖ ធន់ ចាន់តាក់ អ្នកប្រដាល់សមាគមកីឡាក្រសួងការពារជាតិ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃ Phek Thieng ដោយប្រកួតគ្នាក្នុងទម្ងន់៦៣,៥០០ គ.ក្រ។ ពីរនាក់នេះ ប្រកួតគ្នានៅលើសង្វៀនGanzberg Top Fighter របស់SEATV នាយប់ថ្ងៃសៅរ៍ ទី២៤ ខែវិច្ឆិកា ឆ្នាំ២០១៨ខាងមុខនេះ។
ចាន់តាក់ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃប្រមាណជាង២០នាក់ទាំងលើកនេះ។ កាលពីជួបប្រកួតជាមួយថៃលើកចុងក្រោយនៅសង្វៀនSEATVនេះ(០៩កញ្ញា២០១៨) គេបានវាយឈ្នះថៃSoun Tepheap ដោយពិន្ទុ។
ធន់ ចាន់តាក់ មានប្រវត្តិប្រកួតប្រមាណជា៧០លើក ក្នុងនោះវាយឈ្នះ៥៨ ចាញ់១២លើក មិនដែលស្មើ។ គេជាអ្នកប្រដាល់ជើងខ្លាំងស្រករក្រោយ ដែលមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថា ចាន់តាក់ អាចយកឈ្នះ Phek Thieng បានឬក៏អត់នោះទេ?។
Phek Thieng ជាជើងខ្លាំង ដែលមានស្នៀតទាត់ និងកណ្ដាប់ដៃល្អ។ ដូច្នេះ ធន់ ចាន់តាក់ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អ និងខ្លាំង។ អ្នកប្រដាល់ថៃរូបនេះ ធ្លាប់មកប្រកួតនៅកម្ពុជាច្រើនលើកហើយ ដែលការមកប្រកួតលើកចុងក្រោយនេះ(០៩កញ្ញា២០១៨) គេប្រកួតផ្ដាច់ព្រ័ត្រខ្សែក្រវាត់Wurkz ជាមួយ ឡុង សំណាង អ្នកប្រដាល់ក្លិបសាលវ័ន្តកីឡា ហើយវាយចាញ់ សំណាង ដោយពិន្ទុ។ ដូច្នេះ Phek Thieng គេជាជើងឯករង។
អ្នកប្រដាល់ថៃរូបនេះ មានប្រវត្តិប្រកួតចំនួន៦៥លើក ឈ្នះ៥៥លើកចាញ់១០លើកមិនដែលស្មើ។ ចាំមើល រវាង ធន់ ចាន់តាក់ និង Phek Thieng តើនរណាជាអ្នកឈ្នះនៅក្នុងការជួបគ្នានេះ?។
ខាំ ផាន់នី អ្នកប្រដាល់ក្លិបដីឡូត៍មានរិទ្ធខេត្តបន្ទាយមានជ័យ នឹងជួបសាកកណ្ដាប់ដៃជាមួយអ្នកប្រដាល់ជនជាតិបារាំងNaser។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ ត្រូវបានគេរំពឹងថា ខាំ ផានី ពុំអាចយកឈ្នះ Naser នោះឡើយ។
Naser គេវាយខ្លាំង និងមានស្នៀតប្រដាល់ល្អថែមទៀត។ គេធ្លាប់មកប្រកួតនៅកម្ពុជាប៉ុន្មានលើកហើយ ដែលការមកលើកចុងក្រោយ(០៦តុលា២០១៨) Naser បានផ្ដួលយកឈ្នះតូច ទូ អ្នកប្រដាល់សមាគមកីឡាក្រសួងការពារជាតិ ក្នុងទឹកទី២។
យ៉ាងណា ខាំ ផានី គេក៏ខ្លាំងគួរសមដែរ។ អ្នកប្រដាល់ស្រករក្រោយម្នាក់នេះ វាយមិនដកដៃទេ ហើយស្នៀតប្រដាល់របស់គេ ក៏ល្អដែរ។ គេឡើងប្រកួតចុងក្រោយនេះ បានផ្ដួលជើងចាស់ វ៉ែន សុវណ្ណ ក្លិបកងកេងមានរិទ្ធខេត្តបាត់ដំបងក្នុងទឹកទី២។
ខាំ ផានី មានប្រវត្តិប្រកួតទើបបាន២៥លើកប៉ុណ្ណោះ ក្នុងនោះគេវាយឈ្នះ២១លើក ចាញ់០៤លើក និងមិនដែលស្មើឡើយ ។ ពេលនេះ ផានី ជួបជាមួយបារាំងNaser ពុំដឹងថាអាចទប់ទល់ជាមួយNaser បាន ឬអត់នោះទេ?។
ចំពោះព្រឹត្តិការណ៍ប្រកួតប្រដាល់ជម្រុះដណ្ដើមប្រាក់១០លានរៀល របស់ក្រុមហ៊ុនស្រាបៀGanzberg ក្នុងប្រភេទទម្ងន់៥៤គីឡូក្រាម ដែលជាការប្រកួតសប្ដាហ៍ទី៤ លើកទី២របស់ គឿម សុវណ្ណឌឿត , គួន សុវណ្ណ , សៅ ប៊ុនធឿន និង លីន វណ្ណៈ។
សម្រាប់ការប្រកួតជម្រុះលើកទី២នេះ គឺគឿម សុវណ្ណឌឿត ក្លិបមោងឬស្សីមរតកគុនខ្មែរ ត្រូវជួបប្រកួតជាមួយ លីន វណ្ណៈ ក្លិបបូរីរាជសីហ៍មានរិទ្ធ ហើយ សៅ ប៊ុនធឿន ក្លិបតាព្រហ្មមានជ័យ ត្រូវជួបប្រកួតជាមួយ គួន សុវណ្ណៈ ក្លិបយុវវាលស្បូវខណ្ឌច្បារអំពៅ។
រវាង គឿម សុវណ្ណឌឿត និង លីន វណ្ណៈនេះ មិនធ្លាប់ដែលប៉ះគ្នាទេកន្លងមក។ ពួកគេទាំងពីរ សុទ្ធតែមានសមត្ថភាពបច្ចេកទេសខ្ពស់ដូចគ្នា ដែលមិនមាននរណាហ៊ានមើលស្រាលគ្នានោះទេ ក្នុងការជួបគ្នាលើកដំបូងនេះ។
ចាំមើល តើក្នុងការប្រកួតរវាង គឿម សុវណ្ណឌឿត និង លីន វណ្ណៈ តើអ្នកណារកបាន៣ពិន្ទុនោះ?។គឿម សុវណ្ណឌឿត ប្រកួតលើកទី១ គេវាយចាញ់ គួន សុវណ្ណ ក្នុងទឹកទី៤ ឯការប្រកួតលើកទី១របស់លីន វណ្ណៈ គឺវាយចាញ់ សៅ ប៊ុនធឿន ក្លិបតាព្រហ្មមានជ័យ ដោយពិន្ទុ។
ចំពោះ ការជួបគ្នា រវាង សៅ ប៊ុនធឿន និង គួន សុវណ្ណ វិញនោះ ពួកគេទាំងពីរធ្លាប់ជួបគ្នាម្ដងហើយកាលពី៤ឆ្នាំមុន ដោយ សៅ ប៊ុនធឿន ចាញ់ គួន សុវណ្ណ ដោយពិន្ទុ។ ពីរនាក់នេះ ឡើងប្រកួតជាលើកទី២ សម្រាប់ការប្រកួតជម្រុះដណ្ដើមប្រាក់លាននេះ។
ក្នុងការប្រកួតជម្រុះលើកទី១នោះ សៅ ប៊ុនធឿន ឈ្នះលីន វណ្ណៈ ក្នុងទឹកទី១។ ចំណែក គួន សុវណ្ណ គេប្រកួតលើកទី១វាយឈ្នះ គឿម សុវណ្ណឌឿត ក្នុងទឹកទី៤។ ទោះជាគេមិនហ៊ានទស្សន៍ទាយមុនថានរណាជាអ្នកឈ្នះនោះ ក៏គេរំពឹងទុកថា គួន សុវណ្ណ ជាអ្នកដែលមានប្រៀបឈ្នះលើ សៅ ប៊ុនធឿន ដែរ។ ដូច្នេះចាំ មើល ការប្រកួតជាក់ស្ដែង តើនរណាជាអ្នកឈ្នះនោះ?៕
Source: Kampuchea Thmey Daily
0 Comments