កំពង់ឆ្នាំង ៖ មនុស្ស៤នាក់រងរបួសធ្ងន់ និងស្រាល នៅក្នុងហេតុការណ៍គ្រោះថ្នាក់ចរាចរណ៍ ដោយមានរថយន្តធុនធំ២គ្រឿង បានបុកគ្នានៅពេលយប់។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១រំលងអធ្រាត្រ ឈានចូលថ្ងៃទី០២ ខែកុម្ភៈ ឆ្នាំ២០១៩ ទៅចំណុចផ្លូវកោងបឹងខ្នារចន្លោះបង្គោលគីឡូម៉ែត្រលេខ១៣១ និង១៣២ ស្ថិតនៅក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៌។
សមត្ថកិច្ចនគរបាលមូលដ្ឋានបានឲ្យដឹងថា រថយន្តទី១ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ 3D 9166 បើកបរដោយ ឈ្មោះ រាជ រដ្ឋា អាយុ៤៥ឆ្នាំ រស់នៅក្នុងភូមិលំផាត់ ឃុំអូរជ្រៅ ស្រុកកំរៀង ខេត្តបាត់ដំបង បើកបរក្នុងទិសដៅបញ្ច្រាសទិសគ្នា ជាមួយរថយន្តទី២ ម៉ាកហ្វុយស៊ូ ពណ៌មាស ពាក់ស្លាកលេខ តាកែវ 3A 0887 បើកបរដោយ ឈ្មោះ ទូ ដារ៉ាន់ ភេទប្រុស អាយុ៣០ឆ្នាំ រស់នៅក្នុងភូមិគោកឋាន ក្រុងសិរីសោភ័ណ ខេត្តបន្ទាយមានជ័យ។
សមត្ថកិច្ចបានឲ្យដឹងទៀតថា នៅក្នុងហេតុការណ៍នេះ បណ្តាលឲ្យមនុស្ស៤នាក់ ដែលជាអ្នកបើកបរ និងព្រូរថយន្ត បានរងរបួសធ្ងន់ និងស្រាល ក្នុងនោះអ្នករបួសធ្ងន់ម្នាក់ ត្រូវបានសមត្ថកិច្ច ហៅរថយន្តសង្គ្រោះដឹកបញ្ជូនទៅកាន់មន្ទីរពេទ្យបង្អែកខេត្តកំពង់ឆ្នាំង។
ដោយឡែក រថយន្តធុនធំទាំង២គ្រឿង បានរងការខូចខាតធ្ងន់ ត្រូវបានសមត្ថកិច្ចនគរបាលខេត្តនាំយកមករក្សាទុក ដើម្បីការដោះស្រាយតាមនីតិវិធីច្បាប់។ ករណីគ្រោះថ្នាក់នេះ ត្រូវបានសមត្ថកិច្ចសន្និដ្ឋានថា ទំនងជាអ្នកបើកបរបើកងោក នៅផ្លូវកោង ទើបបុកគ្នាបង្កឲ្យមានគ្រោះថ្នាក់ដូចខាងលើនេះ៕
Source: Kampuchea Thmey Daily
0 Comments