ចាន់ ប៊ុនហឿន អ្នកប្រដាល់ក្លិបនិរោធមានជ័យ និង រិទ្ធ ភូលូ អ្នកប្រដាល់ក្លិបអាណាចក្រគុនខ្មែរ ពួកគេទាំងពីរនាក់នេះ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នាយប់ថ្ងៃអាទិត្យ ទី១៧ ខែកុម្ភៈ ឆ្នាំ២០១៩នេះ។
ចាន់ ប៊ុនហឿន អ្នកប្រដាល់ជើងខ្លាំងស្រករ នឹងត្រូវគេផ្គូឲ្យជួបជាមួយអ្នកប្រដាល់ជើងខ្លាំងមកពីប្រទេសថៃ ឈ្មោះ ប៉ែត សែនឡេក រ៉ាឆានុន(Phetsenlek Rachanon)។ ចាន់ ប៊ុនហឿន ជើងខ្លាំងរបស់កម្ពុជានេះ គេទើបតែផ្តួលយកឈ្នះអ្នកប្រដាល់ថៃឈ្មោះហ្វានិមិត្ត ក្នុងទឹកទី៣ កាលពីថ្ងៃទី២៧ ខែមករា ឆ្នាំ២០១៩កន្លងមកនេះ។
ចាន់ ប៊ុនហឿន ជាលើកទី៣៩របស់គេហើយ ដែលជួបប្រកួតជាមួយថៃនេះ។ ប៊ុនហឿន ប្រកួតជាមួយថៃ៣៨លើកកន្លងមកនេះ គឺឈ្នះ២៨លើក ចាញ់០៨លើក និងស្មើ០២លើក។
ប៉ែត សែនឡេក គេជាអ្នកប្រដាល់មិនដែលធ្លាប់មកប្រកួតនៅកម្ពុជាយើងនោះទេកន្លងមក។ យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ។ ព្រោះបើតាមអ្នកដឹកនាំកីឡាករថៃមកប្រកួតឲ្យដឹងនោះថា ប៉ែត សែនឡេក គេល្អនិងខ្លាំង ដែលមិនអាចមើលស្រាលបានឡើយ។ ប៉ែត សែនឡេក មានកំណត់ត្រាប្រកួតចំនួន៧៩លើក ឈ្នះ៥៥លើក ចាញ់២២លើក និងស្មើ០២លើក ហើយធ្លាប់ផ្ដួលដៃគូឲ្យសន្លប់ជាច្រើនលើក។
ចាន់ ប៊ុនហឿន គេមានប្រវត្តិប្រកួតចំនួន៨៧លើក ឈ្នះ៦៩លើក និងចាញ់១៤លើក និងស្មើ០៤លើក។ ប៊ុនហឿន គេមានថ្វីកែង និងជង្គង់ល្អណាស់ តែយ៉ាងណាការឈ្នះចាញ់រវាង ចាន់ ប៊ុនហឿន និង ប៉ែត សែនឡេក នេះ ពុំមាននរណាហ៊ានទាយមុនថាអ្នកណាឈ្នះនោះទេ ?។
ចំពោះ អ្នកប្រដាល់ជើងខ្លាំងស្រករក្រោយ រិទ្ធ ភូលូ ក្លិបអាណាចក្រគុនខ្មែរ នឹងត្រូវជួបសាកកណ្តាប់ដៃជាមួយអ្នកប្រដាល់ថៃជើងខ្លាំងឈ្មោះ ឃុម ផេត សនស៊ីលមួយថៃ (Khumpetch Sornsilmuaythai)។ ពួកគេទាំងពីរ ប្រកួតគ្នាក្នុងទម្ងន់៦៣,៥០០គីឡូក្រាម។
ជាលើកទី១៤ សម្រាប់រិទ្ធ ភូលូ ហើយ ដែលបានជួបប្រកួតជាមួយអ្នកប្រដាល់ថៃនេះ។ ក្នុង១៣លើកកន្លងមក ភូលូ វាយឈ្នះថៃ១២លើក និងចាញ់២លើក។ ការជួបថៃលើកចុងក្រោយនេះ (២៦មករា២០១៩) ភូលូ វាយឈ្នះស្មើពិន្ទុជាមួយ លំឡេង។
រិទ្ធ ភូលូ ទោះជាគេទើបបានផ្គូផ្គងឲ្យជួបបរទេសក៏ដោយ តែដោយសារមានចិត្តប្រដាល់ធំ គេឡើងប្រកួតដោយគ្មានខ្លាចញញើតទេ។ គេទើបឡើងប្រកួតបានចំនួន៦០លើកប៉ុណ្ណោះ ក្នុងនោះ វាយឈ្នះ៤៣លើក ចាញ់១៣លើក និងស្មើ០៤លើក ហើយធ្លាប់ផ្តួលដៃគូឲ្យសន្លប់បានចំនួន១៦លើក។
ឃុម ផេត គេជាអ្នកប្រដាល់ថៃជើងចាស់ ធ្លាប់មកប្រកួតនៅកម្ពុជាយើងច្រើនដងហើយកន្លងមក។
យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ។ ព្រោះបើតាមប្រវត្តិ ឃុម ផេតល្អ និងខ្លាំង ដែលមិនអាចមើលស្រាលបានឡើយ។ អ្នកប្រដាល់ថៃនេះ ជាជើងខ្លាំងទម្ងន់៦៣,៥០០គីឡូក្រាមប្រចាំនៅស្រុកថៃ។ គេមានប្រវត្តិប្រកួតតែចំនួន៧២លើក ក្នុងនោះវាយឈ្នះ៥៧លើក ចាញ់១២លើក និងស្មើ០៣លើក។
អ្នកប្រដាល់ថៃរូបនេះ មានផ្លែមុតស្រួចល្អ ទាំងកណ្តាប់ដៃ ទាត់ និង ជង្គង់ ហើយថែមទាំងមិនចេញខ្លាចទៀតផង។ បើប្រៀបជាមួយរិទ្ធ ភូលូ គឺមិនដឹងថា យ៉ាងណានោះទេ ព្រោះថា រិទ្ធ ភូលូ គេក៏វាយមិនចេះខ្លាចដែរនោះ។
យ៉ាងណា ប៉ះជាមួយរិទ្ធ ភូលូ ឃុម ផេត ក៏មិនជាស្រួលប៉ុន្មានដែរ ព្រោះថា ភូលូ គេវាយបុកខ្លាំង
កណ្តាប់ដៃខ្លាំង ទម្ងន់ជើងក៏ធ្ងន់ដែរ។ តែយ៉ាងណា រិទ្ធ ភូលូ ក៏ត្រូវប្រយ័ត្នដែរ សម្រាប់ការប្រកួតលើកនេះ។ដូច្នេះចាំមើល តើ រិទ្ធ ភូលូ អាចយកឈ្នះឃុម ផេត បានឬអត់ ក្នុងការជួបគ្នាលើកដំបូងនេះ?។
ដោយឡែក អ្នកប្រដាល់សំខាន់ ប៉ាវចិន ក្លិបរ៉ាហាប់ស្វាយប៉ាក ត្រូវគេផ្គូឲ្យជួបប្រកួតជាមួយ ជ័រ ពៅ អ្នកប្រដាល់ក្លិបថ្មគោលពោធិ៍សែនជ័យ។ ពីរនាក់នេះ ប្រកួតគ្នាក្នុងទម្ងន់៦៣,៥០០គីឡូក្រាម។ រីឯ យ៉ង វាសនា អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងត្រូវជួបប្រកួតជាមួយ ពេជ្រ អាលិ អ្នកប្រដាល់ក្លិបសមាគមយុវជន១៥៧គុនខ្មែរ ដោយជួបប្រកួតគ្នា ក្នុងប្រភេទទម្ងន់៦០គីឡូក្រាមដែរ ៕
Source: Kampuchea Thmey Daily
0 Comments