ភ្នំពេញ ៖ បុរសម្នាក់ ដែលជាប់ចោទពីបទគំរាមកំហែងថា នឹងសម្លាប់ និងបរិហារកេរ្តិ៍ ជាសាធារណៈ ក្នុងរឿងឆាតសុំស្រលាញ់ស្ត្រីរងគ្រោះ តាមបណ្តាញទំនាក់ទំនងសង្គមមិនបានសម្រេច ត្រូវបានចៅក្រមសាលាដំបូងរាជធានីភ្នំពេញ នាល្ងាចថ្ងៃទី១៩មីនា ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់១៨ខែ និងបង្គាប់ឲ្យសងជំងឺចិត្តដល់ជនរងគ្រោះ២០លានរៀល។ ក្នុងករណីជនត្រូវចោទមិនសុខចិត្តនឹងសេចក្ដីសម្រេចនេះ អាចប្ដឹងឧទ្ធរណ៍បាន។ ជនបែកស្លុយនេះ ឈ្មោះ កន ដេត អាយុ២៩ឆ្នាំ។
រឿងក្ដីនេះ ត្រូវបានតុលាការកាត់ទោស កាលពីថ្ងៃទី៤ ខែមិនា ឆ្នាំ២០១៩ និងបានលើកពេលមកប្រកាសសាលក្រមនារសៀលនេះ។
សវនាការនោះមាន លោក តុប ឈុនហេង អនុប្រធានសាលាដំបូងរាជធានីភ្នំពេញ ជាប្រធានក្រុមប្រឹក្សា និងលោក ស៊ិន វិរៈ ជាតំណាងអយ្យការ។
ក្នុងសវនាការជនជាប់ចោទ បានសារភាពថា ខ្លួនពិតជាបានឆាតសុំស្រលាញ់ជនរងគ្រោះតាមប្រព័ន្ធបណ្ដាញទំនាក់ទំនងសង្គមពិតប្រាកដមែន។ ប៉ុន្តែជនរងគ្រោះមិនព្រមឆ្លើយតប ទើបធ្វើឲ្យខ្លួនខឹងសម្បា ហើយក៏គំរាមសម្លាប់តែម្តង។
ចំណែកស្ត្រីរងគ្រោះបានបញ្ជាក់ថា ខ្លួនពុំដែលស្គាល់បុរសរូបនេះទេ ហើយខ្លួនក៏មានប្តីរួចដែរ ទើបខ្លួនមិនតបឆាតបែបផ្ដេសផ្ដាសបែបនេះ។ ប៉ុន្តែបានធ្វើឲ្យប្តីយល់ច្រឡំ រហូតចុះចេញពីផ្ទះ។ ដូច្នេះខ្លួនមានការខូចចិត្តជាខ្លាំងចំពោះទង្វើរបស់បុរសរូបនេះ ហើយខ្លួនសូមទាមទារសំណងជំងឺចិត្តចំនួន១០ម៉ឺនដុល្លារ។
គួរបញ្ជាក់ថា នាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនបុរសរូបនេះកាលពីថ្ងៃទី១៩ ខែវិច្ឆិកា ឆ្នាំ២០១៨ ដែលបាននិយាយគំរាម តាមប្រព័ន្ធ បណ្តាញសង្គមប៉ុនប៉ងសម្លាប់ស្ត្រីរងគ្រោះ ព្រោះមិនអាចតាមស្រលាញ់បាន។
ពេលជនរងគ្រោះមិនបានឆ្លើយតប ជនសង្ស័យនោះ បានសរសេរសារបង្ហោះ (comment/post) និងបន្ត ផ្ញើសារ (messenger)បន្ថែមទៀត ក្នុងន័យតាមស្រឡាញ់ទៅរំខានច្រើនដង រហូតជនរងគ្រោះ បានប្លុកគណនី (Block) តាមរំខានសុំស្រឡាញ់នោះ ដែលបណ្តាលឲ្យជនសង្ស័យរូបនោះ មានការខឹងសម្បារយ៉ាងខ្លាំង ហើយបាននិយាយគំរាមថានឹងតាមព្យាបាទជារៀងរហូត។
ជនសង្ស័យ កន ដេត បានបង្កើតគណនីជាច្រើនតាមរំខាន និងបានសរសេរអត្ថបទអសុរោះ ជេរប្រមាថ បរិហារកេរ្តិ៍ជនរងគ្រោះ ក្រុមគ្រួសារ មិត្តភ័ក្ដិទាំងឡាយ និងបានផ្ញើសារជាសំឡេង គំរាមថា នឹងសម្លាប់ជនរងគ្រោះផងដែរ។ អំពើគំរាមកំហែងតាមសម្លាប់នោះ បាននាំឲ្យមានការប្តឹងទៅសមត្ថកិច្ច ដើម្បីចាត់វិធានការណ៍ រាំងស្កាត់ក្នុងការការពារសន្តិសុខផ្ទាល់ខ្លួន៕
Source: Kampuchea Thmey Daily
0 Comments