ភ្នំពេញ ៖ នគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ កាលពីព្រឹកថ្ងៃទី០៥ មីនា ឆ្នាំ២០១៩ បានចាត់បញ្ជូនបុរសជនជាតិអាមេរិកវ័យចំណាស់ម្នាក់ មកសាលាដំបូងរាជធានីភ្នំពេញ ដើម្បីធ្វើការសាកសួរ ពាក់ព័ន្ធករណី ទិញពេស្យាចារ កុមារីខុសច្បាប់ ។
ជនសង្ស័យមានឈ្មោះ POPE DANNY LEE ហៅ រ៉ានី ភេទប្រុស អាយុ៦០ឆ្នាំ ជនជាតិអាមេរិកាំងកាន់លិខិតឆ្លងដែនលេខ 546245420 ។
សមត្ថកិច្ចបានឲ្យដឹងថា ជនសង្ស័យបានរងនូវពាក្យបណ្ដឹងពីសំណាក់អាណាព្យាបាលរបស់ជនរងគ្រោះ កាលពីល្ងាចថ្ងៃទី០២ ខែមីនា ឆ្នាំ២០១៩ នៅចំណុចហាងម៉ាស្សា យីហោ ស្រីនាង៨៧១ ស្ថិតនៅក្នុងសង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
ក្រោយពីមានពាក្យបណ្តឹង សមត្ថកិច្ចបានបើកការស៊ើបអង្កេត ស្រាវជ្រាវ និងឈានដល់កិច្ចប្រតិបត្តិការបង្ក្រាបលើបទល្មើស ទិញពេស្យាចារកុមារ ខ្មែរមួយនេះ ដោយបានរំដោះជនរងគ្រោះ៥នាក់ ក្នុងនោះមានកុមារី៣នាក់ នៅជាអនីតិជននៅឡើយ។
បន្ទាប់មក ជនរងគ្រោះ ត្រូវបានបញ្ជូនទៅមជ្ឈមណ្ឌលអប់រំ បណ្ដុះបណ្ដាល នៅមន្ទីរសង្គមកិច្ចរាជធានីភ្នំពេញ ចំណែកជនជាប់សង្ស័យត្រូវបានបញ្ជូនមកកាន់សាលាដំបូងរាជធានីភ្នំពេញ។
ព្រះរាជអាជ្ញាអមសាលាដំបូងរាជធានីភ្នំពេញ កំពុងធ្វើការសាកសួរជនសង្ស័យនៅឡើយ ដោយមិនទាន់សម្រេចចោទប្រកាន់ ឬមិនចោទប្រកាន់នោះទេ៕
Source: Kampuchea Thmey Daily
0 Comments