សហព័ន្ធខ្មែរកីឡាហែលទឹក នៅព្រឹកថ្ងៃទី០៥ ខែមីនា ឆ្នាំ២០១៩នេះ បានបើកវគ្គបណ្ដុះបណ្ដាលគ្រូបង្វឹកកីឡាបាល់ទឹកកម្រិត១ រយៈពេល៣ថ្ងៃ គឺពីថ្ងៃទី៥ ដល់ថ្ងៃទី៧មីនា។ វគ្គនេះ គឺ មានការជួយទំនុកបម្រុងទាំងស្រុង ពីសហព័ន្ធកីឡាហែលទឹកអន្តរជាតិ(FINA)។
វគ្គនេះ មានសិក្ខាកាមចូលរៀនចំនួន២០រូប ដែលមកសមាគមកីឡាហែលទឹកក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការណ៍ និង ដឹកជញ្ជូន ខេត្តត្បូងឃ្មុំ បាត់ដំបង កំពង់ចាម ខេត្តកណ្ដាល និង សៀមរាប។
វគ្គនេះបង្រៀនដោយគ្រូជនជាតិគុយបា គឺលោកAlexander dela Celda Brokina ។ លោក នាង សុរិទ្ធីយ៉ា អគ្គលេខាធិការរងសហព័ន្ធខ្មែរកីឡាហែលទឹក បានបញ្ជាក់ឲ្យដឹងថា កីឡាបាល់ទឹក(WaterPolo)នេះ លេងនៅក្នុងអាងសម្រាប់លោតទឹក គឺមិនមែននៅក្នុងអាងសម្រាប់ហែលនោះទេ។
ទីលានមានបណ្ដោយប្រវែង៣០ម៉ែត្រ ទទឹង២០ម៉ែត្រ កម្ពស់ទី ០,៩០ម៉ែត្រ បណ្ដោយទីប្រវែង៣ម៉ែត្រ និងលេងម្ខាងៗ៧នាក់។ កីឡាប្រភេទនេះ ក្រៅពីអាជ្ញាកណ្ដាលបញ្ជាការប្រកួតចំនួន២រូបនោះនៅមានអាជ្ញាកណ្ដាលទី៣ អ្នកកាន់នាឡិកាកំណត់ម៉ោង។ ការប្រកួតមាន៤វគ្គដែលមួយវគ្គមាន៨នាទីហើយ នៅចន្លោះវគ្គនីមួយៗសម្រាក២នាទី ចំពោះអាជ្ញាកណ្ដាលស្ថិតនៅលើគោក។
លោក Alexander dela Celda Brokina បានអះអាងថា នេះជាការបើកវគ្គលើកទី២ហើយៗកន្លងមក ក៏ធ្លាប់បានរៀបចំការប្រកួតនៅមជ្ឈមណ្ឌលហែលទឹក តេជោសែន នាខេត្តកំពង់ចាមដែរ។ វគ្គនេះគឺសង្កត់ខ្លាំងទៅលើការអនុវត្តន៍ជាក់ស្ដែង។
សម្រាប់ថ្ងៃដំបូង លោកនឹងបង្រៀនពីទ្រឹស្ដី ពីច្បាប់ប្រកួត បង្ហាត់ទ្រឹស្ដីបច្ចេកទេស ថ្ងៃទី២គឺជាថ្ងៃអនុវត្តន៍ជាក់ស្ដែងនៅក្នុងអាងទឹក និងថ្ងៃទី៣ ដែលជាថ្ងៃចុងក្រោយសិក្ខាកាមទាំងអស់ត្រូវអនុវត្តន៍តួនាទីជាគ្រូបង្ហាត់ម្ដងម្នាក់ៗ។ លោកបង្ហាញនូវជំនឿចិត្តថា ក្នុងចំណោមសិក្ខាកាមទាំង២០រូបនេះនឹងមានអ្នកក្លាយខ្លួនទៅជាគ្រូបង្ហាត់កម្រិតខ្ពស់។
លោក ហែម គីរី អគ្គលេខាធិការសហព័ន្ធ បានទាមទារឲ្យសិក្ខាកាមទាំងអស់បន្ទាប់ពីចប់វគ្គនេះទៅត្រូវបង្កើតឲ្យមានក្រុមកីឡាបាល់ទឹកប្រចាំក្លិបរបស់ខ្លួន ប្រចាំសាលា ឬ ខេត្តរបស់ខ្លួន។
កាលពីមុន កម្ពុជា ធ្លាប់មានកីឡានេះដែរ តែបន្ទាប់ពីសង្គ្រាមកីឡានេះទើបតែបង្កើតបាន២ឆ្នាំនេះទេ ។ សព្វថ្ងៃកម្ពុជា ទើបតែមានក្រុមបាល់ទឹកចំនួន២ក្រុមប៉ុណ្ណោះ គឺមួយក្រុមនៅរាជធានីភ្នំពេញ និង មួយក្រុមនៅខេត្តកំពង់ចាម។
លោកអគ្គលេខាធិការ ក៏បានអះអាងថា នឹងរៀបចំឲ្យមានការប្រកួតបាល់ទឹកប្រចាំឆ្នាំ និងបង្កើតកម្មវិធីហ្វឹកហាត់ប្រចាំសប្ដាហ៍ បន្ទាប់ពីអាងហែលទឹកក្នុងស្ដាតអូឡាំពិកបញ្ចប់ការជួសជុលនោះ៕
Source: Kampuchea Thmey Daily
0 Comments