ភ្នំពេញ ៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បញ្ជាក់បែបនេះកាលពីព្រឹកថ្ងៃទី០៥ ខែមីនា ឆ្នាំ២០១៩ នៅក្នុងសន្និបាតបូកសរុបការងារប្រចាំឆ្នាំ និងលើកទិសដៅសម្រាប់ថ្ងៃខាងមុខ រយៈពេល៣ថ្ងៃ នៅក្រសួងការបរទេស ដែលសន្និបាតនេះ មានការចូលរួមពីថ្នាក់ដឹកនាំ និងមន្ត្រីរបស់ក្រសួង ក៏ដូចជាឯកអគ្គរាជទូត តំណាងអចិន្ត្រៃយ៍ និងអគ្គកុងស៊ុលរបស់កម្ពុជាយ៉ាងច្រើន។
មានប្រសាសន៍ទៅកាន់អ្នកចូលរួមក្នុងអង្គសន្និបាត លោកឧបនាយករដ្ឋមន្ត្រី ប្រាក់ សុខុន បានថ្លែងថា បើគ្មានសន្តិភាព កុំនិយាយពីការអភិវឌ្ឍន៍ឲ្យសោះ ពីព្រោះឆ្នាំ១៩៧០ គឺជាបទពិសោធន៍សម្រាប់កម្ពុជាយើង ហើយរាជរដ្ឋាភិបាលបានបែងចែកការងារសម្រាប់ការពារសន្តិសុខ និងអធិបតេយ្យភាពរបស់ប្រទេស។ ចំណែកក្រសួងការបរទេសក៏មានមុខងារប្រហាក់ប្រហែលគ្នា តែសមរភូមិការបរទេស គឺនៅលើឆាកអន្តរជាតិ ជាសមរភូមិការទូត។ លោកអះអាងថា ការងារការទូតពិតជាលំបាកណាស់ ពីព្រោះយើងត្រូវតស៊ូក្នុងសាធារណមតិ ការពារការវាយប្រហារណាមួយពីបរទេស។
លោកឧបនាយករដ្ឋមន្ត្រី ប្រាក់ សុខុន ដើម្បីការពារយុត្តិធម៌កម្ពុជា យើងត្រូវគាស់ឫស ហើយឫសនេះចាក់ជ្រៅណាស់ ហើយចាក់ជ្រៅដោយសារកត្តាច្រើនយ៉ាង ដូចជាកត្តាភូមិសាស្ត្រនយោបាយ បើគេមិនត្រូវការយល់ ក៏នៅតែមិនយល់ ពាក្យខ្មែរយើងហៅថា “ចាក់ទឹកលើក្បាលទា” ពីព្រោះផលប្រយោជន៍ភូមិសាស្ត្រនយោបាយធំជាងអ្វីៗទាំងអស់ នៅក្នុងការគិតគូររបស់អ្នកនយោបាយ។ កត្តាពីរទៀត គឺម៉ាស៊ីនឃោសនា ដែលលោកឧបនាយករដ្ឋមន្ត្រី ប្រាក់ សុខុន អះអាងថា ម៉ាស៊ីនឃោសនារបស់យើង មិនអាចប្រៀបជាមួយម៉ាស៊ីនឃោសនារបស់លោកខាងលិចបានទេ អត្ថបទយើង១០ មិនស្មើអត្ថបទគេមួយ ដែលចុះផ្សាយនៅលើកាសែតគេទេ។
ម្យ៉ាងទៀត ទីលាននេះ ជាទីលានដែលគេកាន់កាប់យូរហើយ យើងទើបតែចូលប្រឡូកប៉ុន្មានឆ្នាំចុងក្រោយនេះប៉ុណ្ណោះ ដែលយើងបានខិតខំរៀបចំទាំងគណៈប្រតិភូ ទាំងបេសកកម្មផ្សេងៗ ដូច្នេះយើងចាញ់ដេប៉ាគេ ដូច្នេះយើងត្រូវរត់ឲ្យលឿនជាងនេះ ដើម្បីឲ្យទាន់គេ។
តាមលោកឧបនាយករដ្ឋមន្ត្រី ប្រាក់ សុខុន ការប្រកួតប្រជែងរបស់មហាអំណាចពេលខ្លះត្រូវចាប់បង្ខំឲ្យយើងត្រូវជ្រើសរើសភាគីណាម្ខាង។ ជាបញ្ហាមួយលំបាក ពីព្រោះប្រទេសយើងបានប្រកាន់យកនូវគោលនយោបាយអព្យាក្រឹត្យ មិនចូលបក្សសម្ព័ន្ធ ហើយយើងចង់ធ្វើមិត្តជាមួយប្រទេសទាំងអស់ មិនចង់ធ្វើសត្រូវជាមួយប្រទេសណាទេ ហើយអ្វីដែលពិបាកនោះ គឺយើងពិបាកធ្វើមិត្តជាមួយមនុស្សម្នាក់ ដោយនឹងក្លាយជាសត្រូវរបស់មនុស្សម្នាក់ទៀត។ ត្រង់នេះហើយដែលយើងទាមទារនូវភាពឈ្លាសវៃ ហើយមិនងាករេចំពោះគោលការណ៍ជាដាច់ខាត ហើយត្រូវអនុវត្តតាមទិសស្លោករបស់រាជរដ្ឋាភិបាលគឺ កំណែទម្រង់ខាងក្នុង បង្កើនមិត្តខាងក្រៅ។
ប្រមុខការទូតកម្ពុជាបានអះអាងថា “បើយើងមានផលប្រយោជន៍អីមួយសម្រាប់គេ ទើបយើងមានអំណាច បើយើងគ្មានផលប្រយោជន៍សម្រាប់ដៃគូយើងទេ គ្មានតម្លៃសម្រាប់គេទេ ពីព្រោះគេត្រូវការពឹងយើងវិញ បើគេពឹងយើងបាន គេត្រូវពឹងយើង។ នេះនៅក្នុងទំនាក់ទំនាក់ទំនងអន្តរជាតិ គឺអីចឹង ដែលយើងធ្លាប់និយាយថា រវាងប្រទេស និងប្រទេស គ្មានទេមិត្តភាព គឺមានតែផលប្រយោជន៍ គេគិតថា តើយើងមានផលប្រយោជន៍អីសម្រាប់គេ ទើបគេរាប់យើង ក្នុងកម្រិតផលប្រយោជន៍នោះ សូមចង់ចាំបញ្ហានេះឲ្យច្បាស់”។
សូមបញ្ជាក់ថា សន្និបាតបូកសរុបការងារប្រចាំឆ្នាំ របស់ក្រសួងការបរទេសមានរយៈពេល៣ថ្ងៃ ក្រោមអធិបតីភាពលោកឧបនាយករដ្ឋមន្ត្រី ប្រាក់ សុខុន ហើយបើតាមកម្មវិធីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីនៅក្នុងពិធីបិទសន្និបាត។ សន្និបាតប្រចាំឆ្នាំនេះ គឺជាកាលានុវត្តភាពសម្រាប់អ្នកការទូតកម្ពុជា ដើម្បីពង្រីកចំណេះដឹងឲ្យកាន់តែទូលំទូលាយ ឧទ្ទេសនាមដោយវាគ្មិនសំខាន់ៗ លើបញ្ហាជាសារវន្តពាក់ព័ន្ធនឹង “យុទ្ធសាស្ត្រចតុកោណដំណាក់កាលទី៤ នៃរាជរដ្ឋាភិបាលកម្ពុជា” “ការជំរុញការទូតសេដ្ឋកិច្ច ទេសចរណ៍ និងវប្បធម៌” និង “ជំហររបស់កម្ពុជា លើបញ្ហាការប្រែប្រួលអាកាសធាតុ” ដែលនឹងលើកកំពស់បន្ថែមទៀតដល់ចំណេះដឹងជាក់ស្តែង ធ្វើឲ្យស៊ីជម្រៅកំរិតវិភាគ និងការយល់ដឹងទូលំទូលាយដល់អ្នកការទូតកម្ពុជា ក្នុងការបំពេញភារកិច្ចប្រកបដោយប្រសិទ្ធភាព។
តាមរបាយការណ៍ស្តីពីសមិទ្ធផល ដែលក្រសួងការបរទេស និងសហប្រតិបត្តិការអន្តរជាតិ សម្រេចបានក្នុងឆ្នាំ២០១៨ ដែលអានដោយលោក អ៊ុច បូររិទ្ធ រដ្ឋលេខាធិការក្រសួងការបរទេសបានឲ្យដឹងថា មួយឆ្នាំបានកន្លងផុតទៅ សភាពការណ៍សាកលលោក នៅតែមានការប្រែប្រួលឆាប់រហ័ស ស្មុគស្មាញ មិនច្បាស់លាស់ មិនអាចប៉ាន់ស្មានបាន ដែលបង្កឡើងដោយការប្រកួតប្រជែងដណ្តើមឧត្តមភាពគ្នារវាងមហាអំណាចនានា ទាំងនៅក្នុងវិស័យនយោបាយ ការទូត សេដ្ឋកិច្ច និងយោធា។ ការប្រកួតប្រជែងនេះ បានធ្វើឲ្យមានការកើនឡើងនូវសម្ពាធនយោបាយ សន្តិសុខ និងសេដ្ឋកិច្ច ទាំងនៅក្នុងតំបន់និងនៅក្នុងពិភពលោក ដែលជាប្រការរុញច្រាន និងបង្ខិតបង្ខំឲ្យមានការចង ឬសើរើសម្ព័ន្ធភាព ដើម្បីផលប្រយោជន៍រៀងៗខ្លួន។
ជាការគួរឲ្យកត់សំគាល់ ការជ្រៀតជ្រែកចូលកិច្ចការផ្ទៃក្នុងរបស់មាហាអំណាចខ្លះ និងសម្ព័ន្ធមិត្ត ក្រោមផ្លាកប្រជាធិបតេយ្យ និងការគោរពសិទ្ធិមនុស្ស បានរុញច្រានប្រទេសមួយចំនួនឲ្យធ្លាក់ចូលក្នុងភ្នក់ភ្លើងសង្គ្រាម ធ្វើឲ្យប្រជាជនរងទុក្ខវេទនា ជាពិសេស នៅ ស៊ីរី យេមែន លីប៊ី អ៊ីរ៉ាក់ ។ល។ ហើយថ្មីៗនេះ កំពុងគំរាមកំហែងដល់សន្តិភាព សន្តិសុខ នៃប្រទេស វេណេហ្ស៊ុយអេឡា។
ជម្លោះនៅតាមតំបន់នានា ជាពិសេសនៅអាហ្វ្រិក អាស៊ី និងមជ្ឈិមបូព៌ា នៅមិនទាន់រលត់ ឥណ្ឌានិងប៉ាគីស្ថាន ប៉ះទង្គិចគ្នា ដោយជម្លោះ កាស្មៀរ ឯបញ្ហាប៉ាឡេស្ទីន និងអ៊ីស្រាអែល នៅតែបន្តជាប់ផុងក្នុងជម្លោះជាតិសាសន៍ និងទឹកដីរកទីបញ្ចប់មិនឃើញ។
ទន្ទឹមនឹងនេះ ការដកខ្លួនចេញរបស់សហរដ្ឋអាមេរិក ពីកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ សន្ធិសញ្ញាស្តីពីអាវុធនុយក្លេអ៊ែររយៈចម្ងាយមធ្យម(INF) កិច្ចព្រមព្រៀងនុយក្លេអ៊ែរអ៊ីរ៉ង់ កិច្ចព្រមព្រៀងស្តីពីភាពជាដៃគូអន្តរ-ប៉ាស៊ីហ្វិក(TPP) ជាពិសេសការដកខ្លួនចេញរបស់សហរដ្ឋអាមេរិកពីអង្គការអន្តរជាតិសំខាន់ៗ ដូចជា ក្រុមប្រឹក្សាសិទ្ធិមនុស្សរបស់អ.ស.ប(UNHRC) និងអង្គការយូណេស្កូ (UNESCO) ព្រមទាំងការគំរាមដកខ្លួនចេញពីអង្គការពាណិជ្ជកម្មពិភពលោក(WTO) បានធ្វើឲ្យប៉ះពាល់យ៉ាងខ្លាំងដល់របៀបរបបអន្តរជាតិ និងប្រព័ន្ធពហុភាគីនិយម ក៏ដូចជាកិច្ចប្រឹងប្រែងរបស់សហគមន៍អន្តរជាតិក្នុងការរក្សាការពារ សន្តិភាព និងសន្តិសុខ និងកិច្ចអភិវឌ្ឍ ក្នុងពិភពលោក។ ដោយឡែក ការអនុវត្តនយោបាយគាំពារនិយមរបស់សហរដ្ឋអាមេរិក បានបង្កឲ្យមានជម្លោះពាណិជ្ជកម្មយ៉ាងខ្លាំងក្លាជាមួយនឹងបណ្តាប្រទេសផ្សេងៗទៀត ជាពិសេសជាមួយនឹងចិន។
ទឹកដីមាតុភូមិកម្ពុជាយើង ដែលស្ថិតនៅចំណុចយុទ្ធភូមិសាស្ត្ររបស់ប្រទេសមហាអំណាច មិនអាចគេចផុតពីការទទួលរងឥទ្ធិពលនៃជម្លោះភូមិសាស្ត្រនយោបាយរវាងមហាអំណាចទាំងនោះបានទេ។ ប្រទេសមហាអំណាចខ្លះ និងសម្ព័ន្ធមិត្ត នៅបន្តប្រើប្រាស់គ្រប់ល្បិចកល ជ្រៀតជ្រែកចូលកិច្ចការផ្ទៃក្នុងកម្ពុជា អនុវត្តស្តង់ដារពីរចំពោះការអនុវត្តលទ្ធិប្រជាធិបតេយ្យ និងការគោរពសិទ្ធិមនុស្ស សំដៅចាប់បង្ខំឲ្យកម្ពុជាដើរតាមគន្លងនយោបាយរបស់ខ្លួន។ ពួកគេ ធ្វើមិនដឹងមិនឮចំពោះសកម្មភាពរបស់ក្រុមអគតិមួយចំនួន នៅក្នុងការបំពក់ការស្អប់ខ្ពើម ញុះញង់ ប្រកាន់ពូជសាសន៍ បំពានគោលការណ៍លទ្ធិប្រជាធិបតេយ្យ បំបែកបំបាក់សង្គមជាតិ អនុវត្តបដិវត្តពណ៌សំដៅផ្តួលរំលំរាជរដ្ឋាភិបាលស្របច្បាប់៕
Source: Kampuchea Thmey Daily
0 Comments